ދަގަނޑޭގެ ރެކޯޑާ ޗެތުރީ ހަމަހަމަކޮށްފި، އެއްވަނަ ކުވޭތަށް

ސާފް ޗެމްޕިއަންޝިޕް ފުޓްބޯޅަ މުބާރާތުގައި އެންމެ ގިނަ ގޯލު ޖަހައިގެން ރާއްޖޭގެ ކުރީގެ ކެޕްޓަން އަލީ އަޝްފާގް (ދަގަނޑޭ) ހަދާފައިވާ ރެކޯޑާ އިންޑިޔާގެ ކެޕްޓަން ސުނިލް ޗެތްރީ ހަމަހަމަކޮށްފި އެވެ.

މި ދެ ފޯވަޑުން ވެސް މިހާތަނަށް ޖަހާފައިވާ ގޯލުގެ އަދަދަކީ 23 އެވެ. ހައްޖުގެ މަތިވެރި އަޅުކަން އަދާކުރަން ޖެހުމުން މި ފަހަރުގެ މުބާރާތް ނުކުޅެހުރި ރާއްޖޭގެ އިތުބާރު ފޯވަޑްގެ ރެކޯޑާ ޗެތުރީ ހަމަހަމަކުރީ މިރޭ ކުވޭތު ޓީމާ އެކު ކުޅެ، 1-1 ން ދެޓީމް އެއްވަރުވި މެޗުގަ އެވެ. ކުވޭތުގެ ލަނޑަކީ މެޗުގެ އިތުރުވަގުތަށް ދެއްކި އަށް މިނިޓް ތެރޭގައި އިންޑިޔާގެ ޑިފެންޑަރު އަންވަރު އަލީ އަތުން ބައިކޮޅަށް ވަން ލަނޑެކެވެ. މި މެޗުގެ ނިމެން ތިން މިނިޓަށްވެފައިވަނިކޮށް އިންޑިޔާ އާއި ކުވޭތުގެ ކުޅުންތެރިއަކަށް ރަތްކާޑު ދެއްކި އެވެ. އަދި އޭގެ ކުރިން އިންޑިޔާގެ ކޯޗު އިގޯ ސްޓިމަކް އަށް ވެސް ރަތްކާޑު ދައްކައި ފޮނުވާލި އެވެ. މިއީ މި މުބާރާތުގައި އޭނާ އަށް ރެފްރީން ކާޑު ދައްކަން ޖެހުނު ދެ ވަނަ މެޗެވެ.

މިއާއެކު ގްރޫޕް އޭގެ އެއްވަނަ ޓީމުގެ ގޮތުގައި ސެމީ ފައިނަލަށް ދިޔައީ ކުވޭތެވެ. ދެ ވަނަ މަގާމު ލިބުނީ އިންޑިޔާއަށެވެ. މި ގްރޫޕުގެ ތިން ވަނަ ނޭޕާލަށް އަދި ފުލަށް ދިޔައީ ތިން މެޗުން ވެސް ބަލިވެގެން ޕާކިސްތާނެވެ.

ސެމީ ފައިނަލުގައި އިންޑިޔާ ވާދަކުރާނީ މާދަމާ ރާއްޖެ އާއި ލެބަނަން އަދި ބަނގްލަދޭޝް އާއި ބޫޓާން ކުޅޭ މެޗަށް ފަހު ގްރޫޕް ބީން ދެވަނަ އަށްދާ ޓީމަކާ އެވެ. ކުވޭތު ކުޅޭނީ ގްރޫޕް ބީގެ އެއްވަނަ ޓީމާ އެވެ.

ސުނިލް ޗެތްރީ އަކީ ސާފް ޗެމްޕިއަންޝިޕް ތިން ފަހަރު ކާމިޔާބުކޮށްފައިވާ ކުޅުންތެރިއެކެވެ. މުބާރާތުގެ މޮޅު ކުޅުންތެރިޔާގެ މަގާމު ތިން ފަހަރު އަދި ރަންބޫޓު ދެ ފަހަރު ހޯދި އެވެ. މި ފަހަރުގެ މުބާރާތުގައި ވެސް މިހާތަނަށް އެންމެ ގިނަ ގޯލު ޖެހީ އޭނާ އެވެ. އެއީ ފަސް ލަނޑެވެ.