ފްލޮރިޑާގެ ފޯޓް ލައުޑާޑޭލްގައި އާދީއްތަ ދުވަހު އިންޓަ މިއާމީގެ ކުޅުންތެރިންގެ ގޮތުގައި ލިއޮނެލް މެސީއާއި ސާޖިއޯ ބުސްކޭޓްސް ދައްކާލައިފިއެވެ.

ސަޕޯޓަރުން ވަދެ ފުރިފައިވާ އިންޓަ މިއާމީގެ ސްޓޭޑިއަމްގައި މި ދެ ކުޅުންތެރިން ދައްކާލުމަށް އެ ކުލަބުން ވަނީ "ދި އަންވީލް" ނަމަކަށް ކިޔާ އިވެންޓެއް ބާއްވާފައެވެ. މި ދެ ކުޅުންތެރިންވެސް އިންޓަ މިއާމީ އާ ގުޅޭނެކަމަށް މީގެ ދުވަސްކޮޅެއް ކުރިން ވަނީ ރިޕޯޓުކޮށްފައެވެ.

މި އިވެންޓުގައި ކުލަބުގެ ވެރިން ވަނީ މެސީއަށް އޭނާގެ 10 ނަންބަރު ޖާޒީ، އަދި ބުސްކެޓްސްއަށް އޭނާގެ 5 ނަންބަރު ޖާޒީ ރަސްމީކޮށް ހަވާލުކޮށްފައެވެ. މީގެއިތުރުން، ދެ ކުޅުންތެރިންވެސް ވަނީ ސަޕޯޓަރުންނާ މުޚާތަބުކޮށް ވާހަކަދައްކާފައެވެ. މި އިވެންޓުގައި ކުލަބުގެ އެއް އޯނަރުކަމަށްވާ އިންގްލެންޑު އަދި މެންޗެސްޓަރ ޔުނައިޓެޑުގެ ލެޖެންޑް، ޑޭވިޑް ބެކަމްވެސް ބައިވެރިވިއެވެ.

ރިޕޯޓުތަކުން ބުނާގޮތުން، މެސީ އިންޓަ މިއާމީއަށް ބަދަލުވުމުގެ ކުރިން، ސައޫދީ ޕްރޯ ލީގުގެ އަލް ހިލާލުން ވަނީ އޭނާއަށް އަހަރަކު 400 މިލިއަން ޑޮލަރު ލިބޭ ހުށަހެޅުމެއް ހުށަހަޅާފައެވެ. މީގެ އިތުރުން، މެސީ އެނބުރި ބާސެލޯނާއާ ގުޅޭނެކަމުގެ އަޑުތަކެއްވެސް ވަނީ ފެތުރިފައެވެ. ނަމަވެސް، މިދިޔަ ޖޫން މަހު މެސީ ވަނީ އިންޓަ މިއާމީއާ ގުޅޭނެ ކަމަށް އިއުލާނުކޮށްފައެވެ.

ބާސެލޯނާގެ އެންމެ ކާމިޔާބު ދުވަސްތަކު މެސީއާއި ބުސްކެޓްސް ވަނީ އެ ޓީމާއެކު ގިނަ ކާމިޔާބީތަކެއް ހޯދާފައެވެ. ބުސްކެޓްސް އިންޓަ މިއާމީއާ ގުޅެން މެދުވެރިވި އެންމެ ބޮޑު އެއް ސަބަބަކީވެސް މެސީއެވެ.