ރައީސް ސާލިހު މާފުއްޓަށް، މިރޭ ޖަލްސާ އޮންނާނެ
ގުޅިއާއި ގުރައިދޫއިން ވެސް އެމަނިކުފާނަށް ވަނީ ހޫނު މަރުހަބާއެއް ދަންނަވާފައި
ރައީސް ސާލިހު މާފުއްޓަށް ވަޑައިގެންނެވުން
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ކ. މާފުއްޓަށް ވަޑައިގެންފިއެވެ.
ކ އަތޮޅަށް މިހާރު އެމަނިކުފާނު ކުރައްވަމުންގެންދަވާ ދަތުުރުފުޅުގައި އެންމެ ފުރަތަމަ ވަޑައިގެންފައިވަނީ ކ. ގުޅިއަށެވެ. ދެވަނައަށް ވަޑައިގެންނެވީ ގުރައިދޫއަށެވެ. އަދި ބުރާސްފަތި ދުވަހުގެ ހަވީރުގެ ވަގުތުގައި ވަޑައިގެންފައިވަނީ މާފުއްޓަށެވެ. އެއް ދުވަހުގެ މުއްދަތަކަށް ކުރައްވާ މިދަތުރުފުޅުގައި ބުރާސްފަތި ދުވަހުގެ ރޭ 20:30ގައި މާފުށީގައި އެމްޑީޕީގެ ޚާއްސަ ޖަލްސާއެއް އޮންނާނެއެވެ.
މާފުށީގެ އިތުރުން ގުޅިއާއި ގުރައިދޫއިން ވެސް އެމަނިކުފާނަށް ވަނީ ހޫނު މަރުހަބާއެއް ދަންނަވާފައެވެ.
ރައީސް ގުޅިއަށް ވަޑައިގެން، އެރަށުގައި އެމްޑީޕީގެ ޖަގަހަ ރަސްމީކޮށް ހުޅުވައިދެއްވިއެވެ. އަދި އެމަނިކުފާނު ގުޅީގެ ރައްޔިތުންނާއެކު ކަންމަތީ ޖަލްސާއެއްގައި ބައިވެރިވެވަޑައިގެންނެވިއެވެ. މި ބައްދަލުކުރެއްވުމުގައި ރަށުގެ ރައްޔިތުން ބޭނުންވާ ކަންކަން ރަށުގެ ރައްޔިތުންގެ ފަރާތުން އެމަނިކުފާނު އޮޅުންފިލުއްވިއެވެ. މީގެ އިތުރުން ގުރައިދޫއަށް ވަޑައިގަންނަވައި، އެރަށުގެ ރައްޔިތުންނާވެސް ރައީސް ސާލިހު ވަނީ ބައްދަލުކުރައްވާފައެވެ. ރައީސް ވިދާޅުވީ ގުރައިދޫ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކޮށްދެއްވާނެ ކަމަށާއި، ރައްޔިތުންނަށް ގޯތި ދެއްވާނެ ކަމަށެވެ.
ގުރައިދޫގައި ބޭއްވި ކަންމަތީ ޖަލްސާގައި ގިނަ އަދަދެއްގެ އާއްމުން ވަނީ އެމްޑީޕީއަށް ސޮއިކޮށް، ރައީސް ސާލިހު އަތްޕުޅަށް ފޯމްތައް އަރުވާފައެވެ.
