ބަންގުބަންދު ސާފް ޗެމްޕިއަންޝިޕް ގްރޫޕް ސްޓޭޖްގައި ކުޅުނު ދެވަނަ މެޗުންވެސް މޮޅުވެ, ސަރަހައްދުގެ އެއްވަނަ އިންޑިޔާ ސެމީފައިނަލުން ޖާގަ ހޯދައިފިއެވެ.

މުބާރާތުގެ އެންމެ ކާމިޔާބު އިންޑިޔާއިން ސެމީގެ ޖާގަ ޔަޤީންކުރީ 2-0 ން ނޭޕާލް ބަލިކޮށްގެންނެވެ. މިމެޗުގައިވެސް 38 އަހަރުގެ ކެޕްޓަން ސުނިލް ޗެތްރީ ލަނޑު ޖެހިއެވެ. ލަނޑެއް ނުޖެހި ނިމުނު ފުރަތަމަ ހާފަށްފަހު 61 ވަނަ މިނިޓްގައި އިންޑިޔާއަށް ކުރިހޯދައިދިނީ ޗެތްރީއެވެ. ދެވަނަ ލަނޑެއް ޖަހާ ލީޑް ފުޅާކޮށްދިނީ މަހޭޝް ސިންގ އެވެ. އޭނާ ލަނޑު ޖެހީ 70 ވަނަ މިނިޓްގައެވެ. ދެ ލަނޑުގައިވެސް އެއް ކުޅުންތެރިއަކު އަނެއް ކުޅުންތެރިއަކަށް އެހީތެރިވިއެވެ.

މިމެޗުގެ ކުރިން އިންޑިޔާއިން ވަނީ 4-0 ން ޕާކިސްތާން ބަލިކޮށްފައެވެ. އެހެންކަމުން ބާކީ އެއް މެޗު އޮއްވާ އިންޑިޔާ ވަނީ ސެމީގެ ޖާގަ ޔަޤީންކޮށްފައެވެ. ގްރޫޕްގެ އެއްވަނަ ހޯދަން އިންޑިޔާ ވާދަކުރަން ޖެހޭނީ ކުވެއިތާއެވެ. ކުވެއިތުވެސް ދެ މެޗުން މޮޅުވެ ސެމީގެ ޖާގަ ވަނީ ޔަޤީންކޮށްފައެވެ. އެހެންކަމުން މިގްރޫޕުން ޕާކިސްތާނާއި ނޭޕާލް ވަނީ ކަޓާފައެވެ.

ގްރޫޕް ބީގައި ލެބަނަން އާއި ރާއްޖެ ވަނީ ފުރަތަމަ މެޗު ކާމިޔާބުކޮށްފައެވެ. ބަނގްލަދޭޝްއާއި ބޫޓާންއަށް އޮތީ އާދިއްތަ ދުވަހު ކުޅޭ ދެވަނަ މެޗުން މޮޅެއް ހޯދުމެވެ.