ގައުމީ ޓީމު ކުޅޭ މެޗަށް މާލޭގެ ހަތަރު ސަރަހައްދެއްގައި ޓިކެޓް ވިއްކަނީ

އޭޝިއަން ކަޕް ކޮލިފައިންގައި ރާއްޖެ އާއި ފަލަސްތީން ކުޅޭ މެޗުގެ ޓިކެޓް ވިއްކުމަށްޓަކައި މާލޭގެ ހަތަރު ސަރަހައްދެއްގައި ހާއްސަ ހަރަކާތްތަކެއް ހިންގުމަށް ހަމަޖެހިފައިވާ ކަމަށް އެފްއޭއެމުން ބުނެފި އެވެ.

ގައުމީ ޓީމު ކުޅޭ މެޗުގެ ޓިކެޓު ވިއްކުމަށް އެފްއޭއެމުން ތައްޔާރުވަމުން އަންނަ އިރު، ޓިކެޓާއެކު ގައުމީ ޓީމުގެ ޖާޒީ ލިބޭނެ ކަމަށް އެފްއޭއެމުން ބުނެ އެވެ.

ރާއްޖެޓީވީގެ ކުޅިވަރު ފައިލް ޕްރޮގްރާމުގައި ވާހަކަ ދައްކަވަމުން އެފްއޭއެމްގެ ނައިބު ރައީސް އައިޝަތު ނާޒިމާ ވިދާޅުވީ ގައުމީ ޓީމު ކުޅުމަށް ހަމަޖެހިފައިވާ މެޗަށް ސަޕޯޓަރުން ވެއްދުމަށްޓަކައި ގިނަ ކަންތައްތަކެއް ކުރުމަށް ރޭވިފައިވާ ކަމަށާއި އެގޮތުން މެޗު ބަލަން ޓިކެޓް ގަންނަ ކޮންމެ ފަރާތަކަށް ވެސް ގައުމީ ޓީމުގެ ޖާޒީއެއް ލިބޭ ޕްރޮމޯޝަނެއް ކުރިއަށް ގެންދިއުމަށް ނިންމާފައިވާ ކަމަށެވެ.

ނާޒިމާ ވިދާޅުވީ މެޗުގެ ޓިކެޓް ވިއްކުމަށްޓަކައި ރޯޑް ޝޯއެއް މާލޭގެ ހަތަރު ސަރަހައްދެއްގައި ކުރިއަށް ގެންދިއުމަށް ނިންމާފައިވާ ކަމަށެވެ. އެގޮތުން މިހަފްތާގެ ބުރާސްފަތި ދުވަހު ހަވީރާއި ރޭގަނޑު ބްރިޖް ސަރަހއްދުގައި ޓިކެޓް ވިއްކުމުގެ ހަރަކާތްތައް ކުރިއަށްދާއިރު، ރަސްފަންނާއި ބާޒާރު މަތި އަދި ގަލޮޅު ދަނޑުންވެސް އެކި ދުވަސް މަތިން ޓިކެޓް ވިއްކުމަށް ހަމަޖެހިފައިވާ ކަމަށް ނާޒިމާ ވިދާޅުވި އެވެ.

އެފްއޭއެމްގެ ނައިބު ރައީސާ އައިޝަތު ނާޒިމާ

ނާޒިމާ ވިދާޅުވީ މި ޕްރޮމޯޝަންގައި ގޮނޑި ބަރިން ޓިކެޓް ނަގާ ފަރާތްތަކަށް ޖާޒީއާއެކު ޓިކެޓެއް 200 ރުފިޔާއަށް ލިބެން ހުންނާނެ ކަމަށާއި އަދި ޖާޒީއާ ނުލައި ޓިކެޓެއް ލިބޭނީ 100 ރުފިޔާ އަށް ކަމަށެވެ. އަދި ވީއައިޕީން ޖާޒީއާއެކު ޓިކެޓެއް 250 ރުފިޔާއަށް ލިބެން ހުންނައިރު، ޖާޒީއާ ނުލައި ޓިކެޓެއް ލިބޭނީ 150 ރުފިޔާ އަށެވެ.

މި ފުރުސަތުގައި ސިޑިބަރިން ޓިކެޓް ގަންނަ ފަރާތްތަކަށް ޖާޒީއެއް ލިބިގެން ނުދާއިރު، ސިޑިބަރީގެ ޓިކެޓްގެ އަގަކީ 50 ރުފިޔާ އެވެ. އެހެން ނަމަވެސް ނާޒިމާ ވިދާޅުވީ ވަކިން ޖާޒީ ގަންނަން ބޭނުންވާ ފަރާތްތަކަށް އެފުރުސަތު ވެސް ޖަމަޖެހިގެންދާނެ ކަމަށާއި އެގޮތުން ވަކިން ޖަޒީއެއް ލިބެން ހުންނާނީ 310 ރުފިޔާ އަށް ކަމަށެވެ.

ނާޒިމާ ވިދާޅުވީ މާލޭގެ ހަތަރު ސަރަހައްދުގެ އިތުރުން ހުޅުމާލެ އާއި ވިލިނގިލިން ޓިކެޓް ބައްލަވައިގަންނަން ބޭނުންވާ ފަރާތްތަކަށް އެފުރުސަތު ވެސް ތަނަވަސްކޮށްދޭނެ ކަމަށާއި އެގޮތުން ގިނަ އަދަދަކަށް ޓިކެޓް ބައްލަވައިގަންނަ ފަރާތްތަކަށް އެފްއޭއެމުން އެ ފުރުސަތު ތަނަވަސްކޮށްދޭނެ ކަމަށެވެ.

ނާޒިމާ ވިދާޅުވީ މިހާރު އެންމެ ބާރަށް ކުރެވެމުންދާ މަސައްކަތަކީ އެފްއޭއެމާއި ޕާޓްނާޝިޕް ހެދިފައި ހުރި ހުރިހާ ކޮމްޕެނީތައް މެދުވެރިކޮށް މެޗު އޮންނަ ދުވަހާއި އަދިވެސް ޓިކެޓް ވިއްކުމަށް ހަމަޖެހިފައިވާ ދުވަސްތަކުގައި އެ ކޮމްޕެނީތަކުގެ މުވައްޒަފުން މެދުވެރިކޮށްގެން ޓިކެޓް ވިއްކުމާއި އެ ކޮމްޕެނީތަކުގެ މުވައްޒަފުން މެޗު ބެލުމަށް ދަނޑަށް ގެނެވޭނެ އިންތިޒާމްތައް ހަމަޖެއްސުން ކަމަށެވެ.

އޭޝިއަން ކަޕް ކޮލިފިކޭޝަންގައި ރާއްޖެއާއި ފަލަސްތީން ބައްދަލުކުރާ މެޗު ކުޅުމަށް ހަމަޖެހިފައިވަނީ މިމަހުގެ 28 ވަނަ ދުވަހުގެ ރޭ، 21:00 ގައި ގަލޮޅު ރަސްމީ ބޯޅަ ދަނޑުގަ އެވެ. ކޮލިފައިންގައި ރާއްޖެއާއެކު ގްރޫޕް ޑީގައި ހިމެނެނީ ފަލަސްތީން އޮމާން އަދި ބޫޓާން އެވެ.