ކޮކެއިން ހުރި ފޮއްޓާ ޙަވާލުވާން ދިޔަ މީހާ އުމުރަށް ޖަލަށް

މަސްތުވާތަކެތި ފޮރުވާފައި ހުރި ފޮއްޓަކާ ޙަވާލުވާން ދިޔަ މީހަކު އުމުރަށް ޖަލަށްލާން ކްރިމިނަލް ކޯޓުން ޙުކުމްކޮށްފިއެވެ.

މި މައްސަލައިގައި ދައުލަތުން ދައުވާ ކޮށްފައިވަނީ ރ މަޑުއްވަރީ މިރިހިމާގޭ ޙަސަން އިބްރާހީމްގެ މައްޗަށެވެ.

އޭނާގެ މައްޗަށް އުފުލާފައިވަނީ ޖަދުވަލު 1 ގައިވާ މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާއެވެ.

އޭނާގެ މައްޗަށް ދައުވާ ކޮށްފައިވަނީ 3 މެއި 2022 ގައި ތުރުކީގެ ރައްޔިތަކު ރާއްޖެއަށް ގެނައި ލަގޭޖެއްގައި މަސްތުވާތަކެތި ހުރުމުން، އެ ލަގޭޖާ ޙަވާލުވާ މީހަކު ބެލުމަށް ފުލުހުންގެ ހިންގި ކޮންޓްރޯލް ޑެލިވަރީ އޮޕަރޭޝަނަކަށްފަހުއެވެ. އެގޮތުން އޭނާއަކީ މަސްތުވާތަކެތި ހުރި ލަގޭޖާ ޙަވާލުވާން އައި މީހާއެވެ.

ދައުވާގައި ބުނެފައިވާ ގޮތުގައި އެ ލަޖެޖުން 4 ކިލޯގެ މަސްތުވާތަކެތި ވަނީ ފެނިފައެވެ.

ކޮންޓްރޯލް ޑެލިވަރީ އޮޕަރޭޝަން ހިންގި ފުލުހުންގެ ހެކިބަހަށް ބަލާއިރު، ފުލުހުން ވަނީ ތުރުކީގެ ރައްޔިތު މީހާ ގެސްޓްހައުސްއަކަށް ގެންގޮސް، މަސްތުވާތަކެތި ހުރި ފޮއްޓާ ގުޅޭގޮތުން އެމީހާ ވަޓްސްއަޕް މެދުވެރިކޮށް މުއާމަލާތު ކުރާ މީހާއާ މުއާމަލާތް ކުރުވާފައެވެ.

އޭގެ ފަހުން ދައުވާލިބޭ ޙަސަން އިބްރާހިމް ވަނީ ތުރުކީގެ ރައްޔިތު މީހާ ހުރި ގެސްޓުހައުސްއަށް ގޮސް، "މައިކަލް" ކަމަށް ބުނެ ތައާރަފްވެ، އޭނާއަތަށް ފައިސާ ދީފައެވެ. އަދި މަސްތުވާތަކެތި ހުރި ފޮށި ހިފައިގެން ނުކުންނާން ދިޔަ ވަގުތު އެތަނުގައި ފިލާ ތިބި ފުލުހުން ވަނީ ނުކުމެ އޭނާ ހައްޔަރުކޮށްފައެވެ.

އޭރުވެސް ވަޓްސްއަޕުން ތުރުކީގެ ރައްޔިތު މީހާއަށް މަސްތުވާތަކެއްޗާ ގުޅޭގޮތުން މެސެޖު ކުރަމުންދިޔަ މީހާ ދިޔައީ ހުއްޓުމެއްނެތި މެސެޖު ކުރަމުންނެވެ.

ފުލުހުން ބުނެފައިވާ ގޮތުގައި އެތަކެތީގެ އަސްލު ވެރިފަރާތް ހޯދުމަށް ފުލުހުންނަށް އޭނާ އެއްބާރުލުން ދީފައެއް ނުވެއެވެ. އަދި އެ ފޮއްޓާ އޭނާ ޙަވާލުވި ސަބަބެއް ބުނެދެވިފައިނުވާކަމަށް ހެކިބަސް ދިން ފުލުހުން ބުނެފައިވެއެވެ.

