އާބާދީގެ ނިސްބަތުން މިހާރު ބޮލަކަށް 140،000 ރުފިޔާގެ ދަރަންޏެއް ޖެހޭ: ޣަފޫރު
ސަރުކާރުން ނަގާފައިވާ ދަރަނީގެ އަދަދު ޚުދު ސަރުކާރަށްވެސް ނޭނގޭ
މެންބަރު ޣަފޫރު މިރައީސް ޕްރޮގްރާމްގައި ވާހަކަ ދައްކަވަނީ
ސަރުކާރުން ނަގާފައިވާ ދަރަނީގެ އަދަދު ޚުދު ސަރުކާރަށްވެސް ނޭނގޭ ކަމަށާއި އާބާދީގެ ނިސްބަތުން ދިވެހި ކޮންމެ ރައްޔިތެއްގެ ބޮލަކަށް 140,000 ރުފިޔާގެ ދަރަންޏެއް ޖެހޭ ކަމަށް ރައްޔިތުންގެ މަޖިލީހުގެ ކުޅުދުއްފުށީ އުތުރު ދާއިރާގެ މެންބަރު ޢަބްދުލް ޣަފޫރު މޫސާ ވިދާޅުވެއްޖެއެވެ.
ޣަފޫރު މިހެން ވިދާޅުވީ ރާއްޖެ ޓީވީން ހުކުރު ދުވަހުގެރޭ ގެނެސްދިން "މިރައީސް" ޕްރޮގްރާމްގައި ވާހަކަ ދައްކަވަމުންނެވެ.
މިއަހަރަށް ރައްޔިތުންގެ މަޖިލީސް ހުޅުވައިދެއްވުމުގެ ގޮތުން ރައީސް ޔާމީން އިއްވެވި ރިޔާސީ ބަޔާނަށް ފާޑު ވިދާޅުވަމުން ޣަފޫރު ވިދާޅުވީ ރައީސް ޔާމީންގެ ރިޔާސީ ބަޔާނަކުން ރައްޔިތުންނަށް އުފާވެރިކަމެއް، އުއްމީދެއް ލިބިގެން ނުދިޔަ ކަމަށެވެ. އެއާ ޚިލާފަށް ރައްޔިތުންނަށް ލިބެނީ މާޔޫސްކަމާއި ނިކަމެތިކަން ކަމަށް ޣަފޫރު ވިދާޅުވިއެވެ. އެކަމުގެ އެއް ސަބަބެއްގެ ގޮތުގައި ޣަފޫރު ވިދާޅުވީ ރާއްޖޭގެ ދަރަނި އިންތިހާއަށް ބޮޑުވެ ރައްޔިތުންގެ ބޮލުގައި ބޮޑު ދަރަންޏެއް އެޅިފައިވުން ވުމެވެ.
"އާބާދީގެ ނިސްބަތުން ކޮންމެ ބޮލަކަށް 140,000 ރުފިޔާ މިއަދު ވަނީ ޖެހިފައި. މިހެންވާން ޖެހެނީ ސަރުކާރުން ނަގާ ބޮޑު ލޯނުގެ ސަބަބުން. ޚުދު ސަރުކާރަށް ވެސް ނޭނގޭ ސަރުކާރުން ނަގާފައިވާ ދަރަނީގެ އަދަދު. ދެވިފައިވާ ސޮވެރިން ގެރެންޓީގެ އަދަދު ނޭނގޭ ހަމަ އެއްގޮތަކަށް ވެސް. މިއީ ރައްޔިތުންގެ ބޮލުގައި އެޅެމުންދާ ބޮޑު ދަރަންޏެއް. މިދަރަނިން ރައްޔިތުން ސަލާމަތް ކުރުމަށް ޓަކައި އަޅުގަނޑުމެން މަސައްކަތްކުރަން އެބަޖެހޭ" ޣަފޫރު ވިދާޅުވިއެވެ.
ރައީސް ޔާމީން މިއަހަރަށް އިއްވެވި ރިޔާސީ ބަޔާނާ ގުޅޭގޮތުން ޣަފޫރު ވިދާޅުވީ ރިޔާސީ ބަޔާނަކީ އެއްވެސް އަމާޒެއް ނެތް އަދި އެއްވެސް ކަހަލަ އޮއްޓަރެއް ނެތް ބަޔާނެއް ކަމަށެވެ. ރައީސް ޔާމީންގެ ރިޔާސީ ބަޔާނުގައި އެ ވިދާޅުވިހާ ކަންތައް ތަކެއް މި ޤައުމުން ނުފެންނަ ކަމަށް ޣަފޫރު ވިދާޅުވިއެވެ.
