އަޟްޙާ އީދު ދުވަހުގެ ފަތިހު މާލޭގައި ހިނގި ނުރައްކާތެރި އެކްސިޑެންޓުގައި ސައިކަލް ދުއްވަން އިން މީހާގެ ބަންދަށް އިތުރު 15 ދުވަސް ކްރިމިނަލް ކޯޓުން ޖަހައިފިއެވެ.

މި އެކްސިޑެންޓުގައި އަނިޔާވެގެން ފަރުވާދެމުން އަންނަނީ ގައުމީ ޔުނިވަސިޓީގެ ލެކްޗަރަރ އަލީ ހަފީޒްއަށެވެ.

އެކްސިޑެންޓުގައި ސައިކަލް ދުއްވަން އިން މީހާ، ކޯޓު އަމުރެއްގެ ދަށުން ހައްޔަރުކުރީ ޖުލައި މަހުގެ 3 ވަނަ ދުވަހުއެވެ. އެއަށްފަހު އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަސް ޖަހައިދީފައިވާއިރު، އެ މުއްދަތު ހަމަވުމުން ކޯޓުން އަނެއްކާވެސް މިވަނީ އޭނާ 15 ދުވަހަށް ބަންދު ކުރުމަށް އަމުރުކޮށްފައެވެ.

އުމުރުން 22 އަހަރުގެ މި މީހާ އަތުގައި ލައިސަންސް ނޯންނަކަމަށް ފުލުހުން ބުނެއެވެ. އޭނާ ހައްޔަރުކުރުން ލަސްވެގެން މީހުންގެ ފާޑުކިޔުންތައް އޭރު ފުލުހުންނަށް އަމާޒުވެފައިވާއިރު، އެކަމާ ގުޅޭގޮތުން ފުލުހުން ބުނެފައިވަނީ އޭނާ ހައްޔަރުކުރުން ފަސްކުރީ އޭނާއަށްވެސް އެކްސިޑެންޓްގައި ބޮޑެތި އަނިޔާތަކެއް ލިބިފައިވުމާއެކު، ފަރުވާދޭންޖެހޭތީ ކަމަށެވެ.

ހަފީޒް އެކްސިޑެންޓުވެފައިވަނީ ހީނާމާގޭ ޕާކިންގ ޒޯނު ކައިރީގައި ހުންނަ މިސްކިތުން ފަތިސް ނަމާދުން ނިމިގެން ނުކުތްތަނާއެވެ. މަންޒަރު ދުށް މީހުން ބުނާގޮތުގައި ސައިކަލު ދުއްވާފައި އައީ ވަރަށް ބާރަށެވެ. އަދި ހަފީޒުގެ ގައިގައި ސައިކަލު ޖެހުމުން އޭނާ ވަރަށް ދުރަށް ވިއްސައިގެން ދިޔަކަމަށް ބުނެފައިވެއެވެ.

އެކްސިޑެންޓްވުމާއެކު ހަފީޒް އޭޑީކޭއަށް ގެންގޮސް އައިސީޔޫގައި ފަރުވާދީފައިވާއިރު އިތުރު ފަރުވާއަށް ކޮމަރޝަލް ފްލައިޓެއްގައި ރާއްޖެއިން ބޭރަށް ނުގެންދެވޭތީ ބޭރަށް ގެންގޮސްފައިވަނީ އެއަރ އެމްބިއުލާންސެއްގައެވެ.