ރައީސް ވަޑައިގަންނަވާއިރު ހުރަސް އެޅުމުގެ ހަރަކާތްތައް ހިންގަނީ ކިހިނެއްކަން އެނގިވަޑައިގަންނަވާކަމަށް އިމްރާން ވިދާޅުވި
ހޯމް މިނިސްޓަރ އިމްރާން އިމްރާން އަބްދުﷲ
ކެމްޕެއިން ދަތުރުތަކުގައި ރައީސުލްޖުމްހޫރިއްޔާ އަދި ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިހު ރަށްރަށަށް ވަޑައިގެންނެވުމުން ގައު އުކާ ވެލިއުކުމުގެ ފުރުސަތު ނުދޭނެކަމަށް ހޯމް މިނިސްޓަރ އައްޝެއިޚް އިމްރާން އަބްދުﷲ ވިދާޅުވެއްޖެއެވެ.
ސަރުކާރު ކޯލިޝަންގައި ހިމެނޭ އަދި ކުރިޔަށް އޮތް ރިޔާސީ އިންތިޚާބުގައި އެމްޑީޕީ އާއެކު ކޯލިޝަން ހަދާފައިވާ އަދާލަތު ޕާޓީގެ ރައީސް އިމްރާން އަބްދުﷲ ގއ ވިލިނގިލީގައި ކުރިޔަށްދިޔަ "އުފާންވެރި އަމާން ރާއްޖެ" ޖަލްސާގައި ވާހަކަދައްކަވަމުން ވިދާޅުވީ މިފަދަ ހަރަކާތްތައް ހިންގަނީ ކިހިނެއްކަން އެނގިވަޑައިގަންނަވާކަމަށެވެ. ރައީސް ވަޑައިގަންނަވާ ވަގުތު ނިކުމެ ހުތުބު ބަސް ބޭނުންކޮށް މިފަދަ ކަންކަން ހިންގަނީ ކިހިނެއްކަން އެނގިވަޑައިގަންނަވާކަމަށާއި އެ މައުލޫމާތު ލިބިވަޑައިގަންނަވާކަމަށެވެ. މިކަން ކުރުވަނީ ކުދިން ލައްކާކަމަށާއި ނިކަމެތި ރައްޔިތުން ލައްވާ ކަންކުރުވުމުގެ ވިސްނުން ހުންނަ ބައެއް ސިޔާސީ ލީޑަރުންކަމަށް އިމްރާން ވިދާޅުވިއެވެ.
ރައީސް ވިދާޅުވީ ކެމްޕެއިން ކުރުމުގެ ފުރުސަތު ހުރިހާ ކެންޑިޑޭޓުންނަށްވެސް އެބައޮތްކަމަށާއި އެޖާގަ ސަރުކާރުން ދޭނެކަމަށެވެ. ރައީސް ވަޑައިގަންނަވާއިރު އެކަމަށް ހުރަސް އަޅާ ފަރާތްތައް ފަހަތަށް ޖައްސަނީ ހަރުކަށިވުމަށް ނޫންކަމަށް އިމްރާން ވިދާޅުވިއެވެ.
އިމްރާން ވިދާޅުވީ މިސަރުކާރުގެ ފަސް އަހަރުގެ ތެރޭގައި ހާސިލުކޮށްފައިވާ ކަންކަމަށް ބަލާއިރު ދެ ވަނަ ދައުރެއް ރައީސް ޞާލިހަށް ހައްގުކަމަށެވެ.
