ރައީސް ވެރިކަން ކުރައްވާ ގޮތަށް ވެރިކަން ކުރެއްވޭނެ އެއްވެސް ކެންޑިޑޭޓަކު އިންތިޚާބަށް ކުރިމަތިނުލައްވާ: އިމްރާން

ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވެރިކަން ކުރައްވާ ގޮތަށް ވެރިކަން ކުރެއްވޭނެ އެއްވެސް ކެންޑިޑޭޓަކު މިފަހަރުގެ ރިޔާސީ އިންތިޚާބަށް ކުރިމަތިނުލައްވާ ކަމަށް އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެއެވެ.

ގދ. ގައްދޫގައި އަންގާރަ ދުވަހުގެ ރޭ ބޭއްވި "އުފާވެރި އަމާން ރާއްޖެ" ޖަލްސާގައި ވާހަކަފުޅު ދައްކަވަމުން އިމްރާން ވިދާޅުވީ ރައީސް ކެމްޕޭނެއްގައި ވައުދެއް ވެވަޑައިގަންފިނަމަ، އެ ވައުދެއް ރަނުން ރަނަށް ފުއްދަވާކަން އެއީ މިއަދު ފެންނަން އޮތް ހަޤީޤަތެއް ކަމަށެވެ.

ފާއިތުވި ފަސް އަހަރު ވެގެންދިޔަ ކަންތައްތަކަށް ފުންކޮށް ވިސްނާ ނަޒަރު ހިންގައިފިނަމަ، ރަށްތަކަށް ތަރައްޤީ މި ސަރުކާރުން ގެންނަކަން ވާދަވެރި ސިޔާސީ ޕާޓީތަކުގެ މީހުން ވެސް ޤަބޫލުކުރާ ކަމަށް އިމްރާން ވިދާޅުވިއެވެ.

ރައީސް ސާލިހުގެ ވެރިކަމަށްވުރެ ކުރިން އޭރުގެ ކޯލިޝަންތައް ރޫޅި ވިއްސިވިހާލިވެގެންދިޔައިރު ވެސް އަދާލަތު ޕާޓީ ކެތްކުރި ކަމަށް އިމްރާން ވިދާޅުވިއެވެ. އަދި އޭރު ކެތްކުރީ ވަރަށް އުނދަގުލުގައި ކަމަށް ވިދާޅުވިއެވެ.

އިމްރާން ވަނީ ގދ. މަޑަވެލި ކެމްޕެއިން ޖަލްސާ ސަރަހައްދުގައި ރޯކޮށްލައި، ތަނަށާއި ތަކެއްޗައް ގެއްލުން ދިނުމުން އެކަން ކުށްވެރި ކުރައްވާފައެވެ. އަދި މިއީ 2023 ވަނަ އަހަރު ރާއްޖޭގައި ސިޔާސީ ހަރަކާތް ހިންގަންޖެހޭ ގޮތެއް ނޫން ކަމަށާއި މިއަދު ރާއްޖޭގައި ސިޔާސީ މަސައްކަތް ކުރަންވާނީ އެންމެންނަށް ވެސް ސިޔާސީ މަސައްކަތް ކުރުމުގެ ޖާގަ އާއި މާހައުލުދީގެން ކަމަށް ވިދާޅުވިއެވެ.