އަންހެނުންގެ ވޯލްޑްކަޕުގައި ކުޅޭ ކޮންމެ ކުޅުންތެރިއަކަށް 30000 ޑޮލަރު
24 ޖުލައި 2023 | ހޯމަ 05:52ޗެމްޕިއަންކަން ހޯދާ ޓީމެއްގެ ކޮންމެ ކުޅުންތެރިއަކަށް 270000 ޑޮލަރު ލިބޭނެ
ޖަޕާން ކުޅުންތެރިން އަންހެނުންގެ ވޯލްޑްކަޕުގެ ޓްރޮފީ އުފުލާލަނީ
މިމަހުގެ 20 ވަނަ ދުވަހު ފަށާ އަންހެނުންގެ ވޯލްޑްކަޕް ފުޓްބޯޅަ މުބާރާތުގައި ވާދަކުރާ ކޮންމެ ކުޅުންތެރިއަކަށް މަދުވެގެން 30000 ޑޮލަރު ދިނުމަށް ފީފާއިން ނިންމައިފި އެވެ.
ދުނިޔޭގެ ފުޓްބޯޅަ ޖަމިއްޔާއިން މި ގޮތަށް ނިންމީ މުބާރާތުގައި ވާދަކުރާ ކުޅުންތެރިންނަށް ހަމަހަމަ އުސޫލަކުން އިނާމުގެ ފައިސާ ބެހުމަށެވެ.
ނިއުޒީލޭންޑާއި އޮސްޓްރޭލިޔާގައި ބާއްވާ މުބާރާތަށް ކަނޑައަޅާފައިވަނީ 110 މިލިއަން ޑޮލަރެވެ. މުބާރާތުގައި 32 ގައުމު ވާދަކުރާއިރު ޖުމުލަ 732 ކުޅުންތެރިން ތިބޭނެ އެވެ. މި ކުޅުންތެރިން މުބާރާތުގައި ހޯދާ ކުރިއެރުމާއެކު ލިބޭ ފައިސާގެ އަދަދު އިތުރުވާ ގޮތަށް ފީފާއިން ވަނީ ކަނޑައަޅާފައެވެ. މި ގޮތުން ގްރޫޕް ސްޓޭޖް ފަހަނައަޅައި މުބާރާތުގެ ދެ ވަނަ ބުރުގައި ކުޅޭ ކޮންމެ ޓީމެއްގެ ކުޅުންތެރިއަކަށް ވެސް 60000 ޑޮލަރު ދޭނެ އެވެ. އަދި ކުއާޓާ ފައިނަލްގައި ކުޅޭ އަށް ޓީމުގެ ކޮންމެ ކުޅުންތެރިއަކަށް 90000 ޑޮލަރު ލިބޭނެ އެވެ.
މުބާރާތުގެ ހަތަރުވަނަ ހޯދާ ޓީމުގެ ކޮންމެ ކުޅުންތެރިއަކަށް 165000 ޑޮލަރު އަދި ތިން ވަނަ ޓީމުގެ ކޮންމެ ކުޅުންތެރިއަކަށް 180000 ޑޮލަރު ލިބޭނެ އެވެ. ފައިނަލުން ބަލިވާ ޓީމުގެ ކޮންމެ ކުޅުންތެރިއަކަށް ލިބޭނީ 195000 ޑޮލަރެވެ. މުބާރާތުގެ ޗެމްޕިއަންކަން ހޯދާ ޓީމެއްގެ ކޮންމެ ކުޅުންތެރިއަކަށް 270000 ޑޮލަރު އިނާމުގެ ގޮތުގައި ލިބޭނެ އެވެ.
ފީފާގެ ރައީސް ޖިއާނީ އިންފަންޓީނޯ ވަނީ ފުޓްބޯޅައިގައި ހަމަހަމަ ސިޔާސަތެއް ތަންފީޒުކުރުމުގެ ރޯޑްމެޕްގެ ދަށުން 2027 ވަނަ އަހަރު ބާއްވާ އަންހެނުންގެ ވޯލްޑްކަޕުގައި ފިރިހެނުންގެ މުބާރާތަށް ކަނޑައަޅާ ފައިސާގެ އަދަދާ އެއްވަރުގެ އަދަދެއް ދޭން ވައުދުވެފަ އެވެ. ގަތަރުގައި މިދިޔަ އަހަރު ބޭއްވި ފިރިހެނުންގެ ވޯލްޑްކަޕުގައި ވަނީ 440 މިލިއަން ޑޮލަރު އިނާމް ފައިސާގެ ގޮތުގައި ހޭދަކޮށްފަ އެވެ.
