ފެނަކަ އެއްވަރު، އާރުއާރުސީ މޮޅު

ކްލަބް މޯލްޑިވްސް ކަޕްގައި އެންމެ ފަހުގެ ޗެމްޕިއަން ފެނަކަ ފުރަތަމަ މެޗު އެއްވަރުވެ, ރޯޑް ޑިވެލޮޕްމަންޓް ކޯޕަރޭޝަން މޮޅަކުން ފަށައިފިއެވެ.

ޓީމް ފެނަކަ ފުރަތަމަ މެޗު އެއްވަރުވީ ކްލަބް އޭވިއޭޝަން ސެކިއުރިޓީއާ ވާދަކޮށް 2-2 ނެވެ. މެޗުގައި ފެނަނަ ޓީމްގެ ދެ ލަނޑު ޖެހީ ޒައިން ޒަފަރުއާއި, ހުސައިން ނާޝިދުއެވެ. އޭވިއޭޝަން ސެކިއުރިޓީގެ ދެ ލަނޑު ޖެހީ ތައުމީން ނޫހުއާއި, އަލީ މީސާގު އީސާއެވެ. މެޗުގެ މޮޅު ކުޅުންތެރިއަކީ މީސާގުއެވެ.

ގްރޫޕް ޖީގައި ދެން ކުޅުނު މެޗު ކްރޮސްރޯޑްސް މޯލްޑިވްސް ވަނީ ކާމިޔާބުކޮށްފައެވެ. އެއީ މީޑިޔާނެޓާ ވާދަކޮށް 3-2 ނެވެ. މެޗުގައި ކްރޮސްރޯޑްސްގެ ތިން ލަނޑު ޖެހީ އިސްމާއީލް ވަހީދާއި, އިބްރާހީމް ޒާހީއާއި, އަލީ ޒަޔާން އަހުމަދެވެ. މީޑިޔާނެޓްގެ ދެ ލަނޑު ޖެހީ ޝީހާން އަބުދުލްހަމީދާއި, އަހުމަދު ޝިނާންއެވެ.

މުބާރާތުގެ ފެވަރިޓުންގެ ތެރޭގައި ހިމެނޭ ރޯޑް ޑިވެލޮޕްމަންޓް ކޯޕަރޭޝަން ވަނީ ފުރަތަމަ މެޗުގައި 2-0 ން ކަސްޓަމްސް ރެކްރިއޭޝަން ކްލަބް ބަލިކޮށްފައެވެ. ގްރޫޕް އެޗްގެ މިމެޗުގައި އާރުއާރުސީގެ ދެ ލަނޑު ޖެހީ އަބުދުالله ޔާމީންއާއި އަލީ ޝިފާއު އެވެ. މެޗުގެ މޮޅު ކުޅުންތެރިއަކީ ޔާމީނެވެ.

މިގްރޫޕްގައި ޓީއެމްއޭއިން ވަނީ 3-2 ން ޔޫރޯ މާކެޓިންގ (އީއާރުއެފްސީ) ބަލިކޮށްފައެވެ. ކްލަބް ޓީއެމްއޭގެ ތިން ލަނޑު ޖެހީ މުހައްމަދު ވިސާމްއާއި, ރަބީއު މުހައްމަދާއި, އަހުމަދު ނާހިލް އިބްރާހީމްއެވެ. ޔޫރޯ މާކެޓިންގެ ދެ ލަނޑު ޖެހީ މުހައްމަދު ލީވާން ހަސަންއާއި އަހުމަދު ސަމްހާދެވެ.