ގދ. ތިނަދޫގައި އަޅާފައިވާ 200 ރޯހައުސް ބޭނުންވާ ފަރާތްތަކަށް އެކަމަށް އެދި ހުށަހެޅުމުގެ ފުރުސަތު މިމަހުގެ 7 ވަނަ ދުވަހާ ދިމާވާ އާދީއްތަ ދުވަހުން ފެށިގެން ހުޅުވާލާނެ ކަމަށް މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗަރ އިން އިއުލާން ކޮށްފިއެވެ.

ރައީސް އިބްރާހިމް މުހައްމަދު ޞާލިހުގެ ސަރުކާރުން 2022 ވަނަ އަހަރު ފެށި މި މަޝްރޫއުގެ ދަށުން އަޅާފައިވާ ރޯހައުސްތަކަށް އެދި ހުށަހެޅުމުގެ ފުރުސަތު މިއަހަރުގެ ފެބްރުއަރީ މަހު ތިނަދޫ ސިޓީ ކައުންސިލުން ހުޅުވާލި ނަމަވެސް، އެ އިއުލާން ހައުސިންގ މިނިސްޓްރީން ވަނީ ބާތިލްކޮށްފައެވެ.

ހައުސިންގ މިނިސްޓްރީގެ އިއުލާނުގައިވާ ގޮތުން، ރޯހައުސްތަކަށް އެދި ހުށަހެޅުމުގެ ފުރުސަތު އޮންނާނީ އަންނަ ނޮވެމްބަރު މަހުގެ 7 ވަނަ ދުވަހާ ހަމައަށެވެ. އަދި ހުށަހެޅުންތައް ބަލައިގަންނާނީ ހިޔާވެހި ޕޯޓަލް މެދުވެރިކޮށެވެ.

ތިނަދޫގައި ތަރައްޤީކޮށްފައިވާ ރޯ ހައުސްތައް ދޫކުރުމަށް ހަމަޖެހިފައިވާ ގޮތުގެ އުޞޫލުގައި ވާގޮތުން، މި ރޯހައުސްތަކަށް ކުރިމަތިލެވޭނީ އުމުރުން 18 އަހަރު ފުރިފައިވާ ގދ. އަތޮޅުގެ ރައްޔިތުންނަށެވެ. މީގެ އިތުރުން، ތިނަދުއަށް ހިޖުރަކޮށް އެ ރަށުގައި މެދުނުކެނޑި 10 އަހަރު ދިރިއުޅެފައިވާ ފަރާތްތަކަށްވެސް މި ފުރުސަތު ހުޅުވާލެވިފައިވެއެވެ. މި ނޫނަސް މި އުޞޫލްގައި ގިނަ ޝަރުތުތަކެއް ވަނީ ކަނޑައަޅާފައެވެ.

ރޯހައުސްއަށް އެދި ހުށަހަޅާ ފަރާތްތަކަށް ޕޮއިންޓު ދިނުމުގައި ބަލަންޖެހޭ މިންގަނޑުތައް ބަލައި، އިވެލުއޭޓް ކުރާނީ ހައުސިންގ މިނިސްޓްރީ އިން ނުވަތަ އެ އެމިނިސްޓްރީ އިން ކަނޑައަޅާ އިދާރާއަކުން ނުވަތަ ކޮމިޓީއަކުންނެވެ.

253.99 މިލިއަން ރުފިޔާގެ މި މަޝްރޫއުގެ ދަށުން އަޅާފައިވާ ރޯހައުސްތަކަކީ 700 އަކަފޫޓުގެ ބޮޑުމިނުގެ، ދެ ފަންގިފިލާއަށް ބަހާލެވިފައިވާ 3 ކޮޓަރީގެ ގެތަކެކެވެ. ކޮންމެ ރޯހައުސްއެއްގެ އަގަކީ 1.2 މިލިއަން ރުފިޔާއެވެ.

އެމްޑީޕީ ސަރުކާރުން ފެށި މި މަޝްރޫއުގެ މަސައްކަތް ކުރިއަށް ގެންގޮސްފައިވަނީ ސްރީ ލަންކާގެ ސިއެރާ ކޮންސްޓްރަކްޝަނާއި ސްޓާ ކޮންސްޓްރަކްޝަން އެންޑް އިންޖިނިއާސްގެ ޖޮއިންޓް ވެންޗަރ އަކާ ހަވާލުކޮށްގެންނެވެ.