ލަދުވެތި ބައްޔެއް، ރާއްޖެ ބަންގްލަދޭޝް އަތްދަށުވެ ނޭވާ ހޮޅިއަށް!

ސާފް ޗެމްޕިއަންޝިޕް ފުޓުބޯޅަ މުބާރާތުގައި ރާއްޖެ އާއި ބަންގްލަދޭޝް ކުޅުނު މެޗު ފަހަތުން އަރާ 3-1 ން ބަންގްލަދޭޝް ކާމިޔާބުކޮށްފިއެވެ.

މިއީ 20 އަހަރު ފަހުން ބަންގްލަދޭޝް އަތުން ރާއްޖެ ބަލިވި ފުރަތަމަ ފަހަރެވެ. މި ބައްޔާއެކު، ސެމީ ފައިނަލްގެ ޖާގަ ހޯދުމަށް ރާއްޖެއަށް ވަނީ ފުރުސަތު ހަނިވެފައެވެ. ފުރަތަމަ މެޗުގައި ބޫޓާން އަތުން މޮޅުވި ނަމަވެސް، ގުރޫޕު ސްޓޭޖްގެ ފަހު މެޗުގައި ރާއްޖެއިން ލެބަނަން ކައިރިން ރަނގަޅު ނަތީޖާއެއް ހޯދަން މަޖުބޫރު ވާނެއެވެ. ލެބަނަން އަކީ ގުރޫޕު ބީ ގައި ހިމެނޭ އެންމެ ވަރުގަދަ ޓީމެވެ. އެ ޓީމުން ވަނީ މުބާރާތުގެ ފުރަތަމަ މެޗުގައި ބަންގްލަދޭޝް ކައިރިން 2-0 އިން މޮޅުވެފައެވެ.

ރާއްޖެއިން ބަންގްލަދޭޝް މެޗަށް ނިކުމެފައިވަނީ ދެ ބަދަލަކާއެކުއެވެ. ފުރަތަމަ މެޗުގައި ބޫޓާން އާ ދެކޮޅަށް ކުޅުނު އިބްރާހިމް ވަހީދު ހަސަން (އިއްބެ ވަހީދު) އާއި އިބްރާހިމް މަހުދީ ހަސަން (ފޭދޫ އިއްބެ) ގެ ބަދަލުގައި ކުޅެން ނިކުމެފައިވަނީ އަލީ ފާސިރު (ސެންޓޭ) އާއި ނާއިޒް ހަސަން (ދާދު) އެވެ.

މިއަދު ހަވީރު ކުޅުނު މެޗުގައި ފުރަތަމަ ކުރިހޯދީ ރާއްޖެއިންނެވެ. މެޗުގެ 17 ވަނަ މިނެޓުގައި އަލީ ފާސިރު (ސެންޓޭ) ތަނަވަސްކޮށްދިން ފުރުސަތަކުން އެ ލަނޑު ކާމިޔާބުކޮށްދިނީ ހަމްޒާ މުހައްމަދު (ހަމްޕު) އެވެ. ރާއްޖެއިން ލީޑު ނެގިނަމަވެސް ގިނަ ވަގުތު ބޯޅަ ހިފަަހައްޓައިގެން ހަމަލާތައް ފޮނުވާފައިވަނީ ބަންގްލަދޭޝް އިންނެވެ. އޭގެ ނަތީޖާއެއްގެ ގޮތުން ފުރަތަމަ ހާފު ނިމެން ތިން މިނެޓަށް ވެފައިވަނިކޮށް ބަންގްލަދޭޝްގެ ރަކީބް ހުސެއިން ވަނީ ލަނޑެއް ޖަހާ، ނަތީޖާ ހަމަހަމަ ކޮށްދީފައެވެ. މެޗުގެ ފުރަތަމަ ހާފު ނިމުނީ 1-1 އިން ދެ ޓީމު އެއްވަރުވެގެނެވެ.

ދެވަނަ ހާފު ފެށިގެންވެސް މޮޅަށް ކުޅެފައިވަނީ ބަންގްލަދޭޝް އިންނެވެ. މެޗުގެ 66 ވަނަ މިނެޓުގައި ބަންގްލަދޭޝްގެ ތާރިގް ކާޒީ ވަނީ ލަނޑެއް ޖަހާ، މެޗުގައި ފުރަތަމަ ފަހަރަށް ބަންގްލަދޭޝް އަށް ލީޑު ނަގައިދީފައެވެ. މެޗުގެ އިތުރު ވަގުތުގައި ބަންގްލަދޭޝްގެ ތިން ވަނަ ލަނޑު ޖަހައިދިނީ މޮރްސަލިންއެވެ.

ގުރޫޕް ސްޓޭޖް ފަހު މެޗުގައި ރާއްޖެ ނިކުންނާނީ ގުރޫޕުގެ އެންމެ ވަރުގަދަ ޓިމު ކަމަށްވާ ލެބަނަން އާ ދެކޮޅަށެވެ. ބަންގްލަދޭޝް ނިކުންނާނީ ރާއްޖެ އަތުން ބަލިވި ބޫޓާން އާ ދެކޮޅަށެވެ.