ޚަރަދު ކުޑަ ކުރުމަށް ކައުންސިލަރުން މަދު ކުރުމުގެ ވާހަކަ ދައްކާއިރު، ސީނިއަރ ޕޮލިޓިކަލް ޑިރެކްޓަރުންނާއި، ޑެޕިއުޓީ މިނިސްޓަރުން "ހައްދެއް ނެތް މިންވަރަށް" ނަގަމުންދާކަމަށް ތިނަދޫ ސިޓީގެ މޭޔަރު ސައުދު އަލީ ވިދާޅުވެއްޖެއެވެ.

ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން ސައުދު ވިދާޅުވީ، ތިނަދޫއަށް ސިޓީއެއްގެ ދަރަޖަ ލިބިގެން ދިއުމަކީ އެތައް ދުވަހެއްގެ ޒަމާންވީ އިންތިޒާރެއްގެ ނިމުން ކަމަށެވެ.

ތިނަދޫއަށް ސިޓީއެއްގެ ދަރަޖަ ދެވުނުނަމަވެސް، އިތުރަށް ފުރިހަމަ ކުރަންޖެހޭ ކަންކަން ހުރި ކަމަށާއި، މިހާރު އިދާރީ އިންތިޒާމުތައް ހަމަޖެހިފައިވާކަމަށް އޭނާ ވިދާޅުވިއެވެ.

އަދި މިވަގުތު މަސައްކަތުގައި ހުރި ގޮންޖެހުންތަކުން އަރައިގަތުމަށް ގުޅުންހުރި އިދާރާތަކާ މަޝްވަރާކޮށްގެން ކުރެވެން ހުރި މަސައްކަތްތައް ކުރަމުންދާކަމަށްވެސް އޭނާ ވިދާޅުވިއެވެ.

އޭގެ އިތުރުން، ލާމަރުކަޒީ ގޮތުން ކައުންސިލުތައް ބާރުވެރި ކުރުވުމަށް ޤާނޫނީ ގޮތުން ގެންނަން ޖެހޭ ހަރުދަނާ ބަދަލުތައް ގެނެވެންޖެހޭކަމަށްވެސް އޭނާ ވިދާޅުވިއެވެ. ލާމަރުކަޒު ކުރާ ވާހަކަ ދައްކާއިރު، ހަގީގީ މާނައިގައި ލާމަރުކަޒީ ޤާނޫނުގެ ދަށުން ކައުންސިލުތައް ބާރުވެރިވާން ޖެހޭކަންވެސް އޭނާ ފާހަގަ ކުރެއްވިއެވެ.

އެމްޑީޕީން ލާމަރުކަޒީ ނިޒާމު ހަރުދަނާ ކުރުމަށް ރަނގަޅު މަސައްކަތްތަކެއް ކޮށްފައިވާ ކަމަށާއި، މިއަދު މަސައްކަތް ކުރަންވީ އެ ނިޒާމު އިތުރަށް ފުުރިހަމަ ކުރުމަށްކަމަށްވެސް ސައުދު ވިދާޅުވިއެވެ.

އޭގެ އިތުރުން، މި ސަރުކާރުން ޚަރަދު ކުޑަ ކުރުމަށް ކައުންސިލަރުން މަދު ކުރުމުގެ ވާހަކަ ދައްކާއިރު، ސީނިއަރ ޕޮލިޓިކަލް ޑިރެކްޓަރުންނާއި، ޑެޕިއުޓީ މިނިސްޓަރުން "ހައްދެއް ނެތް މިންވަރަށް" ނަގަމުންދާކަންވެސް ސައުދު ފާހަގަ ކުރެއްވިއެވެ.

ސައުދު ވިދާޅުވީ، ކައުންސިލާއި މަޖިލީހަށް މެމްބަރުން އިންތިޚާބު ކުރަނީ ރައްޔިތުންވެސް ނުހަނު އިތުބާރު ކޮށްފައި ކަމަށެވެ. އެހެންކަމުން ރައްޔިތުން ބާރުވެރި ކުރުވުމަށް ކުރަންޖެހޭ ކަންކަން ކުރުން އަވަސް ކުރަންޖެހޭކަމަށް ސައުދު ވިދާޅުވިއެވެ.