ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަކީ މިހާރު ރިޔާސީ އިންތިޚާބުގައި ވާދަކުރައްވާ ކެނޑިޑޭޓުންގެ ތެރޭގައި ރާއްޖޭގައި ހުންނެވި ސިޔާސީ ތަޖުރިބާ އެންމެ ވަރުގަދަ ބެފުޅާ ކަމަށް އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

އިމްރާން އެފަދައިން ވިދާޅުވީ ހިންނަވަރުގައި ބޭއްވި އުފާވެރި އަމާން ރާއްޖެ ކެމްޕެއިން ޖަލްސާގައި ވާހަކަފުޅުދައްކަވަމުންނެވެ. އިސްލާހީ މަސައްކަތުގައި ރައީސް މަސައްކަތް ކުރައްވާފައި ވަނީ ހިކުމަތްތެރިކަމާއި ވިސްނުންތެރިކަމާއި އެކުގައި ކަމަށް އިމްރާން ވިދާޅުވިއެވެ. މީގެ އިތުރުން ރައީސް އިބްރާހީމް މުހައްމަދު ޞާލިހާއެކު 8 އަހަރު މަސައްކަތްކުރެއްވި އިރު ބާރު ސްޕީޑުގައި ހުރިހާ ރައްޔިތުންނަށްޓަކައި މަސައްކަތް ކުރައްވާ މަންޒަރު ފެނިވަޑައިގަތް ކަމަށް އިމްރާން ވިދާޅުވިއެވެ.

އިމްރާން ވިދާޅުވީ ރައީސް ޞާލިހު އަކީ އަތޮޅުތެރޭގެ އާދައިގެ ރަށަކަށް އުފަންވެވަޑައިގެން، އަތޮޅުތެރޭގެ ރައްޔިތުންގެ އިހުސާސްތައް ދެނެވަޑައިގެން ހުންނެވި ބޭފުޅެއް ކަމަށެވެ. އަދި މާލެ އަށް ވަޑައިގެން ތައުލީމް ހާސިލްކުރެއްވުމަށް ފަހު، އިގްތިޞާދީ އުފެއްދުންތެރިކަން އެންމެ ވަރުގަދަ އެއް އާއިލާއާ ގުޅިވަޑައިގެން ތަޖުރިބާ ހޯއްދެވިކަމަށެވެ. އަދި މަޖިލީހުގައި 25 އަހަރު ހޭދަކުރައްވާ ހޯއްދެވި ތަޖުރިބާ އަށް ފަހު ރައްޔިތުންގެ އިހުސާސްތައް އެނގިވަޑައިގަންނަވާނެ ކަމަށާއި ރައްޔިތުންނަށް ޚިދުމަތް ކުރައްވަން ރައީސަށް އެނގިވަޑައިގަންނަވާ ކަަމަށް އިމްރާން ވިދާޅުވިއެވެ.

މަޖިލީހުގެ ތިން ވަނަ ދައުރަކަށް މީހަކު ހޮވުމަކީ އުނދަނގޫ ކަމެއް ކަމަށާއި މަޖިލީހަށް ތަކުރާރުކޮށް ރައީސް ހޮވިވަޑައިގަތުމުން އެނގެނީ ރައީސް އަކީ ދުރުވިސްނޭ ބޭފުޅެއްކަން ކަމަށް އިމްރާން ވިދާޅުވިއެވެ. އިމްރާން ވަނީ ރައީސަށް ވަރަށް ބޮޑަށް ތައުރީފްކުރައްވާފައެވެ. އެގޮތުން ރައީސް އަކީ އޯގާތެރި ކެތްތެރި، ހިކުމަތްތެރި ވެރިއެއް ކަމަށް އިމްރާން ވަނީ ވިދާޅުވެފައެވެ. އަދި ރައީސަކީ ދުރުވިސްނޭ ބޭފުޅެއް ކަަމަށް ވެސް އިމްރާން ވިދާޅުވިއެވެ. އިމްރާން ވިދާޅުވީ މިހާރު ފެންނަ މަންޒަރުތަކުން ރައީސް ހޮވިވަޑައިގެންފައިވާކަން އެނގިވަޑައިގަންނަވާ ކަމަށެވެ. އަދި މިހާރު ތިބީ މިކަން ނިންމައިގެން ކަމަށާއި ރައީސް ޞާލިހު ހޮވާނީ އެއްބުރުން ކަމަށް އިމްރާން ވިދާޅުވިއެވެ.