ރާއްޖެ ތަރައްގީކުރެވޭނީ ތަބީއީ ގޮތުން ރާއްޖެ އުފެދިފައިވާގޮތާ އެއްގޮތަށް ތަރައްގީކުރަން އެނގޭ ވެރިއަކަށް: އިމްރާން
ރާއްޖެ ތަރައްގީވާނީ މާލޭގެ މަގުތަކާއި މާލޭގެ ގެދޮރު ބިނާ ކުރާ ފަދައިން އައްޑޫގެ ގެދޮރާއި މަގުތައް ބިނާކުރެވިގެންކަމަށް އިމްރާން ވިދާޅުވި
ހޯމް މިނިސްޓަރު އިމްރާން އަބްދުﷲ
ރާއްޖެ ތަރައްޤީކޮށް ރާއްޖޭގެ ރައްޔިތުންނަށް އުފާވެރިކަން ގެނެސްދެވޭނީ ގުދުރަތީގޮތުން ރާއްޖެ އުފެދިފައިވާ ގޮތާއި އޭގެ ނިޒާމާ އެއްގޮތަށް ތަރައްޤީގެ ޕްލޭންތައް ކުރަހާ ކުލައްޖައްސާ ތަންފީޒުކުރަން އެނގޭ ވެރިއަކަށްކަމަށް ހޯމް މިނިސްޓަރު އަދި އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެއެވެ.
ގދ ތިނަދޫގައި ބުދަ ދުވަހުގެ ރޭ ބޭއްވި "އުފާވެރި އަމާން ރާއްޖެ" ޖަލްސާގައި ވާހަކަފުޅު ދައްކަވަމުން އިމްރާން ވިދާޅުވީ 2018 ވަނަ އަހަރު ވެރިކަމަށް ވަޑައިގަންނަވަމުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ރައްޔިތުންނަށް ވެވަޑައިގެންނެވި ވައުދަކީ ކުޑަ ރަށެއް ބޮޑު ރަށެއް ބެއްލެވުމެއްނެތި ތަރައްޤީ ގެންނެވުންކަމަށެވެ. އެވައުދާ އެއްގޮތަށް މި ފަސް އަހަރުތެރޭގައި ފެނިގެންދަނީ ރާއްޖޭގެ ހުރިހާ ރަށަކަށްވެސް ތަރައްޤީ ގެންނަވަމުންދާތަންކަމަށް އިމްރާން ވިދާޅުވިއެވެ.
ރާއްޖެ ތަރައްޤީވާނީ މާލޭގެ މަގުތަކާއި މާލޭގެ ގެދޮރު ބިނާ ކުރާ ފަދައިން އައްޑޫގެ ގެދޮރާއި މަގުތައް ބިނާކުރެވިގެންކަމަށް އިމްރާން ވިދާޅުވިއެވެ. އަދި ކުޅުދުއްފުށި ބިނާކުރާ ފަދައިން ތިނަދޫ ބިނާކޮށް ކުޅުދުއްފުއްޓާއި ތިނަދޫ ސިޓީގައި އުޅޭ ރައްޔިތުންނަށް އުފާވެރިކަން ގެނެސްދޭ ފަދައިން މ ރަތްމަންދޫ އާއި ވ ރަކީދޫގައި ދިރިއުޅޭ މީހުންނަށްވެސް ހިތްހަމަޖެހުން ގެނެސްގެންކަމަށް އިމްރާން ވިދާޅުވިއެވެ.
އިމްރާން ވިދާޅުވީ ކުރިޔަށް އޮތް ރިޔާސީ އިންތިޚާބުގައި ކަންކަން ކޮޕީކުރައްވާ ކެންޑިޑޭޓެއް އެބައުޅުއްވާކަމަށެވެ.
އިމްރާން ވިދާޅުވީ ލާމަރުކަޒީ ވިސްނުން ހަޖަމުނުކުރެވޭ ލާމަރުކަޒީ ވިސްނުމާއި ޚިޔާލު ނެތްބަޔަކަށް ރާއްޖޭގެ 187 ރަށް ތަރައްގީނުކުރެވޭނެކަމަށެވެ. 2018 ވަނަ އަހަރު މިސަރުކާރު ވެރިކަމާ ހަވާލުވިއިރު ލާމަރުކަޒީ ނިޒާމު އޮތީ ދިރިހުއްޓާ ކަފުންކޮށް ވަޅުލަން ތައްޔާރުކޮށްފައިކަމަށް އިމްރާން ވިދާޅުވިއެވެ. މިމަސައްކަތުގައި އޭރު އެންމެ އިސްކޮށް ހުންނެވީ މިހާރުގެ ޕީއެންސީގެ ރިޔާސީ ކެންޑިޑޭޓްކަމަށް އިމްރާން ވިދާޅުވިއެވެ.
