ތިނަދޫ ސިޓީއަށް ކުރިމަތިވެފައިވާ ފެންބޮޑުވުމުގެ މައްސަލަ ހައްލުކޮށް، ''ފެން ހިންދާ ނިޒާމު'' ބެލެހެއްޓުމުގެ މަސައްކަތް އެސިޓީގެ ކައުންސިލްއާ ހަވާލުކޮށްފިއެވެ.

އާދިއްތަ ދުވަހު އެންވަޔަރަންމަންޓް މިނިސްޓްރީގައި ބޭއްވި ރަސްމިއްޔާތެއްގައި މިކަމުގެ އެއްބަސްވުމުގައި ވަނީ ސޮއިކޮށްފައެވެ. މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރު ތާރިގު އިބްރާހީމް އެވެ. ތިނަދޫ ކައުންސިލްގެ ފަރާތުން ސޮއި ކުރެއްވީ އެސިޓީގެ މޭޔަރު ސައުދު އަލީއެވެ.

އެއްބަސްވުމުގައި ސޮއިކުރެއްވުމަށްފަހު މިނިސްޓަރު ތާރިގު ވިދާޅުވީ ޒަމާނުއްސުރެ ތިނަދޫއަކީ ވާރޭ ވެހިއްޖެނަމަ ފެން ބޮޑުވާ ރަށެއް ކަމަށާއި، އެކަމުގެ ގެއްލުންތައް ރައްޔިތުންނަށް ވަމުންދާ ކަމަށެވެ. އަދި ރަށުގެ ބައެއް ހިސާބުތައް އާދަޔާ ހިލާފަށް ފެން ބޮޑުވާކަން މިނިސްޓަރު ފާހަގަކުރެއްވިއެވެ. އަދި ވިދާޅުވީ ފެން ހިންދާ ނިޒާމެއް ތިނަދޫގައި ގާއިމްކުރީ ފެންބޮޑުވާ މައްސަލައާއި ރައްޔިތުން އުފުލަމުންދިޔަ ތަކުލީފުތަކަށް ހައްލު ހޯދައިދިނުމަށް ކަމަށެވެ.

އެގޮތުން ތިނަދޫގައި ގާއިމްކޮށްފައިވާ ފެން ހިންދާ ނިޒާމުގެ މަސައްކަތް ކައުންސިލްއާ ހަވާލުކުރުމަށް ނިންމީ ރައްޔިތުންނާ އެންމެގާތުން ޚިދުމަތްދޭން ތިބީ ކައުންސިލް ކަމަށްވާތީ ކަމަށެވެ. އެ ނިޒާމު ފުރިހަމައަށް ބަލަހައްޓާނެކަމުގެ ފުރިހަމަ ޔަގީންކަން އެބައޮތް ކަމަށް މިނިސްޓަރު ވިދާޅުވިއެވެ.

ތިނަދޫގައި ފެން ހިންދާ ނިޒާމުގެ މަސައްކަތް ކުރިއަށް ގެންގޮސްފައިވަނީ މާލީ ވުޒާރާ މެދުވެރިކޮށް އާންމުކޮށް ބީލަމަށް ހުށަހަޅާ އުސޫލުންނެވެ. އަދި މި މަޝްރޫއުގެ ސުޕަވިޒަން ކޮންސަލްޓެންޓެއްގެ ގޮތުގައި މަސައްކަތްކޮށްފައިވަނީ ރިއަން ޕްރައިވެޓް ލިމިޓެޑްއެވެ.

މި ނިޒާމު ގައިމުކުރުމުގެ އަމަލީ މަސައްކަތް ކުރިއަށް ގެންގޮސްފައިވަނީ ސެނޮކް ޓްރޭޑް ކޮމްބައިންނެވެ. މިއީ 43 މިލިއަން ރުފިޔާގެ މަޝްރޫއެކެވެ.

ތިނަދޫ ފެން ހިންދާ ނިޒާމު ގާއިމުކުރުމުގެ މަޝްރޫއުގެ ދަށުން ރަށުގައި 5,262.81 މީޓަރުގެ އަކުއަ ސެލް ނެޓްވޯކް އަކާއި 9,562.36m މީޓަރުގެ އެޗް.ޑީ.ޕީ.އީ ޕައިޕްގެ ނެޓްވޯކެއް ވަނީ އަޅާފައެވެ. އަދި 08 ޕަންޕް ސްޓޭޝަން އާއި 08 ސީ-އައުޓްފޯލެއް ވަނީ ގާއިމްކޮށްފައެވެ.