ރާއްޖޭގެ ޖުމްލަ ގޭބިސީގެ ތެރެއިން 1065 ގޭބިސީ ނުވަތަ ރާއްޖޭގައި ދިރިއުޅޭ އާބާދީގެ 1 އިންސައްތަ މީހުން ދިރިއުޅެނީ ދިރިއުޅުމަށް އެކަށޭނެ ތަންތަނެއްގައި ނޫންކަމަށް ބޯހިމެނުމުގެ ރިޕޯޓުން ހާމަވެއްޖެއެވެ.

2022 ވަނަ އަހަރު ރާއްޖޭގައި ކުރިޔަށްގެންދިޔަ ބޯހިމެނުމުގެ ރިޕޯޓް އާންމުކޮށްފައިވާއިރު ރާއްޖޭގައި 94،424 ގޭބިސީ ގައި މީހުން ދިރިއުޅެއެވެ. އޭގެތެރެއިން 42،571 ގޭބިސީ ދިރިއުޅެނީ މާލޭގައެވެ. އަދި 51،853 ގޭބިސީ ދިރިއުޅެނީ ރަށްރަށުގައެވެ.

ރާއްޖޭގައިވާ ޖުމްލަ ގޭބިސީގެ ތެރެއިން 81744 ގޭބިސީ ދިރިއުޅެމުން ދަނީ ގެ ނުވަތަ ފްލެޓް ނުވަތަ އެޕާޓްމަންޓުތަކުގައެވެ. އެއީ އާބާދީގެ 74 އިންސައްތަ އެވެ.

އެވްރެޖުކޮށް ގޭބިސީއެއްގައި 4.7 މީހުން ދިރިއުޅެމުންދެއެވެ. މާލޭގައި އެވްރެޖްކޮށް ގޭބިސީއެއްގައި 4.5 މީހުން ދިރިއުޅެއެވެ. ރަށްރަށުގައި އުޅެނީ 4.8 މީހުންނެވެ. 2014 ވަނަ އަހަރުގެ ބޯހިމެނުމުގައި އެވްރެޖުކޮށް ގޭބިސީއެއްގައި އުޅެނީ 5.2 މީހުންނެވެ.

ރާއްޖޭގައި މިވަގުތު ދިރިއުޅޭ ޖުމްލަ އާބާދީ އަކީ 515،132 މީހުންނެވެ.