މަސްތުވާތަކެތީގެ މައްސަލައެއްގައި ހައްޔަރު ކުރި މީހަކު 15 ދުވަހަށް ބަންދު ކުރުމަށް ކްރިމިނަލް ކޯޓުން އަމުރުކޮށްފިއެވެ.

މި މައްސަލައާ ގުޅިގެން ހައްޔަރު ކޮށްފައިވަނީ އުމުރުން 30 އަހަރުގެ ދިވެހި ފިރިހެނެކެވެ.

އޭނާގެ މައްޗަށް ތުހުމަތު ކޮށްފައިވަނީ މަސްތުވާތަކެތި ބޭނުންކޮށް، ގެންގުޅެ، އެތަކެތީގެ ވިޔަފާރި ކުރުމުގެ ކުށުގެ ތުހުމަތެވެ.

އޭނާގެ ބަންދުގެ މުއްދަތު ހަމަވަނީ 13 ޖުލައި 2023 ގައެވެ.

ކޯޓު އަމުރުގައި ބަޔާންކޮށްފައިވާ ގޮތުގައި މި މައްސަލައިގައި ހުށައަޅާފައިވާ ރިޕޯޓުތަކާއި ބަޔާންތަކަށް ބަލާއިރު، އޭނާ ދިރިއުޅޭ ތަނުން ގިނަ އަދަދެއްގެ މަސްތުވާތަކެތިކަމަށް ޝައްކު ކުރެވޭ އެއްޗެހި ވަނީ ފެނިފައެވެ.

އޭނާގެ ދިފާއީ ވަކީލުގެ ފަރާތުން ވަނީ އޭނާއަކީ ދައުވާ ލިބިގަތުމަށް ނުކުޅެދޭ، ނަފްސާނީ މައްސަލަ ހުންނަ މީހެއްކަން ފާހަގަކޮށްފައެވެ.

އެކަން ސާބިތު ކުރުމަށް އެސެސްމަންޓެއް ހަދަންޖެހޭކަމަށް ވަކީލު ވިދާޅުވެފައިވެއެވެ.

ކޯޓު އަމުރުގައި ބުނެފައިވަނީ، ދައުވާ ލިބިގަތުމަށް ނުކުޅެދިގެންވާ ކަމުގެ ދިފާއު ސާބިތު ކުރުމަށް ހަދަންޖެހޭ އެސެސްމަންޓު ހެދުމަކީ ދިފާއުގެ ޒިންމާއެއް ކަމަށާއި، އެކަމަށް ދޭން ޖެހޭ އެއްބާރުލުމެއް ދިވެހި ފުލުހުންގެ ޚިދުމަތުން ދޭނެކަމަށް އައިއޯ ބުނެފައިވާ ކަމަށެވެ.

އަދި އެސެސްމަންޓު ހެދުމަށް އެޕޮއިންޓްމަންޓް ލިބޭ ގަޑިއަށް އެތަނަކަށް އޭނާ ހާޒިރުކޮށްދޭނެކަމަށް ފުލުހުން ބުނެފައިވެއެވެ.

ދައުވާ ލިބިގަތުމަށް ނުކުޅެދިގެންވާކަމުގެ ދިފާއު އޭނާގެ ފަރާތުން ނަގާފައިވާތީ މީގެ ކުރިން ބޭއްވުނު ބަންދާމެދު ގޮތެއް ނިންމުމުގެ މަޖިލީހުގައިވެސް ގާޒީ ވަނީ އެކަމާ ގުޅޭ އެސެސްމަންޓު ހެދުމަށް އަންގަވާފައެވެ.

އޭނާއަކީ ދައުވާ ލިބިގަތުމަށް ނުކުޅެދޭ މީހެއްކަމުގައި ބުނާތީ ޖިނާއީ އިޖުރާއަތުގެ ޤާނޫނަށް ރިއާޔަތްކޮށް، އޭނާއަކީ ސިއްޙީ ގޮތުން ދައުވާ ލިބިގަތުމަށް ނުކުޅެދިގެންވާ މީހެއްކަން ނުވަތަ ނޫންކަން އެނގޭނެ އެގްޒެމިނޭޝަނެއް ހެދުމަށް އަނެއްކާވެސް ގާޒީ ވަނީ އަންގަވާފައެވެ.

އެފަދަ އެގްޒެމިނޭޝަނެއް ހެދުމަށް ކަމާބެހޭ އިދާރާތަކުން ދޭންޖެހޭ އެއްބާރުލުން ދޭންޖެހޭނެކަމަށްވެސް ގާޒީ ނިންމެވިއެވެ.