މަލައިކާގެ ކައިވެންޏާއި ގުޅޭ ގޮތުން ކުރީގެ ފިރމީހާ ދިން ޖަވާބު ވަރަށް ތަފާތު!
މަލައިކާ އާއި އަރުޖުން އަންނަ އޭޕްރީލް މަހުގެ 19 ގައި ކައިވެނި ކުރުމަށް ވަނީ ހަމަޖެހިފައި
މަލައިކާ އަރޯރާ އާއި އަރުބާޒް ޚާން
މަލައިކާ އަރޯރާ އާއި އަރުބާޒް ޚާން ގެ ކައިވެންޏާއި ގުޅޭގޮތުން މަލައިކާގެ ކުރީގެ ފިރިމީހާ ބޮލީވުޑްގެ އެކްޓަރ އަދި ފިލްމް ޕްރޮޑިއުސަރ އަރްބާޒް ޚާން ދިން ޖަވާބު ވަރަށް ތަފާތެވެ.
ޕިންކް ވިލާގައި ރިޕޯޓް ކޮށްފައިވާ ގޮތުން އަރުބާޒްގެ ޝޯ "ޕިންޗް" ލައުންޗް ކުރުމަށް ބޭއްވި ޕްރެސް ކޮންފަރެންސްގައި އޭނާގެ ކުރީގެ އަނބިމީހާ މަލައިކާ އާއި އަރުޖުންގެ ކައިވެންޏާއި ގުޅޭގޮތުން ކޮމެންޓެއް ކުރުމަށް ނޫސްވެރިއަކު އެދުމުން އަރުބާޒް ބުނެފައި ވަނީ އޭނާ އެކުރި ސުވާލަކީ ވަރަށް އިންޓެލިޖެންޓް ސުވާލެއް ކަމަށެވެ.
"ތިކުރީ ވަރަށް އިންޓެލިޖެންޓް ސުވާލެއް. ވަރަށް މަސައްކަތް ކޮށްފައި އެބަހުރި. ރޭގަނޑު އެއްކޮށް އެކަމާއި ވިސްނާފައި ތިހިރީ" ހިނިތުންވުމާއި އެކު އަރުބާޒު ވަނީ ބުނެފައެވެ.
މީގެ އިތުރުން އަރުބާޒް ބުނެފައިވަނީ އޭނާ އެސުވާލަށް ޖަވާބު ދޭން ބޭނުންވާ ކަމަށެވެ. ނަމަވެސް އޭނާއަށް ވަގުތު ދިނުމަށް އަރުބާޒް ވަނީ އެދިފައެވެ.
"އަހަރެން ތި ސުވާލަށް މާދަން ޖަވާބު ދެންތަ؟" އަރުބާޒް ވަނީ ބުނެފައެވެ.
އަރުބާޒް މިހާރު ޑޭޓް ކުރަމުންދަނީ ޖޯޖިއާ އެންޑްރިއާނީ އާއެވެ.
އައިއޭއެންއެސްގައި ރިޕޯޓް ކޮށްފައިވާގޮތުން މަލައިކާ އާއި އަރުޖުން އަންނަ އޭޕްރީލް މަހުގެ 19 ގައި ކައިވެނި ކުރުމަށް ވަނީ ހަމަޖެހިފައެވެ.
މި ކައިވެނީގެ ގެސްޓް ލިސްޓް ވެސް މިހާރު ފައިނަލް ކޮށްފައިވާއިރު ގެސްޓް ލިސްޓްގައި ހިމެނޭ ސެލްބްރިޓީންގެ ތެރޭގައި ކަރީނާ ކަޕޫރު ޚާން، ކަރިޝްމާ ކަޕޫރު، ދިޕިކަ ޕަދުކޯން އަދި ރަންވީރު ސިންގް ހިމެނެއެވެ.
އައިއޭއެންއެސް އަށް ދިން އިންޓަވިއުއެއްގައި މަލައިކާ އާއި އަރުޖުންގެ ކައިވެންޏާއި ގުޅޭގޮތުން ދެކެވޭ ވާހަކަތަކަށް އަރުޖުން ބުނެފައިވަނީ ވާހަކަ ދައްކަން ޖެހޭ ކަމެއް އޮތް ނަމަ އެންމެންނަށް ވެސް އިނގޭނެ ކަމަށެވެ. މަލައިކާ ވެސް ވަނީ މިވާހަކަތައް ދޮގު ކޮށްފައެވެ. މަލައިކާ ބުނެފައިވަނީ އެއީ މީޑިއާއިން ހަދައިގެން ދައްކާ ވާހަކަ ތަކެއް ކަމަށެވެ.
އަރުޖުން އާއި ޑޭޓް ކުރާ ކަމަށް މަލައިކާ އެއްބަސްވެފައެއް ނުވެއެވެ.
އަރުޖުންގެ ބައްޕަ ބޮނީ ކަޕޫރު ވެސް ވަނީ މިދެމީހުންގެ ކައިވެންޏާއި ގުޅޭގޮތުން ދެކެވޭ ވާހަކަތައް ދޮގު ކޮށްފައެވެ.
