މުބާރާތުގެ ފަހު މެޗުން ނޭޕާލަށް މޮޅެއް

ސާފް ޗެމްޕިއަންޝިޕް ފުޓުބޯޅަ މުބާރާތުގައި ޕާކިސްތާން ބަލިކޮށް ނޭޕާލުން މޮޅަކާއެކު މުބާރާތް ނިންމާލައިފިއެވެ.

ގުރޫޕް ސްޓޭޖްގެ ފަހު މެޗަށް ނިކުތްއިރު ދެ ޓީމުވެސް ވަނީ ކުޅުނު ދެ މެޗުން ބަލިވެ, މުބާރާތުން ކަޓާފައެވެ. ޕާކިސްތާނާއި ނޭޕާލް ހިމެނޭ، ގުރޫޕު އޭއިން ސެމީ ފައިނަލަށް ދަތުރުކޮށްފައިވަނީ އިންޑިއާއާއި ކުވެއިތެވެ.

ބެންގަލޫރުގެ ސްރީ ކަންޓީރަވާ ސްޓޭޑިއަމްގައި މިއަދު ހަވީރު ކުޅުނު މެޗު ނޭޕާލުން ކާމިޔާބުކޮށްފައިވަނީ 1-0ގެ ނަތީޖާއަކުންނެވެ. މި މެޗުގައި ދެ ޓީމުގެ ފަރާތުންވެސް ފެނުނީ ދާދި ހަމަހަމަ ކުޅުމެކެވެ. މުބާރާތުން ކެޓިނަމަވެސް، ދެ ޓީމުންވެސް މަސައްކަތްކުރީ މޮޅަކާއެކު މުބާރާތް ނިންމާލުމަށެވެ. މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ޖެހިފައެއް ނުވެއެވެ. މެޗުގެ ހަމައެކަނި ލަނޑު 80 ވަނަ މިނެޓުގައި ނޭޕާލަށް ކާމިޔާބުކޮށްދިނީ އާޝިޝް ޗޯދުރީއެވެ.

އެންމެ ފަހުން ބޭއްވި ސާފް ޗެމްޕިއަންޝިޕް މުބާރާތުގެ ރަނަރަޕް، ނޭޕާލުން މި މުބާރާތް ނިންމާލީ ތިން ޕޮއިންޓާއެކު، ގުރޫޕު އޭގެ ތިންވަނާގައެވެ. ގިނަ ދަތިތަކަކާއެކު މި މުބާރާތުގައި ވާދަކޮށްފައިވާ ޕާކިސްތާނަށް ޕޮއިންޓެއް ލިބިފައެއް ނުވެއެވެ.