ވެރިކަމުގައި ތިބޭ ބަޔަކު މުޒާހަރާ އަށް ނުކުންނަން ޖެހުނީމަ އެއީ ވިސްނަން ޖެހޭ ސިޔާސަތެއް ކަމަށް ރައީސް ޞާލިހު ވިދާޅުވެއްޖެ
13 ޖުލައި 2023 | ބުރާސްފަތި 09:30މިއަދު ގުޅީގެ އެމްޑީޕީގެ ޖަގަހަ ހުޅުވާދެއްވި
ރައީސް އިބްރާހިީމް މުޙައްމަދު ސާލިޙު
ވެރިކަމުގައި ތިބޭ ބަޔަކު މުޒާހަރާ ކުރަން ނުޖެހޭ ކަމަށާއި އެއީ ވިސްނަން ޖެހޭ ސިޔާސަތެއް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރައީސް އެފަދައިން ވިދާޅުވީ ކ.އަތޮޅު ގުޅި އަށް އެމަނިކުފާނު ކުރައްވަމުން ގެންދަވާ ދަތުރުފުޅުގެ ތެރެއިން އެ ރަށުގެ އެމްޑީޕީގެ ކަންމަތީ ބައްދަލުވުމުގައި ވާހަކަފުޅުދައްކަވަމުންނެވެ.
ވެރިކަމުގައި ތިބެ މުޒާހަރާ އަށް ނުކުންނަން ޖެހުނީމަ އެއީ ވިސްނަން ޖެހޭ ކަމެއް ކަމަށާއި އެ ސިޔާސަތާއި މެދު ވިސްނަން ޖެހޭ ކަމަށް ރައީސް ޞާލިހު ވިދާޅުވިއެވެ. އެ ދުވަސް ވެސް މިއަދު މާޒީ ވެފައިވާ ކަމަށް ރައީސް ވިދާޅުވިއެވެ.
ރާއްޖޭގެ ސިޔާސީ މަސްރަހު އޮތީ އައު ފަސް އަހަރަށް ތައްޔާރުވެފައިވާ ކަމަށް ވާއިރު ސަރުކާރާއި ހަވާލު ކުރި ކަންކަން ރަނގަޅަށް ކުރަމުންދާ ކަމަށް ރައީސް ވިދާޅުވިއެވެ.
ސަރުކާރާއި ހަވާލުވެވަޑައިގެންނެވިއިރު އެންމެ އުނދަނގޫކަމަކަށް ވީ އަސާސީ ޚިދުމަތްތައް ލިބެން ނެތުން ކަމަށް ރައީސް ވިދާޅުވިއެވެ. ވަޑައިގަންނަވާ ކޮންމެ ރަށަކުން އިވިވަޑައިގަތީ ސިއްޙީ ޚިދުމަތް ނުލިބޭ ވާހަކަ އާއި ތައުލީމް ރަށުން ނުލިބޭ ވާހަކަ އާއި ފެނާއި ނަރުދަމާގެ ޚިދުމަތް ނުލިބޭ ވާހަކަ ކަމުގައި އެމަނިކުފާނު ވިދާޅުވިއެވެ. އެފަދަ ޒަރޫރީ ބޭނުންތައް ކުރިން ސަރުކާރަކުން ގެނެސް ނުދެވޭ ކަމަށް ރައީސް ވިދާޅުވިއެވެ. އެހެންކަމުން އެންމެ އިސް ވާޖިބެއް ކަމަށް ހެެއްދެވީ އެ އަސާސީ ޚިދުމަތްތައް ތަފާތުކުރުމެއް ނެތި ދިނުން ކަމަށް ވެސް ރައީސް ވިދާޅުވިއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގުޅި އަށް ވަޑައިގަންނަވާފައި ވަނީ މިއަދު މެންދުރު ފަހުގެ ވަގުތެއްގައެވެ. މި ދަތުރުފުޅަކީ ކ.އަތޮޅުގެ ތިން ރަށަކަށް ރައީސްކުރައްވާ ދަތުރުފުޅެކެވެ. މި ދަތުރުފުޅުގެ ތެރެއިން ކަންމަތީ ބައްދަލުވުންތައް ބޭއްވުމުގެ އިތުރުން، އާއްމުންނާއި ބައްދަލުކުރައްވާ އާއްމުންގެ ކަންބޮޑުވުންތައް އޮޅުން ފިލުއްވުމަށް ހަމަޖެހިފައިވެއެވެ. އޭގެ ތެރޭގައި ހިމެނެނީ ގުޅީގެ އިތުރުން ގުރައިދޫ އަދި މާފުއްޓެވެ.
މި ދަތުރުފުޅުގެ ތެރެއިން ރައީސް ޞާލިހު ވަނީ ކ. ގުޅީ އެމްޑީޕީ ކެމްޕެއިން ޖަގަހަ ހުޅުވާދެއްވާފައެވެ.
މި ދަތުރުފުޅުގެ ތެރެއިން އެމްޑީޕީގެ ޚާއްސަ ޖަލްސާ އެއް ބުރާސްފަތި ދުވަހުގެ ރޭ މާފުށީގައި ބޭއްވުމަށް ވަނީ ހަމަޖެހިފައެވެ.
