ކްލަބް މޯލްޑިވްސް ކަޕްގެ ގްރޫޕްއޭގައި ސްޓެލްކޯ ކްލަބުން ފުރަތަމަ މޮޅު ހޯދައިފިއެވެ.
ފުރަތަމަ މެޗު އެއްވަރުވެފައި ވަނިކޮށް ދެވަނަ މެޗުގައި ސްޓެލްކޯ ކްލަބް މޮޅެއް ހޯދީ 2-1 ން ޓީމް އެމްޓީސީސީ ބަލިކޮށްގެންނެވެ. މެޗުގައި ސްޓެލްކޯ ކްލަބްގެ ފުރަތަމަ ލަނޑު ޖެހީ އިބްރާހީމް ރިމާހު އެވެ. ދެވަނަ ލަނޑު ޖެހީ މެޗުގެ މޮޅު ކުޅުންތެރިޔާ އަލީ މާއިޝް އެވެ. އެމްޓީސީސީގެ ލަނޑު ޖެހީ އިބްރާހީމް އާޒިމްއެވެ. އެމްޓީސީސީގެ ފުރަތަމަ މެޗު ނިމުނީ އެއްވަރުވެގެންނެވެ. މިގްރޫޕްގައި މިހާރު އެއްވަނާގައި އޮތީ ސްޓެލްކޯ ކްލަބެވެ.
ކްލަބް މޯލްޑިވްސް ކްލެސިކްގައި ބުދަ ދުވަހު ޓީމް ޑީޖޭއޭ ވަނީ 10-2 ން ޓީއާރުސީ-ޓްރާންސްޕޯރޓް ބަލިކޮށްފައެވެ. މި ގްރޫޕްގައި ތައުލީމީ ގުޅުމާއި އައިޖީއެމްއެޗް ކްލަބް ވާދަކުރި މެޗު ނިމުނީ 1-1ން އެއްވަރު ވެގެންނެވެ. މިއީ ގްރޫޕް ސީގެ ދެ މެޗެވެ.
