މާފުށިން ފެންނަ އުފާވެރިކަން ލިބެނީ ރާއްޖޭގައި އޮތް އަމާންކަމުގެ ސަބަބުން - ރައީސް
އެ ރަށުގެ ގެސްޓް ހައުސްއާއި ތަރައްގީގެ މަޝްރޫއުތައް ކުރިއަށް ގެންދެވެނީ ރާއްޖޭގައި އޮތް އަމާންކަމުގެ ސަބަބުން ކަމަށް ރައީސް ވިދާޅުވި
ރައީސް ސާލިހު ޖަލްސާގައި ވާހަކަފުޅުދައްކަވަނީ
އެންމެ މުހިންމު އަމާޒަކީ އާ ޒުވާނުންނަށް ފުރުސަތު ހުޅުވާލުން ކަމަށް ރައީސް އިބްރާހީމް މުހައްމަދު ސާލިހު ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ "އުފާވެރި އަމާން" ކެމްޕެއިން ޖަލްސާގައި ވާހަފުޅުދައްކަވަމުންނެވެ.
ރައީސް ވިދާޅުވީ ކުރިއަށް އޮތް ދައުރަށް ކުރިމަތިލައްވަނީ ވައުދުތަކަކާއި އަމާޒަކާއެކުގައި ކަމަށެވެ. އެގޮތުން އެންމެ މުހިންމު ކަމަކީ އާ ޒުވާނުންނަށް ކަންކަމުގައި ބަސްބުނުމުގެ ފުރުސަތު މިހާތަށްވުރެ ބޮޑަށް ދެއްވުންކަމަށް ރައީސް ވިދާޅުވިއެވެ. އިތުރަށް ރައީސް ވިދާޅުވީ ރާއްޖޭގެ ކަންކަމުގައި ބަސްބުނުމުގެ ފުރުސަތު މިހާރަށްވުރެ ބޮޑަށް ޒުވާނުންނަށް ދިނުމަކީ އެމަނިކުފާނުގެ އަމާޒެއް ކަމަށެވެ. ދިވެހިންނަކީ ވިސްނުންތެރި، ހޭލުންތެރި، މަަސައްކަތްތެރި ބައެއްކަމަށާއި، ބޭނުން ވަނީ އެ މަސައްކަތް ކުރާނެ ޖާގަ ހޯދައިދިނުން ކަމަށް ރައީސް ވިދާޅުވިއެވެ. ސަރުކާރުގެ މަގުސަދަކަށް ވާންވާނީ އެކަން ކަމަށް ރައީސް ވިދާޅުވިއެވެ. ސަރުކާރުން ބޭނުންވާ އަސާސީ ޚިދުމަތާއި އިންފްރާސްޓްރަކްޗަރ ގާއިމްކޮށްދިނުމުގެ މަސައްކަތް ކުރަމުންދިޔައީ ތަފާތުކުރުމެއް ނެތި ކަމަށްވެސް ރައީސް ވަނީ ވިދާޅުވެފައެވެ. މީގެ އިތުރުން، މި ވެރިކަން ނިމޭއިރު ފެނާއި ނަރުދަމާގެ ޚިދުމަތް ހުރިހާ ރަށެއްގައި ނިމެމުންދާކަމަށް ރައީސް ވިދާޅުވިއެވެ. ރައީސް ވަނީ މާފުއްޓާއި ރާއްޖޭގެ އެހެން ހިސާބުތަކަށް ވީ ވައުދުތަކުގެ %90 ނިންމީ ދިމާވި ދަތިތަކާއި އެކުގައި ކަމަށް ވިދާޅުވެފައެވެ.
މީގެ އިތުރުން މާފުށިން ފެންނަ އުފާވެރިކަން ލިބެނީ ރާއްޖޭގައި އޮތް އަމާންކަމުގެ ސަބަބުންކަމަށް ވެސް ރައީސް ވިދާޅުވިއެވެ. އެ ރަށުގެ ގެސްޓް ހައުސްއާއި ތަރައްގީގެ މަޝްރޫއުތައް ކުރިއަށްގެންދެވެނީ ރާއްޖޭގައި އޮތް އަމާންކަމުގެ ސަބަބުން ކަމަށް ރައީސް ވިދާޅުވިއެވެ. އެމްޑީޕީގެ ވެރިކަމާއެކު މިއަދު ރައްޔިތުންނަށް އިހުސާސްކުރެވެނީ އުފާވެރިކަން ކަމަށް އެމަނިކުފާނު ވިދާޅުވިއެވެ. މީގެ އިތުރުން ރައީސް ވަނީ އެ ރަށުން ރައީސަށް ދެންނެވި ހޫނު މަރުހަބާއަށްޓަކައި ޝުކުރު އަދާކުރައްވާފައެވެ. މާފުށީ ރައްޔިތުން ތިބީ ބޭނުންވާ އުފާވެރި އަމާން ރާއްޖެއަށް ދާން ތައްޔާރަށްކަން ބުރާސްފަތި ދުވަހު ފެނުނު މަންޒަރުތަކުން އެނގިވަޑައިގެންފައި ވާކަމަށް ރައީސް ވަނީ ވިދާޅުވެފައެވެ.
މާފުށީގައި މިހާރު ކުރަމުންދާ މަސައްކަތްތަކާއި ކުރިއަށް ރޭވިފައި ހުރި މުހިންމު ކަންކަމަށް ރައީސް އަލިއަޅުވާލެއްވިއެވެ. ރައީސް ވަނީ ރައްޔިތުން އެދުނު ގޮތަށް މާފުށީގެ ބިން ކައުންސިލާ ހަވާލުކޮށް، އެ ބިން މާފުއްޓާ ގުޅުވާލުމުގެ މަސައްކަތް ކުރިއަށްދާ ކަމަށެވެ. އަދި މާފުށީގެ ބަނދަރު ބޮޑުކުރުމުގެ މަސައްކަތަކީ އެރަށަށް ލިބޭ ކުރިއެރުމެއް ކަމަށް ރައީސް ވިދާޅުވިއެވެ. މީގެ އިތުރުން ސިއްހީ މަރުކަޒަށް ބަދަލުތައް ގެނެސް، އެ ތަނުން ކުރިން ނުލިބޭ ޚިދުމަތްތައް ލިބޭނެ އިންތިޒާމް ހަމަޖައްސައިދީފައި ވާކަމަށްވެސް ރައީސް ވިދާޅުވިއެވެ. އަދި ރަށުގެ ސިއްހީ މަރުކަޒު ހޮސްޕިޓަލަކަށް ބަދަލުކޮށްފައިވާކަން ރައީސް ވަނީ ފާހަގަކުރައްވާފައެވެ.
