މަންމަ މަރުވުމުން ފްރީޒަރެއްގައި ހަށިގަނޑު ބާއްވައިގެން އުޅުނު މީހަކު އިންޑިއާ ފުލުހުން އަތުލައިގަނެފިއެވެ.
ކަލްކަތާގެ ފުލުހުން ބުނީ ސުބްރަތާ މަޖުމްދާރު ނަމަކަށް ކިޔާ މީހަކު އޭނާގެ މަރުވެފައިވާ މަންމަގެ ހަށިގަނޑު ކުނި ނުވާނޭހޭ ކެމިކަލް އަޅެމަށްފަހު، ފްރީޒަރެއްގެ ތެރޭގައި ބާއްވައިގެން ތިން އަހަރަށް ވުރެ ގިނަ ދުވަސް ހޭދަކޮށްފައިވާ ކަމަށެވެ.
ފުލުހުން ތުހުމަތު ކުރަނީ މި ފިރިހެން މީހާ އޭނާގެ މަންމަގެ ހަށިގަނޑު ފޮރުވައިގެން ގެންގުޅުނީ މަންމަގެ ޕެންޝަން ފައިސާ ހޯދުމުގައި ބޭނުމުގައި ކަމަށެވެ. ފުލުހުން ބުނީ އެ ފިރިހެން މީހާ، އޭނާގެ މަންމަގެ ހަށިގަނޑު ރައްކާ ކޮށްފައި ބޭއްވީ އަލުން ފުރާނަ އެޅިގެން ދުނިޔެއަށް އަންނާނެ ކަމަށް އޭނާ އަށް ގަބޫލު ކުރެވޭތީ ކަމަށް ބުނެފައިވާ ކަމަށެވެ.
އެހެން އޭނާ ބުނި ނަމަވސް ފުލުހުން ފާހަގަ ކުރާ ގޮތުގައި މި އަންހެން މީހާ މަރުވުމަށްފަހު ވެސް ބަރާބަރަށް އޭނާގެ ޕެންޝަން ފައިސާ ޑެބިޓް ކާޑެއް ބޭނުން ކޮށްގެން ވަނީ ނަގާފައެވެ. މި ފައިސާ އަކީ ޕެންޝަން ފައިސާ ކަމަށާއި އެއީ މީހާ މަރުވުމުން ދޫކުރާ ފައިސާ އެއް ނޫން ކަމަށްވެސް ފުލުހުން ބީބީސީ އަށް މައުލޫމާތު ދެމެން ބުނެފައިވެއެވެ.
ފުލުހުން ބުނީ މި ފިރިހެން މީހާގެ ގޭގެ ތެރެއިން މަރުވެފައިވާ މީހުންގެ ހަށިގަނޑު ކުނިނުވެ އޮންނާނެ ގޮތް ހެދުމާ ބެހޭ މައުލޫމާތު ހިމެނޭ ފޮތްތަކާއި މަޖައްލާތައް ފެނިފައިވާ ކަމަށެވެ.
ގެ ޗެކް ކުރީ ފުލުހުންނަށް މީހަކު ދިން މައުލޫމަތަކާ ގުޅިގެންނެވެ. ޗެކް ކުރުމުގެ ތެރޭގައި އަންހެން މީހާގެ ހަށިގަނޑު ބޮޑު ފްރީޒަރެއްގެ ތެރޭގައި އޮތް ކަމަށާއި، އަދި ކެމިކަލް އަޅާފައި ހުރި ބޮޑެތި ފުޅި ތަކެއްގެ ތެރެއިން އިންސާނުންގެ ހަށިގަނޑުގެ ބައިތައް ފެނިފައިވާ ކަމަށްވެސް ފުލުހުން ބުނެފައި ވެއެވެ.
