ބީއެމްއެލް، އާބަންކޯ، ވެމްކޯ އަދި ސްޓެލްކޯ ކްއާޓާ ފައިނަލަށް

ކްލަބް މޯލްޑިވްސް ކަޕްގެ ކްއާޓާ ފައިނަލުން ބީއެމްއެލް، އާބަންކޯ، ވެމްކޯ އަދި ސްޓެލްކޯ ޖާގަ ހޯދައިފިއެވެ.

މި ހަތަރު ޓީމް ކްއާޓާ ފައިނަލުން ޖާގަ ހޯދީ ދެވަނަ ބުރުގެ މެޗުތައް ކާމިޔާބުކޮށްގެންނެވެ. ކްލަބް އާބަންކޯ ކްއާޓާ ފައިނަލުން ޖާގަ ހޯދީ ދެވަނަ ބުރުގައި 5-0ން ޕްރިޒަން ކްލަބް ބަލިކޮށްގެންނެވެ. މެޗުގައި އާބަންކޯގެ ފަހު ދެ ލަނޑު ޖެހީ މެޗުގެ މޮޅު ކުޅުންތެރިޔާ އަބްދުﷲ ޝާފިއުއެވެ. ފުރަތަމަ ލަނޑު ޖެހީ ސާމިން މުހައްމަދު ނަސީރެވެ. ދެވަނަ ލަނޑު ޖެހީ އަބްދުﷲ ޝައްފާނެވެ. އަދި ތިންވަނަ ލަނޑު ޖެހީ ޔާމިން މުހައްމަދެވެ.

ވެމްކޯ ކްއާޓާ ފައިނަލުން ޖާގަ ހޯދީ ގަދަ ސޯޅަ ބުރުގައި 6-0ން ކްރޮސް ރޯޑްސް މޯލްޑިވްސް ބަލިކޮށްގެންނެވެ. މެޗުގެ މޮޅު ކުޅުންތެރިޔާ އަލީ ޝިޔާހު ތިން ލަނޑު ޖެހިއެވެ. އަނެއް ތިން ލަނޑު ޖެހީ އިސްމާއީލް ވަޖީހާއި މުސައްނިފް މުހައްމަދާއި އަބްދުﷲ ޖުނައިދެވެ.

ސްޓެލްކޯ ކްއާޓާ ފައިނަލުން ޖާގަހޯދީ ގަދަ ސޯޅަ ޓީމް ވާދަކުރި ދެވަނަ ބުރުގައި 6-0ން ކަސްޓަމްސް ރެކްރިއޭޝަން ކްލަބް ބަލިކޮށްގެންނެވެ. މެޗުގައި ފުރަތަމަ ދެ ލަނޑު ޖެހީ އިބްރާހީމް ރިމާހުއެވެ. ތިންވަނަ ލަނޑު ޖެހީ މެޗުގެ މޮޅު ކުޅުންތެރިޔާ އަލީ މާއިޝްއެވެ. ހަތަރުވަނަ ލަނޑު ޖެހީ މުހައްމަދު ޝިރުހާނެވެ. ފަސްވަނަ ލަނޑު ޖެހީ ޖުމެއިލް ޖަމީލެވެ. ފަހު ލަނޑު ޖެހީ ހާރޫން އިބްރާހީމެވެ.

ޔުނައިޓެޑް ބީއެމްއެލް ކްއާޓާ ފައިނަލުން ޖާގަހޯދީ ދެވަނަ ބުރުގައި 1-0ން އެމްޕީއެލް ބަލިކޮށްގެންނެވެ. މެޗުގެ ހަމައެކަނި ލަނޑު ޖެހީ މެޗުގެ މޮޅު ކުޅުންތެރިޔާ އިޝާން އިބްރާހީމް (ސައްޓު)އެވެ. ދެވަނަ ބުރުގެ ފަހު ހަތަރު މެޗު ހޮނިހިރު ދުވަހުގެރޭ ކުޅޭނެއެވެ.