ސުވާލެއްގެ ޖަވާބު ހޯދަން، ސީދާ ނަރުދަމާ ނިޒާމުގެ ތެރެއަށް!

ޖަރުމަނުވިލާތުގެ އެންމެ ބޮޑު ސިޓީ، އަދި އެ ގައުމުގެ ވެރިކަންކުރާ ބަރލިންގެ ދަށުގައި ދެމެމުން ދަނީ ތެތް އަނދިރިކަމެއް އެކުލެވޭ ނަރުދަމާގެ ކޯރެކެވެ. ނަމަވެސް އެއީ ހަމައެކަނި އިންސާނާގެ ނަޖިސް ބޭރުކުރާ ކޯރެއްގެ ގޮތުގައި ސިފަ ކުރެވޭކަށް ނެތެވެ. އެތަނަކީ ހޫނު އުފައްދާ ޕްލާންޓެއްވެސް މެއެވެ.

ބަރލިންގެ މެދަކާ ހިސާބުގައި އޮންނަ އެލެކްޒަންޑަޕްލަޓްޒް އޭ ކިޔާ ސަރަހައްދުގައި ހުންނަ، ކުރީގެ "ހައުސް އޮފް ސްޓެޓިކްސް"ގެ އަޑީގައި ކުރަމުން ދަނީ މުހިންމު މަސައްކަތެކެވެ. އެއީ ދެމެހެއްޓެނިވި ގޮތުގައި ހޫނު ހަކަތައިގެ ސަޕްލައި ކަށަވަރު ކުރުމެވެ. އެ މަސައްކަތުގެ އަސާސް ގުޅެނީ އިންސާނުން ބޭރުކުރާ ނަޖިހާއެވެ.

110000 އަކަމީޓަރުގެ ސައިޓަށް ހޫނު ފޯރުކޮށްދެނީ އެކަމަށް ޚާއްޞަ ޕަމްޕުތަކުންނެވެ. އެ ޕަމްޕުތަކަށް ހަކަތަ ފޯރުކޮށްދެނީ ޖަރުމަނުވިލާތުގެ ވެރިރަށުން ބޭރުކުރާ ނަޖިސް ފެނުންނެވެ.

އެއީ ކިހިނެއް ކުރާ ކަމެއްތޯ ކުރެވޭ ސުވާލުގެ ޖަވާބު ދިނުމަށްޓަކައި ފީނައިގަންނަން ޖެހެނީ ބަރލިންގެ އަޑިއަށެވެ. ސީދާ ނަރުދަމާ ނިޒާމުގެ ތެރެއަށެވެ.

ނަރުދަމާ ނިޒާމު ތެރޭގައި ހޫނު ބަދަލުކުރާ މޮޑިއުލްތައް ހަރުކޮށްފައި ހުރެއެވެ. ބަރލިން މުނިސިޕަލްޓީގެ ހަކަތައާއި ޓެކްނޮލޮޖީގެ ކަންކަން ބެލެހެއްޓުމުގައި އިސްކޮށް ހަރަކާތްތެރިވާ ޔޫޓިލިޓީ ކުންފުނީގެ ގްރެޖުއޭޓް އިންޖިނޭރު، މާތިއާސް ކަރސްޓަން ތަފްސީލު ކޮށްދިންގޮތުގައި، ނަރުދަމާ ނިޒާމުގެ 350 މީޓަރުގެ ސަރަހައްދެއްގައި މޮޑިއުލްތައް ވަނީ ހަރުކޮށްފައެވެ.

ގޭބިސީތަކާއި ސިނާއީ ކަންކަމަށް ބޭނުންކުރާ އިމާރާތްތަކުން ނަޖިސް ފެން ބޭރު ކުރުމާއެކު، އެ ފެންތައް ފައިބައިގެން ދަނީ ދަބަރު ނުޖަހާ ތަށިގަނޑުތަކެއްގެ މައްޗަށެވެ. އެހާ ހިސާބުން، އެކަމަށް ބޭނުންވާ ހަކަތަ އުފެދިގެން ދެއެވެ. މި ގޮތަށް އެއްކުރާ ހަކަތަ، މުޅި ސަރަހައްދަށް ބަހާލައެވެ. މިހާތަނާ ޖެހެންދެން، މި ދެންނެވި ހޫނުގެ ހަކަތައަކީ ނަރުދަމާ ނިޒާމުގެ ތެރޭގައި ބޭނުންނުކުރެވި ހުރި ހަކަތައެވެ.

ހޫނުގެ ހަކަތައަކީ އާންމު ދިރިއުޅުމުގެ އެކި ބޭނުންތަކަށް މުހިންމު ހަކަތައެކެވެ. ފެން ކެއްކުމާއި، ބިސްގަނޑު އެޅުންފަދަ އާދައިގެ ކަންކަމުން ފެށިގެން ގޮސް، ދަގަނޑު ވިރުވުމާއި ކާރު އުފެއްދުން ފަދަ ބޮޑެތި މަސައްކަތްތަކަށްވެސް ހޫނުގެ ހަކަތަ ބޭނުން ވެއެވެ. އާންމު ދިރިއުޅުމުގެ ބޭނުމަށް ކަރަންޓު އުފައްދާ ތަރމަލް ޕަވަރ ޕްލާންޓް ތަކަށްވެސް ހޫނުގެ ހަކަތަ ބޭނުންވެއެވެ.