ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ކްލަބް މޯލްޑިވްސް ކަޕް 2022ގެ ފައިނަލް މެޗް ޝަރަފުވެރިކޮށްދެއްވައިފިއެވެ.

ކްލަބް މޯލްޑިވްސް ކަޕް 2022ގެ ފައިނަލް މެޗު ކުޅެފައިވަނީ ހޮނިހިރު ދުވަހުގެ ރޭ ހުޅުމާލެ ރެހެންދި ފުޓްސަލް ދަނޑުގައެވެ. ފައިނަލް މެޗަށްފަހު މުބާރާތް ނިންމާލުމުގެ ރަސްމިއްޔާތު ވެސް ވަނީ ބާއްވައިފައެވެ.

މި ރަސްމިޔާތުގައި ރައީސުލްޖުމްހޫރިއްޔާ ވަނީ 'ކިންގް އޮފް ފުޓްސަލް' އެވޯޑް ހަވާލުކޮށްދެއްވާފައެވެ. އަދި އެ މަނިކުފާނު ވަނީ ކްލަބް މޯލްޑިވްސް ކަޕް 2022ގެ ޗެމްޕިއަން ޓީމަށް މެޑަލް އަދި ޓްރޮފީ ހަވާލުކޮށްދެއްވާފައެވެ.

ކްލަބް މޯލްޑިވްސް ކަޕް 2022ގެ ފައިނަލް މެޗުގައި ކުޅެފައިވަނީ ފެނަކަ ޓީމާއި މޯލްޑިވްސް ޕޯޓްސް ލިމިޓެޑް (އެމް.ޕީ.އެލް)ގެ ޓީމެވެ. އަދި މި މެޗު 2-1 އިން އެމްޕީއެލް ޓީމު ބަލިކޮށް މުބާރާތް ކާމިޔާބު ކުރީ ފެނަކަ ޓީމެވެ.

މި މުބާރާތުގެ އެންމެ މޮޅު ކުންތެރިޔަކަށް ފެނަކައިގެ އަހުމަދު އަޔާޒް (އަޔާ) ހޮވުނުއިރު، އެންމެ މޮޅު ކޯޗަކީ ފެނަކައިގެ ކޯޗު އަބްދުﷲ ނަސީރު (އަބޯ) އެވެ. އަދި އެންމެ ގިނަ ލަނޑު ޖެހި ކުޅުންތެރިއަކީ މުބާރާތުގައި ޖުމްލަ 13 ލަނޑު ޖެހި އޮންލީއެވެ. މުބާރާތުގެ ފެއާ ޕްލޭ ޓީމަކީ ކްލަބް ވެމްކޯއެވެ.

ކްލަބް މޯލްޑިވްސް ކަޕް 2022ގައި 31 ޓީމުން ބައިވެރިވިއެވެ. މި މުބާރާތުގެ ތެރެއިން 'އެއިޓީން ތަރޓީ 2022' ގެ ނަމުގައި އަންހެން ޓީމުތަކަށް ފުރުސަތު ދިނުމަށް ބޭއްވި މުބާރާތުގައި 5 ޓީމަކުން ވަނީ ބައިވެރިވެފައެވެ.

ކްލަބް މޯލްޑިވްސް ކަޕް ފެށުނީއްސުރެ ކްލަބް މޯލްޑިވްސް އިން އަންނަނީ އިޖުތިމާއީ މައްސަލަތަކަށް އަހުލުވެރިކޮށް، ރައްޔިތުން ހޭލުންތެރިކުރުވުމަށް އަމިއްލަ ފަރުދުންނާއި މުއައްސަސާތަކާ ގުޅިގެން ގިނަ މަސައްކަތްތަކެއް ކުރަމުންނެވެ. އެހެންކަމުން މިއަހަރުގެ މުބާރާތުގައި ކްލަބް މޯލްޑިވްސް އިން ޕްރޮމޯޓްކުރަނީ ބްލައިންޑް އެސޯސިއޭޝަނެވެ.

މި އަހަރު މުޅިން އަލަށް 'އެކޮއި' ޓެބެއްވަނީ ކްލަބް މޯލްޑިވްސް ވެބްސައިޓްގައި ހިމަނާފައެވެ. 'އެކޮއި' ގައި ހިމެނެނީ ކްލަބް މޯލްޑިވްސް ކަޕް 2022ގައި ކުޅުނު ކުޅުންތެރިންގެ ތެރެއިން ފާހަގަކޮށްލެވޭ ހުނަރުވެރި ކުޅުންތެރިންގެ މަޢުލޫމާތެވެ.