މޯލްޑިވްސް ޕޯރޓްސް ލިމިޓެޑް (އެމްޕީއެލް)އާއި ގޭސް ކްލަބް، ކްލަބް މޯލްޑިވްސް ކަޕް ބޮޑު މޮޅަކުން ފަށައިފިއެވެ.

ގްރޫޕް ސީގެ އެމްޕީއެލް ފުރަތަމަ މެޗު ކާމިޔާބުކުރީ ޓީމް އެލައިޑާ ވާދަކޮށް 5-0 ނެވެ. މެޗުގައި އެމްޕީއެލްގެ މަހުދީ ދެ ލަނޑު ޖެހިއެވެ. މެޗުގެ މޮޅު ކުޅުންތެރިއަކީވެސް އޭނާއެވެ. އެޓީމަށް ދެން ލަނޑު ޖަހައިދިނީ އަހުމަދު ނިޒާމްއާއި އަލީ ހައިސަމްއެވެ. މިގްރޫޕްގައި ގޭސް ކްލަބް ފުރަތަމަ މެޗު ކާމިޔާބުކުރީ ކްލަބް ޓީޓީއެސްއާ ވާދަކޮށް 6-2 ނެވެ. ގޭސް ކްލަބްގެ އަހުމަދު ރަޝީދު ހަތަރު ލަނޑު ޖެހިއެވެ. މޮޅު ކުޅުންތެރިއަކީ ވެސް އޭނާއެވެ. އަނެއް ދެ ލަނޑު ޖެހީ މުޙައްމަދު އަނޫފްއާއި ނާއިފް ޝަފީގުއެވެ. ޓީޓީއެސްގެ ދެ ލަނޑު ޖެހީ ވިޖާޒު އީސާފުޅާއި, ހުސައިން ސާމިލްއެވެ.

ގްރޫޕް ޑީގައި ކްލަބް އާބަންކޯ ފުރަތަމަ މެޗު ކާމިޔާބުކުރީ މޯލްޑިވްސް އެއަޕޯރޓްސް ކޮމްޕެނީ ލިމިޓެޑާއި ވާދަކޮށް 3-1 ނެވެ. މެޗުގައި އާބަންކޯގެ ތިން ލަނޑު ޖެހީ ޔާމީން މުޙައްމަދާއި, ހުސައިން ޝަރީފާއި, އަބުދުالله ޝައްފާނެވެ. މޮޅު ކުޅުންތެރިއަކީ ހުސައިން ޝަރީފެވެ. އެމްއޭސީއެލްގެ ލަނޑު ޖެހީ ހަސަން މާޒިންއެވެ. މިގްރޫޕްގައި ކްލަބް އިމިގްރޭޝަނުން ވަނީ ޕޮލިސް ކްލަބް ބަލިކޮށްފައެވެ. އެއީ 3-2 ނެވެ. މެޗުގައި އިމިގްރޭޝަންގެ ލަނޑުތައް ޖެހީ ސައިފާން އަހުމަދު މަނިކާއި އަހުމަދު ޔައީޝް ޔޫޝައުއާއި ހުސައިން ނިޔާޒެވެ. ޕޮލިހުގެ ދެ ލަނޑު ޖެހީ އަހުމަދު ރިފްޝާންއާއި އަހުމަދު ލޫތެވެ.