ސަރުކާރުގެ އިދާރާތަކުން ދެމުންދާ ޚިދުމަތްތައް ލަސްވުމުން ކޮރަޕްޝަނަށް މަގުފަހިވޭ: މިނިސްޓަރު ފައްޔާޒު
10 ޖުލައި 2023 | ހޯމަ 09:45ކޮރަޕްޝަންއަކީ ހަމައެކަނި ފައިސާ ދީގެން ކުރާކަމެއް ނޫން
އިކޮނޮމިކް މިނިސްޓަރު ފައްޔާޒު އިސްމާއީލް
ސަރުކާރުގެ އިދާރާތަކުން ދެމުންދާ ޚިދުމަތްތައް ލަސްވުމުން ކޮރަޕްޝަނަށް މަގުފަހިވާ ކަމަށް އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެއެވެ.
އާދިއްތަ ދުވަހު ވަންގަވް ލޯންޗުކުރުމަށް ބޭއްވި ޚާއްސަ ރަސްމިއްޔާތުގައި މިނިސްޓަރު ފައްޔާޒު ވިދާޅުވީ ސަރުކާރުގެ އެކިއެކި އިދާރާތަކުން ޚިދުމަތްތައް ހޯދުމުގައި ކޮރަޕްޝަން ހިންގާ ވާހަކައަކީ އަބަދުވެސް ދައްކަމުންދާ އެއް ވާހަކަ ކަމަށެވެ. އެއީ ޚިދުމަތް ލަސްވުމުގެ ސަބަބުން ކިޔުގައި ޖެހެން ބޭނުންނުވާތީ އާއްމު ރައްޔިތުން ކުރާ ކަމެއް ކަމަށް މިނިސްޓަރު ފައްޔާޒު ވިދާޅުވިއެވެ.
މިނިސްޓަރު ފައްޔާޒު ވިދާޅުވީ ކޮރަޕްޝަންއަކީ ހަމައެކަނި ފައިސާ ދީގެން ކުރާކަމެއް ނޫން ކަމަށެވެ. އަދި ވިދާޅުވީ ޚިދުމަތްތައް ހޯދުމަށް ސަރުކާރުގެ އިދާރާތަކުގައި މަސައްކަތްކުރާ ރައްޓެހިންނާއި ގުޅިގެން އަބަދުވެސް އަވަސް ޚިދުމަތެއް ހޯދުމަށް މަސައްކަތް ކުރާ ކަމަށެވެ.
އިކޮނޮމިކް މިނިސްޓްރީއަށް އިޝާރާތް ކުރައްވައި މިނިސްޓަރު ފައްޔާޒު ވިދާޅުވީ މިނިސްޓްރީއާ ހަވާލުވިއިރު ވޯކް ޕާމިޓް އަދި ކޯޓާގެ މަސައްކަތްތައް ކުރުމަށް ގާތްގަނޑަކަށް ތިން މަސް ދުވަސް ހޭދަވާ ކަމަށެވެ. ނަމަވެސް މިހާރު އެ ޚިދުމަތްތައް އަވަސްކުރެވި، 24 ގަޑިއިރުގެ ތެރޭގައި ވޯކް ޕާމިޓާއި، ކޯޓާ ލިބޭނެ ކަމަށް މިނިސްޓަރު ފައްޔާޒު ވިދާޅުވިއެވެ.
މިނިސްޓަރު ފައްޔާޒު ވިދާޅުވީ ސަރުކާރަކީ ޚިދުމަތުގެ އެންމެ ބޮޑު ޕްރޮވައިޑާއި، ވިޔަފާރި ކަމަށެވެ. އެހެންކަމުން މި އެފެންވަރަށް ޚިދުމަތްދެވެން ޖެހޭ ކަމަށް މިނިސްޓަރު ފައްޔާޒު ވިދާޅުވިއެވެ. އަދި ވިދާޅުވީ ސަރުކާރުގެ ޚިދުމަތްތައް ލަސްވުމުގެ ސަބަބުން އިގްތިސާދާއި އުފެއްދުންތެރިކަމަށް ވަރަށް ބޮޑެތި ގެއްލުންތައް ލިބޭނެ ކަމަށެވެ. އަގުކޮށްފިކަމަށްވާނަމަ ބިލިއަނުން ގެއްލުން ލިބޭނެ ކަމަށް މިނިސްޓަރު ފައްޔާޒު ވިދާޅުވިއެވެ. ނަމަވެސް ވަންގަވް ޕޯޓަލްއާއެކު ޚިދުމަތްތައް ފުޅާކުރެވި، ކުރިއަށް އޮތް ޖީލަށް ވަރަށް ބޮޑު ފައިދާއެއް ކުރާނެ ކަމަށް މިނިސްޓަރު ފައްޔާޒު ވިދާޅުވިއެވެ.
