ލޯފަން މީހުންނަށް އަމިއްލައަށް ވޯޓުލެވޭ ގޮތް ހަމަޖެއްސުމަށް ޤަވާއިދަށް ގެންނަން ޖެހޭ ބަދަލުތައް ގެނެސްފި

ފެނުމުން މަހުރޫމްވެފައިވާ މީހުންނަށް އަމިއްލައަށް ވޯޓުލެވޭގޮތަށް އިންތިޚާބުތަކާއި ބެހޭ އާންމު ގާނޫނަށް ގެނެސްފައިވާ އިސްލާހާ ގުޅިގެން ކުރަންޖެހޭ މަސައްކަތްތަކުގެ ތެރެއިން ޤަވާއިދަށް ގެންނަން ޖެހޭ އިސްލާހުތައް ގެނެސް ނިމިފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.

އެ ކޮމިޝަންގެ ނާއިބު ރައީސް އިސްމާއީލް ހަބީބް ބުދަ ދުވަހު ނޫސްވެރިންނާއި ވާހަކަދައްކަވަމުން ވިދާޅުވީ ލޯފަން މީހުންނަށް ވޯޓުލުމުގައި ހަމަޖައްސަން ޖެހޭ އިންތިޒާމްތައް ހަމަޖައްސަމުންދާ ކަމަށެވެ. އެގޮތުން ގަވާއިދަށް ގެންނަން ޖެހޭ ބަދަލު ގެނެސްފައިވާ ކަމަށާއި ޤާނޫނުގައި ބުނާ އިންތިޒާމްތައް ހަމަޖައްސަން ކުރަން ޖެހޭ އިތުރު މަސައްކަތްތައް ވެސް ކުރިއަށް ދާ ކަމަށެވެ.

Advertisement

މީގެ އިތުރުން އެ ބަދަލަށް ހޭލުންތެރިކަން އިތުރުކުރަން ކުރަން ޖެހޭ މަސައްކަތްތައް ވެސް ހުރިކަން ފާހަގަކުރައްވާ އޭނާ ވިދާޅުވީ މިއީ ފަންނީ ފޮތުން ބަލާއިރު ކޮމިޝަނަށް ވެސް އާ ކަމެއް ކަމަށެވެ. އެހެންކަމުން ނުކުޅުދުންތެރިކަން ހުރި މީހުންގެ ކައުންސިލާއި ލޯފަން މީހުންނާއި ގުޅޭ ޖަމިއްޔާ އާއި ގުޅިގެން މަޝްވަރާކޮށް އެ މަސައްކަތްތައް އިންތިޒާމް ކުރަމުންދާ ކަމަށް އޭނާ ވިދާޅުވިއެވެ.

ހަމައެހެންމެ މި ބަދަލާއެކު މީޑިއާގެ ދައުރު ވަރަށް މުހިންމު ކަމަށާއި ހޭލުންތެރިކަން އިތުރުކުރުމުގައި ވެސް މީޑިއާއަށް ވަރަށް ގިނަ މަސައްކަތްތައް ކޮށްދެވޭނެ ކަަމަށް އޭނާ ވިދާޅުވިއެވެެ.

ޚާއްޞަ ޓެމްޕްލޭޓެއް ބޭނުން ކޮށްގެން، ފެނުމުން މަޙްރޫމްވެފައިވާ މީހުން އަމިއްލަ އަށް ވޯޓުލުމަށްޓަކައި، އިންތިހާބުތަކާ ބެހޭ އާންމު ގާނޫނަށް ގެނެވުނު އިސްލާޙަކީ، ހަމަހަމަ ކަމާއެކު ވޯޓުދިނުމުގެ ޙައްޤު އަދާކުރުމަށް އެޅުނު ވަރަށް މުހިންމު ފިޔަވަޅެއްކަމަށް އެ ކޮމިޝަނުން ބުނެއެވެ. އަދި މިއީ އިންތިހާބީ ނިޒާމަށް ލިބުނު ވަރަށްބޮޑު ކުރިއެރުމެއްކަމަށް އެ ކޮމިޝަނުން ފާހަގަކުރެއެވެ.

މީގެކުރިން ފެނުމުން މަހުރޫމްވެފައިވާ މީހުން ވޯޓުލަނީ އެހެން މީހެއްގެ އެހީތެރިކަމާއެކުއެވެ.

އެހެންނަމަވެސް އަލަށް ގެނައި އިސްލާހުގައި ވާގޮތުން ފެނުމުން މަހުރޫމްވެފައިވާ މީހުން ވޯޓުލުމަށްޓަކައި ޓެމްޕްލޭޓު ބޭނުންކޮށްގެން ވޯޓު ކަރުދާހުގައި ފާހަގަޖެހިދާނެއެވެ. އެގޮތުން ވޯޓު ކަރުދާހުގެ ތެރެއަށް ލައިގެން ނުވަތަ ވޯޓު ކަރުދާހުގެ މަތީގައި ވަގުތީގޮތުން ހަރުކޮށްގެން، ވޯޓުލުމަށް އެހީތެރިވެދޭގޮތަށް ތައްޔާރުކޮށްފައިވާ، އެތެރެ ފެންނަ ޕްލާސްޓިކް ޑިވައިސްއެއް ބޭނުންކުރެވިދާނެ ކަމަށް އިސްލާހުގައި ވެއެވެ.