ކުރީގެ ނައިބު ރައީސް އަދީބަށް އައިޖީއެމްއެޗް އީއާރުގައި ފަރުވާދޭން ފަށައިފި
އަދީބު ގެންދަވަނީ 20 އަހަރުގެ ޖަލު ހުކުމެއް ތަންފީޒުކުރައްވަމުން
ކުރީގެ ނައިބު ރައީސް އަދީބަށް އައިޖީއެމްއެޗް އީއާރުގައި ވަނީ ފަރުވާ ދޭން ފަށާފައި
ކުރީގެ ނައިބު ރައީސް އަހުމަދު އަދީބަށް އައިޖީއެމްއެޗްގެ އިމަރޖެންސީ ރޫމްގައި ފަރުވާދޭން ފަށައިފިއެވެ.
އަދީބު ހޮސްޕިޓަލަށް ގެންގޮސްފައިވަނީ ބުދަ ދުވަހުގެ ރޭގެ ވަގުތެއްގައެވެ.
އިިތުބާރު ހުރި ފަރާތަކުން ރާއްޖެ އެމްވީއަށް މައުލޫމާތު ދެމުން ބުނީ އަދީބު ހޮސްޕިޓަލަށް ގެންދިޔައީ ހޭފުޅު ނެތިގެން ކަމަށެވެ.
އަދި އަދީބުގެ ހާލަތާމެދު ޑޮކްޓަރުން އަދި އިތުރު މައުލޫމާތެއް ދީފައި ނުވާކަމަށްވެސް އޭނާ ވަނީ ބުނެފައެވެ.
އެމްއެމްޕީއާރުސީގެ ޚިޔާނާތުގެ މައްސަލާގައި ކުށް ސާބިތުވެ، 20 އަހަރުގެ ޖަލު ހުކުމެއް ކޮށްފައިވާ އަދީބު ހުންނެވީ ގޭބަންދުގައެވެ.
އަދީބު ގޭގައި ބަހައްޓާފައި ހުންނެވީ ފުއްޕާމެއާ ގުޅުންހުރި، ނޭވާލުމުގެ މައްސަލަތަކެއް ހުރެގެން ކަމަށް ކަމާބެހޭ ފަރާތްތަކުން ވަނީ މީގެ ކުރިން ވިދާޅުވެފައެވެ.
އެމްއެމްޕީއާރުސީގެ ޚިޔާނާތާ ގުޅިގެން އަދީބުގެ މައްޗަށް ދައުލަތުން އުފުލި 7 ދައުވާއަށް އަދީބު ވަނީ އިއުތިރާފުވެޑައިގެންފައެވެ.
އަދީބުގެ މައްޗަށް ދައުލަތުން ވަނީ ޚިޔާނާތުގައި ބައިވެރިވެވަޑައިގަތް ކަމުގެ ކުށުގެ ދެ ދައުވާއާއި، މަގާމު ނުފޫޒު ބޭނުންކުރެއްވުމުގެ ދެ ދައުވާއެއްވެސް އުފުލާފައެވެ.
މީގެ އިތުރުން ރަސްމީ ހައިސިއްޔަތު ނަހަމަގޮތުގައި ބޭނުންކުރެއްވުމުގެ ކުށުގެ ދައުވާއާއި މަނީ ލޯންޑަރކުރެއްވުމުގެ ކުށުގެ ދެ ދައުވާ ދައުލަތުން ވަނީ އުފުލާފައެވެ.
އަދީބުގެ މައްޗަށް އެ ހުރިހާ ދައުވާއެއް ވެސް ވަނީ ސާބިތުވެފައެވެ.
20 އަހަރުގެ ޖަލު ހުކުމެއްގެ އިތުރުން، އަދީބު 2 މިލިއަން ރުފިޔާއިން ޖޫރިމަނާކުރީ 5 އޮކްޓޫބަރު 2020 ވަނަ އަހަރުއެވެ.
