ހުވާ ނުކުރާ ކަމަށް ބުނި ފުލުސް މީހާގެ މައްސަލަ ސުޕްރީމް ކޯޓަށް

ފުލުހުންގެ ހުވައި ނުކުރާކަމަށް ބުނެ ހައިކޯޓުގެ ޝަރީއަތުގައި ދޮގު ހެދި ފުލުސް މީހާ، އޭނާގެ ބަންދު މައްސަލަ ސުޕްރީމް ކޯޓަށް ހުށަހަޅައިފިއެވެ.

ގދ. ތިނަދޫ މުހައްމަދު ސާޖިދު އަހުމަދު މި މައްސަލަ ސުޕްރީމް ކޯޓަށް ހުށަހެޅީ، އޭނާ 20 ދުވަހުގެ މުއްދަތަށް އަލުން ހައްޔަރުކުރުމާ ގުޅިގެންނެވެ. އޭނާ އަލުން ހައްޔަރުކުރީ ފުލުހުންގެ ހުވައި ނުކުރާކަމަށް ބުނެ ޝަރީއަތުގައި ދޮގު ހެދި މައްސަލައިގައި ސާޖިދުއަށް ފިޔަވަޅު އަޅަން ޖެހޭކަމަށް ދަށު ކޯޓުން ކަނޑައެޅުމުންނެވެ.

ސާޖިދަކީ ފުލުހުންގެ އިދާރާގައި ސްޕެޝަލް ކޮންސްޓަބިއުލަރީ ކޮންސްޓެބަލެއްގެ ގޮތުގައި މަސައްކަތްކުރި މީހެކެވެ. އޭނާ ހައްޔަރުކުރެވުނީ އީ-ސިނގިރޭޓު ގެންގުޅޭ ކަމަށް ޝައްކުކުރެވިގެން ބަލައި ފާސްކުރި ވަގުތު، މަސްތުވާތަކެތި ފެނުނު މައްސަލައިގައެވެ. މި މައްސަލައިގައި ފުލުހުން އޭނާ ދިރިއުޅޭ ގެއާއި ސައިކަލު ބަލައި ފާސްކުރިއިރު ގިނަ އަދަދެއްގެ ދުންފަތާއި ނެނޯސްޓިކާއި ވޭޕާއި ވޭޕް ކާޓްރިޖާއި މަސްތުވާތަކެތި ކަމަށް ތުހުމަތުކުރެވޭ 191.92 ގުރާމްގެ ތަކެތި ފެނިފައިވެއެވެ.

ހައިކޯޓުގެ ޝަރީއަތުގައި ސާޖިދު ބުނެފައިވަނީ އޭނާ ފުލުހުންގެ ހުވާ ނުކުރާ ކަމަށެވެ. ނަމަވެސް ހުވާ ނުކުރިޔަސް ފުލުހުންގެ ސްޕެޝަލް ކޮންސްޓަބަލްއެއްގެ ވަޒީފާ އަދާކޮށް، ވަޒީފާގެ މުސާރަ ވެސް ނަގާފައިވާކަމަށް އޭނާ އެއްބަސްވިއެވެ.

ހައިކޯޓުން މައްސަލަ ނިންމިއިރު ފާހަގަކޮށްފައިވަނީ، ރަސްމީ ގޮތެއްގައި ބޭއްވި ރަސްމިއްޔާތަކަށް ގާނޫނީގޮތުން ކުރަންޖެހޭ ހުވައެއް ކުރުމަށް ހާޒިރުވެ، އެތައް ދުވަހެއް ވަންދެން ވަޒީފާ އަދާކުރުމަށްފަހު، ރަސްމިއްޔާތުގައި ބައިވެރިވިނަމަވެސް ހުވާ ނުކުރާކަމަށް ބުނުން ގަބޫލުކުރެވެން ނެތް ކަމަށެވެ.

މި މައްސަލައިގައި ސާޖިދުގެ ފަރާތުން ސުޕްރީމް ކޯޓަށް ހުށަހެޅި މައްސަލަ ބަލައިގަތުމާމެދު އެ ކޯޓުން އަދި ގޮތެއް ނިންމާފައެއް ނުވެއެވެ.

ގދ. ތިނަދޫގައި ހިނގި ވޭޕު މައްސަލައެއްގައި ހައްޔަރުކުރި ފުލުހުންގެ ސްޕެޝަލް ކޮންސްޓަބަލްއެއް އެ މަގާމަށް ހުވާކޮށްފައި ނުވާކަމަށް ޝަރިއަތުގެ އަޑު އެހުމުގައި އޭނާ ވަނީ ބުނެފައެވެ. ޝަރީއަތުގެ މަޖިލީހުގައި އިތުރަށް ބުނެފައިވަނީ ވަޒީފާގެ ހުވާ ލައިދޭ މަޖިލީހުގައި ބައިވެރިވިކަމަށާއި، ހުވާ ލައިދިން ވަގުތުގައި ހުވާ ނުކިޔާކަމަށެވެ.