ތުރުކީ މީހާގެ މޯބައިލް ފޮރެންސިކް ރިޕޯޓަށް ބަލާއިރު، މަސްތުވާތަކެއްޗާ ގުޅޭގޮތުން ވަޓްސްއަޕުން ތުރުކީ މީހާއާ މުއާމަލާތު ކުރި މީހާ ވަނީ އެ ފޮށި އެއްތަނުން އަނެއްތަނަށް ގެންދިއުމާ ގުޅޭ އިރުޝާދު ދީފައެވެ. އެގޮތުން ފޮށި ބަލައި މައިކަލް ކިޔާ މީހަކު އަންނާނެކަމާއި، އޭނާ ހުންނަ ހޮޓަލަކަށް މައިކަލް ކިޔާ މީހާ އައުމުން، ފޮށި ޙަވާލު ކުރުމަށް އިރުޝާދު ދީފައިވެއެވެ.

ޙަސަން އިބްރާހިމްގެ މޯބައިލް ފޮރެންސިކް ރިޕޯޓަށް ބަލާއިރު، މަސްތުވާތަކެތިކަމަށް ޝައްކު ކުރެވޭ އެއްޗެއް ހުރި ފޮޓޯތަކާއި ވީޑިއޯތަކުގެ އިތުރުން، "މުޅި އުމުރު މި ހޭދަކުރަނީ ރިސްކުގައި" ކަމަށް ބުނެ މީހަކަށް ކޮށްފައިވާ މެސެޖުތަކެއް ފެނިފައިވެއެވެ.

އަދި އޭނާ ވަރަށް އަވަހަށް ތައްޔާރުވެގެން ގެސްޓްހައުސްއަށް ގޮސް، ފޮއްޓާ ޙަވާލުވުމަށް މީހަކު އޭނާއަށް އިރުޝާދު ދީފައިވާ މެސެޖުތަކެއްވެސް ފެނިފައިވެއެވެ.

ދައުވާއަށް ޖަވާބުދާރީވަމުން ޙަސަން އިބްރާހިމް ބުނެފައިވަނީ އޭނާއަށް ފޮށީގައި ހުރީ މަސްތުވާތަކެތިކަމެއް ނޭނގޭ ކަމަށެވެ. ނަމަވެސް އޭނާ ދިފާއުގައި އެއްވެސް ހެއްކެއްވެސް ހުށައަޅާފައެއް ނުވެއެވެ.

ދައުވާ ސާބިތު ކުރުމަށް ދައުލަތުން 13 ޝަފަހީ ހެއްކެއް ހުށައެޅިއެވެ.

ޙުކުމުގައި ބުނެފައިވާ ގޮތުގައި ޙަސަން އިބްރާހިމް ފޮއްޓާ ޙަވާލުވާން ގޮސްފައިވަނީ އޭނާ ދަންނަ ފަރާތެއްގެ އެދުމުގެ މަތިންކަން ހެކިތަކުން އެނގެއެވެ. ނަމަވެސް އެއީ ކޮން ފަރާތެއްކަމެއް ތަހުގީގަށް ހޯދިފައެއް ނުވެއެވެ.

ހަމައެއާއެކު، ފުލުހުންގެ ތަހުގީގުގައި އޭނާ ގެސްޓްހައުސްއަށް ދިޔައީ އީދާ ދިމާކޮށް ހުޅުމާލޭގައި މަޑުކޮށްލުމަށް ކަމަށް ބުނެ ދޮގު ހަދާފައިވެއެވެ.

އޭނާ އެގޮތަށް ހަގީގަތް އޮޅުވާލާފައިވަނީ ގޯސް ނިޔަތެއް އޮވެގެންކަން ޝަރީއަތަށް ޤަބޫލު ކުރެވޭކަމަށް ގާޒީ ވިދާޅުވިއެވެ.

ގާޒީ ވަނީ މި މައްސަލައިގައި ހުށައެޅިފައިވާ ހެކި ޤަރީނާއަށް ބަލާއިރު، އޭނާގެ މައްޗަށް އުފުލާފައިވާ ދައުވާ އެކަށީގެންވާ ޝައްކެއް ނެތް މިންވަރަށް ސާބިތުވާކަމަށް ޙުކުމް ކުރައްވާފައެވެ.

ގާޒީ ވަނީ އޭނާ އުމުރަށް ޖަލަށް ލުމާއެކު، އެއްލައްކަ ރުފިޔާއިން ޖޫރިމަނާ ކުރުމަށް ޙުކުމް ކުރައްވާފައެވެ.

ކްރިމިނަލް ކޯޓުގައި މި މައްސަލަ ނިންމެވީ ގާޒީ އިސްމާއިލް ޝަފީއުއެވެ.