ގދ. ތިނަދޫ އިން ވޭޕް ވިއްކާ ކަމުގެ ތުހުމަތުގައި ހައްޔަރުކުރެވުނު ފުލުހުންގެ ސްޕެޝަލް ކޮންސްޓަބިއުލަރީ މުހައްމަދު ސާޖިދު އަހުމަދުގެ މައްޗަށް މަސްތުވާތަކެތި ޓްރެފިކް ކުރުމުގެ ދައުވާ އުފުލައިފިއެވެ.

ފުލުހުންގެ އިދާރާގައި ސްޕެޝަލް ކޮންސްޓަބިއުލަރީ ކޮންސްޓެބަލެއްގެ ގޮތުގައި މަސައްކަތްކުރަމުން އައި ސާޖިދު ހައްޔަރުކުރެވުނީ އީ-ސިނގިރޭޓު ގެންގުޅޭ ކަމަށް ޝައްކުކުރެވިގެން ބަލައި ފާސްކުރި ވަގުތުއެވެ. މި މައްސަލައިގައި ފުލުހުން އޭނާ ދިރިއުޅޭ ގެއާއި ސައިކަލު ބަލައި ފާސްކުރިއިރު ގިނަ އަދަދެއްގެ ދުންފަތާއި ނެނޯސްޓިކް، ވޭޕް، ވޭޕް ކާޓްރިޖް އަދި މަސްތުވާތަކެތި ކަމަށް ތުހުމަތުކުރެވޭ 191.92 ގުރާމްގެ ތަކެތި ފެނިފައިވެއެވެ.

ޕްރޮސެކިއުޓަރ ޖެނެރަލްގެ އޮފީހުން ބުނީ ސާޖިދުގެ މައްޗަށް ކޮށްފައިވަނީ މަސްތުވާތަކެތި ޓްރެފިކް ކުރުމުގެ ދައުވާ އެވެ. މި ދައުވާ ސާބިތުވެއްޖެ ނަމަ އުމުރަށް ޖަލަށްލުމާއެކު، އެއް ލައްކަ ރުފިޔާއާއި 10 މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ.

މި މައްސަލައިގެ ޝަރީއަތް ހައިކޯޓުގައި ކުރިއަށްދިޔައިރު، ސާޖިދު ވަނީ އޭނާ ފުލުހުންގެ ހުވާ ނުކުރާކަމަށް ބުނެފައެވެ. ނަމަވެސް ހުވާ ނުކުރިނަމަވެސް ފުލުހުންގެ ސްޕެޝަލް ކޮންސްޓަބަލްއެއްގެ ވަޒީފާ އަދާކޮށް، ވަޒީފާގެ މުސާރަ ނަގަމުން ގެންދިޔަކަން އޭނާ އެއްބަސްވެފައިވެއެވެ.

ހައިކޯޓުން މައްސަލަ ނިންމަމުން ފާހަގަކުރި ގޮތުގައި، ރަސްމީ ގޮތެއްގައި ބޭއްވި ރަސްމިއްޔާތެއްގައި ގާނޫނީގޮތުން ކުރަންޖެހޭ ހުވައެއް ކުރުމަށް ހާޒިރުވެ، އެތައް ދުވަހެއް ވަންދެން ވަޒީފާ އަދާކުރުމަށްފަހު، ރަސްމިއްޔާތުގައި ބައިވެރިވިނަމަވެސް ހުވާ ނުކުރާކަމަށް ބުނުމަކީ ގަބޫލުކުރެވޭނެ ކަމެއް ނޫނެވެ.

ސާޖިދުގެ ފަރާތުން މި މައްސަލަ ސުޕްރީމް ކޯޓަށް ހުށަހަޅާފައިވީ ނަމަވެސް، އެ މައްސަލަ ބަލައިގަތުމާމެދު އެ ކޯޓުން އަދި ގޮތެއް ނިންމާފައެއް ނުވެއެވެ.