ގދ.ތިނަދޫގައި ތަރައްގީގެ ގިނަ މަޝްރޫއުތަކުގެ މަސައްކަތްތައް ކުރިއަށްދާ ކަމަށާއި، ޚިދުމަތްތައް ރައްޔިތުންނަށް ދިނުމަކީ އަމާޒެއް ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.

ރާއްޖެޓީވީގައި ވާހަކަދައްކަވަމުން އާޒިމް ވިދާޅުވީ ތިނަދޫގައި މިހާރު ވެސް ގިނަ މަޝްރޫއުތަކުގެ މަސައްކަތްތައް ކުރިއަށްދާއިރު، ބައެއް މަޝްރޫއުތަކުގެ މަސައްކަތްތައް ނިންމާ ރައްޔިތުންނާއި ހަވާލުކޮށްފައިވާ ކަމަށެވެ.

މިހާރު ކުރިއަށްދާ މަޝްރޫއުތަކަށް އިޝާރަތް ކުރައްވައި އާޒިމް ވިދާޅުވީ އިންޑަސްޓްރިއަލް އޭރިއާގެ މަސައްކަތްތައް ކުރިއަށްދާ ކަމަށާއި، އެސަރަހައްދު ހިއްކައި، ކީވޯލް އަދި ޝޯ ޕްރޮޓެކްޝަން ޖެހުމުގެ މަސައްކަތް ކުރިއަށްދާ ކަމަށެވެ. އަދި ވިދާޅުވީ އެމަސައްކަތުގެ ބޮޑުބައި މިހާރު ނިމިފައިވާ ކަމަށެވެ. މީގެ އިތުރުން އާޒިމް ވިދާޅުވީ މަސްވެރިންނަށް ލުއިފަސޭހަ ކޮށްދިނުމުގެ ގޮތުން، މަސްވެރިން ބޭނުންކުރުމަށް އިތުރު ބައެއް ހެދުމުގެ މަސައްކަތް ވެސް ހަވާލުކޮށްފައިވާ ކަމަށާއި، އެމަސައްކަތް ކުރިއަށްދާ ކަމަށެވެ.

ތިނަދޫގެ ޕިކްނިކް އައިލެންޑަށް އިޝާރާތް ކުރައްވައި އާޒިމް ވިދާޅުވީ މިމަޝްރޫއު ކުރިއަށް ގެންދެވޭނީ ތިމާވެއްޓަށް އަސަރު ފޯރާނެ ވަރު ބަޔާންކުރާ ރިޕޯޓް (އީއައިއޭ) ހެދުމަށްފަހު ކަމަށާއި، އީއައިއޭގެ މަސައްކަތް ނިމުނުހާ އަވަހަކަށް އަމަލީ މަސައްކަތް ފެށޭނެ ކަމަށެވެ. އާޒިމް ވިދާޅުވީ އީއައިއޭ ހެދުމަށް ގާތްގަނޑަކަށް ދެ މަސް ދުވަސް ނަގާ ކަމަށެވެ.

ތިނަދޫ އިންޑަސްޓްރިއަލް ޒޯނަށް ބޭނުންވާ ބިން ހިއްކުމުގެ ދެވަނަ ފިޔަވަހީގެ ދަށުން، އެރަށުގައި ޕިކްނިކް އައިލެންޑެއް ހެދުމުގެ މަސައްކަތް އެމްޓީސީސީއާ ހަވާލުކޮށްފައިވަނީ 1 ޖޫން 2023 ގައެވެ. މި މަޝްރޫޢުގެ ދަށުން ޖުމްލަ 65،296 ކޮޑިމީޓަރުގެ ސަރަހައްދެއް ހިއްކުމަށް ހަމަޖެހިފައިވާއިރު، 474 މީޓަރުގެ ރިވެޓްމަންޓް ޖެހުމާއި، 50 މީޓަރުގެ ގްރޮއިންސް ޖެހުމަށް ވަނީ ހަމަޖެހިފައެވެ.

މީގެ އިތުރުން ޕިކްނިކް އައިލެންޑަށް ފަސޭހައިން އަރައި ފޭބުމަށް ބޭނުންވާ 2 ޖެޓީ ހެދުންވެސް މި މަޝްރޫއުގައި ވަނީ ހިމަނާފައެވެ. 

މިމަޝްރޫއަށް 57.6 މިލިއަން ރުފިޔާ ޚަރަދުވާނެއެވެ.

އާޒިމް ވިދާޅުވީ މަސައްކަތް ކުރަމުންދަނީ ތިނަދޫ ބޭނުންވާ ޚިދުމަތްތައް އަވަހަށް ފޯރުކޮށްދިނުމަށް ކަމަށާއި، މަޝްރޫއުތައް ޓައިމްލައިންއާ އެއްގޮތަށް މަސައްކަތްތައް ކުރިއަށްދާ ކަމަށެވެ.