ފުލުހުންނަށްވެސް އައްބާސް ހާޒިރެއް ނުކުރެވުނު، މިއަދުވެސް ޗިޓް ރައްދު ނުކުރެވޭތީ ކެންސަލް
އޭނާއަށް ޗިޓް ހަވާލު ނުކުރެވިގެން މީގެ ކުރިންވެސް އެތައް ފަހަރަކު އަޑުއެހުންތައް ކެންސަލްވެފައިވޭ
ކޯޓު އަމުރާ ގުޅިގެން ހޯދަމުންދާ ކ. މާލެ / ހ. ނޫކުރިކީލަ، ޢައްބާސް ޢާދިލް ރިޟާ (45އ)
ރާއްޖޭގައި ހުންނަ އިންޑިއާގެ ހައިކޮމިޝަންގައި ހުޅުޖެހުމަށް ގޮވާލުމުގެ ތުހުމަތުގައި ދައުލަތުން ދައުވާ އުފުލާފައިވާ, އިދިކޮޅު ޕީޕީއެމްގެ އެކްޓިވިސްޓް ކ. މާލެ / ހ. ނޫކުރިކީލަ، ޢައްބާސް ޢާދިލް ރިޟާ (45އ) ޝަރީއަތަށް ހާޒިރު ނުކުރެވިގެން އަނެއްކާވެސް އެ މައްސަލައިގެ އަޑުއެހުން ކެންސަލްވެއްޖެއެވެ.
އޭނާ ޝަރީއަތަށް ހާޒިރު ނުކުރެވިގެން އެންމެ ފަހުން އޭނާ ބަންދުގައި ބަހައްޓައިގެން ކޯޓަށް ހާޒިރުކުރަން ފުލުހުން އިއުލާނު ކުރީ 23 މެއި 2023 ގައެވެ. އެއީ ދައުލަތުން ދަޢުވާކުރާ ފަނާކޮށްފާނެކަމުގެ ބިރު ދެއްކުމުގެ ކުށުގެ މައްސަލައާ ގުޅިގެން ކޯޓަށް ހާޒިރުކުރަން ބޭނުންވެ ހާޒިރުކުރެވިފައިނުވާތީ ފުލުހުންގެ ބަންދުގައި ބަހައްޓައިގެން 2023 މެއި 23 ވަނަ ދުވަހު 14:30 އަށް ކްރިމިނަލް ކޯޓަށް ހާޒިރުކުރުމަށް ކޮށްފައިވާ އަމުރާ ގުޅިގެންނެވެ.
އެހެންނަމަވެސް އެ ދުވަހުގެ އަޑުއެހުމަށް ފުލުހުންނަށްވެސް އޭނާ ހާޒިރު ކުރެވިފައެއް ނުވެއެވެ.
އޭގެ ދުވަސްތަކެއް ފަހުން ހޯމަ ދުވަހުވެސް މި މައްސަލައިގެ އަޑުއެހުމެއް ކްރިމިނަލް ކޯޓުގައި ތާވަލުކުރިއެވެ. ނަމަވެސް އޭނާއަށް ޗިޓް ރައްދުކޮށް ނުދެވޭތީ މި އަޑުއެހުންވެސް ކުރިއަކަށް ނުގެންދެވެއެވެ.
އެނގިފައިވާ ގޮތުގައި ޗިޓް ހިފައިގެން ދިޔައިރު ފޯނު ނުނަގާތީއާއި، ގެ ތަޅުލާފައި ހުރުމުން މިފަހަރުވެސް ޗިޓް ރައްދުކުރެވޭ ގޮތެއް ނުވިއެވެ.
އޭނާ ދިރިއުޅޭ ވަކި ތަނެއް ނޭނގޭތީ އޭނާއަށް ޗިޓް ހަވާލު ނުކުރެވިގެން މީގެ ކުރިންވެސް އެތައް ފަހަރަކު އަޑުއެހުންތައް ކެންސަލްވެފައިވެއެވެ.
އޭނާގެ މައްޗަށް ދައުވާ އުފުލާފައިވަނީ, ޑިސެންބަރު 2022ގައި، ސޯޝަލް މީޑިއާ ޕްލެޓްފޯމެއް ކަމަށްވާ "ކްލަބްހައުސް" ގައި ވާހަކަ ދައްކަމުން، ކުރީގެ ރައީސުލްޖުމްހޫރިއްޔާ ޢަބްދުﷲ ޔާމީން އަބްދުލްގައްޔޫމްގެ މައްޗަށް ތުހުމަތުކުރެވޭ މަނީ ލޯންޑަރިންގެ މައްސަލައެއްގެ ޝަރީއަތް ކްރިމިނަލް ކޯޓުގައި ކުރިއަށްދާ ގޮތާމެދު ހިތްހަމަނުޖެހިގެން، ޕެޓްރޯލާއި ގާބުރިފަދަ ތަކެތި ހޯދައި، މާލޭގެ އެކި ތަންތަނުގައި ހުޅުޖަހައި، ހަމަނުޖެހުން ހިންގުމަށް ހިތްވަރުދީފައިވާތީއެވެ.
އަދި، 23 ޑިސެންބަރު 2022 ދުވަހު، އޭނާ ބޭނުންކުރާ ޓުވިޓަރ އެކައުންޓުން، ރާއްޖޭގައި ހުންނަ އިންޑިއާގެ ހައި ކޮމިޝަނަށް ނިސްބަތްކޮށް، އިންޑިއާ އެމްބަސީގައި ހުޅުޖެހުމަށް ގޮވާލައި ޓްވީޓްކޮށްފައިވެސްވެއެވެ.
އޭނާގެ މައްޗަށް ކުށް ސާބިތުވެއްޖެނަމަ 1 އަހަރާއި 7 މަހާއި 6 ދުވަހުގެ ޖަލުގެ ހުކުމެއް އަންނާނެއެވެ.
މި މައްސަލައިގައި ފުލުހުން ވަނީ އޭނާ ހައްޔަރުވެސް ކޮށްފައެވެ. އެހެންނަމަވެސް ފަހުން އޭނާ ވަނީ ދޫކޮށްލާފައެވެ.
