ރައީސް އިބްރާހިމް މުހައްމަދު ޞާލިހު ނޫން ބޭފުޅެއް ވެރިކަމުގައި ހުންނެވި ނަމަ ކޯލިޝަނުގައި ތިބެ އެމަނިކުފާނާއި އެކުގައި ނެތް އެކަކު ވެސް ސަރުކާރުގައި ނުހުންނާނެ ކަމަށާާއި، އެ މީހުން މަޤާމުގައި ބޭތިއްބީ ރައީސްގެ އޯގާތެރިކަމުން ކަމަށް ހޯމް މިނިސްޓަރ އަދި އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެއެވެ.
އިމްރާން މިފަދައިން ވިދާޅުވީ ވ.ފުލިދޫގައި ވާހަކަދައްކަވަމުންނެވެ. އިމްރާން ވިދާޅުވީ އެ ބޭފުޅުން މަޤާމުގައި ބޭތިއްބުމުގެ ނަތީޖާ ރަނގަޅު ކަމަށެވެ. މިހާރު އެ ބޭފުޅުން ކެނޑިޑޭޓުންގެ ގޮތުގައި ނުނިކުންނަން ޖެހޭ ހިސާބަށް ކަންކަން ގޮސްފައިވާކަމަށް ވެސް އިމްރާން ވިދާޅުވިއެވެ. އަދި ވެރިކަަމަށް ކުރިމަތިލި ނަމަވެސް އޭގެ ތެރެއިން ބޭފުޅުން ވެސް ރައީސަށް ތާއީދުކުރާނެ ކަމަށް އިމްރާން ވަނީ ވިދާޅުވެފައެވެ. އިމްރާން ވިދާޅުވީ މިހާތަނަށް ކުރި ކެމްޕެއިން ދަތުުރުތަކުން އެނގުނީ ރައްޔިތުންގެ ތާއީދު ދުވަހަކަށް ވުރެ ދުވަހެއް ރައީސް އަށް އިތުރުވަމުންދާ ކަން ކަމަށެވެ.
ކެމްޕެއިން ދަތުރުތަކުން ކުރެވެނީ ރައްޔިތުންނާއި ގާތުން މަސައްކަތް ކުރެވޭ ކަމުގެ އިހުސާސް ކަމަށާއި އެއީ މި ކެމްޕެއިންގެ ތެރެއިން ފެންނަ އެންމެ ރީތި މަންޒަރު ކަމަށް އިމްރާން ވިދާޅުވިއެވެ. ކުޑަ އާބާދީ އެއް އޮތް ރަށްރަށަށް ވެސް ރައީސް ދެއްވާ އިސްކަން މި ދަތުރުން އެކަނިވެސް ހާމަވާ ކަމަށް އިމްރާން ވަނީ ވިދާޅުވެފައެވެ. ރައީސް އެ ރަށްރަށަށް ވަޑައިގެން އާއްމުން ބޭނުންވާ ކަންކަން ކޮށްދެއްވާނެކަމުގެ ޔަޤީންކަން ދެއްވާފައިވާ ކަަމަށް އިމްރާން ވިދާޅުވިއެވެ. އަދި ރައީސް އަކީ ޚިޔާލުތަފާތުވާ މީހުންނާއި އެކުގައި ވެސް މަސައްކަތް ކުރެއްވޭ ޤާބިލް ބޭފުޅެއް ކަމަށް އިމްރާން ވަނީ ވިދާޅުވެފައެވެ.
