ހަށި ވިއްކާކަމުގެ ތުހުމަތު ގައި ހައްޔަރު ކުރި ދިވެއްސެއް ކަފާލާތުގެ ދަށުން ދޫކޮށްލައިފި

ގދ. ތިނަދޫ ގައި ފައިސާ އަށް ހަށި ވިއްކާ ކަމުގެ ތުހުމަތުގައި ހައްޔަރު ކުރި ދިވެހި ފިރިހެނެއް ކަފާލާތުގެ ދަށުން ދޫކޮށްލައިފި އެވެ.

ފުލުހުން ބުނީ، ގދ ތިނަދޫ ގައި ފައިސާ އަށް ހަށި ވިއްކަމުންދާ ކަމަށް ލިބުނު މައުލޫމާތަކާއި ގުޅިގެން މި މަހުގެ 28 ވަނަ ދުވަހު ގެ ރޭ 23:30 އެހާކަށްހާއިރު ހިންގި އޮޕަރޭޝަނެއްގައި އެރަށު ގެއެއް ބަލައި ފާސްކޮށްފައިވާ ކަމަށެވެ.

އެގޮތުން އެ އޮޕަރޭޝަން ގައި ހައްޔަރު ކޮށްފައިވަނި 52 އަހަރުގެ ދިވެހި ފިރިހެނެކާއި 39 އަހަރުގެ ތައިލޭންޑް އަންހެނެކެވެ. އަދި އެދެމީހުން ހައްޔަރު ކޮށްފައިވަނީ ބަދުއަހުލާގި އަމަލު ހިންގަނިކޮށް ކުށުގެ ވެށިން ކަމަށް ފުލުހުން ބުނެ އެވެ.

ފުލުހުން ބުނީ މި މައްސަލައި ގައި ހައްޔަރަު ކޮށްފައިވާ ދެ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން ފިރިހެން މީހާ ކަފާލާތުގެ ދަށުން ދޫކޮށްލާފައިވާ ކަމަށެވެ. އަދި އަންހެން މީހާ އަށް 4 ދުވަހުގެ މުއްދަތެއް ވަނީ ދީފަ އެވެ.

މާލެ އާއި ރާއްޖޭގެ ބޮޑެތި އާބާދީތައް ދިރިއުޅޭ ރަށްރަށުގައި ޕްރޮފެޝަނަލް މަސާޖުކުރާ ކަމަށް ބުނެ ގިނަ އަދަދަކަށް މަސާޖު ޕާލާތައް ހިންގި ނަމަވެސް އެއީ ފުޅާ ދާއިރާއެއްގައި ހަށިވިއްކާ ތަންތަން ކަމުގެ ތުހުމަތު އެތައް ބަޔަކު ކުރެ އެވެ. އަދި އެކަން ކުރާ ބިދޭސީ މީހުން ދަނީ އެ މީހުންގެ ފޮޓޯ އާއި ނަމްބަރު ވެސް ޖަހައިގެން ސޯޝަލް މީޑިއާގައި އިޝްތިހާރު ކުރަމުންނެވެ.