ބޫޓާން ކަޓުވާލުމަށްފަހު ސާފް ޗެމްޕިއަންޝިޕް ފުޓްބޯޅަ މުބާރާތުގެ ސެމީފައިނަލާ ގާތަށް ލެބަނަން ޖެހިލައިފިއެވެ.
ސަރަހައްދުން ބޭރުން މުބާރާތުގައި ވާދަކުރާ ދެ ޤައުމުގެ ތެރޭގައި ހިމެނޭ ލެބަނަން ސެމީގެ ފުރުޞަތު ބޮޑު ކުރީ މިހާތަނަށް ކުޅުނު ދެ މެޗުންވެސް މޮޅުވެ, ހަ ޕޮއިންޓް ހޯދައިގެންނެވެ. މިގްރޫޕްގައި ދެ މެޗުން ހަ ޕޮއިންޓް ލިބިފައިވާ ހަމައެކަނި ގައުމަކީވެސް ލެބަނަންއެވެ. ދިވެހިރާއްޖެއާއި ބަނގްލަދޭޝް އޮތީ ދެ މެޗުން ތިން ޕޮއިންޓާއެކުއެވެ. ރާއްޖެ ތިން ޕޮއިންޓް ހޯދީ ބޫޓާން ބަލިކޮށްގެންނެވެ. ބަނގްލަދޭޝް ތިން ޕޮއިންޓް ހޯދީ ރާއްޖެ ބަލިކޮށްގެންނެވެ. ލެބަނަން ވަނީ ބޫޓާނާއި, ބަނގްލަދޭޝް ބަލިކޮށްފައެވެ.
ބޫޓާންގެ މައްޗަށް ލެބަނަން ކުރި ހޯދީ 4-1 ނެވެ. މެޗުގައި ލެބަނަން އިން ހަތަރު ލަނޑުވެސް ޖެހީ ފުރަތަަމަ ހާފްގައެވެ. ލެބަނަން އިން ބޫޓާންގެ ގޯލް ހުޅުވާލީ 11 ވަނަ މިނިޓްގައި މުހައްމަދު ސަދެކް ޖެހި ލަނޑުންނެވެ. އޭގެ 11 މިނިޓްފަހުން ދެވަނަ ލަނޑު ޖެހީ އަލީ އަލް ހާޖް އެވެ. ތިންވަނަ ލަނޑު ޖެހީ ހަލީލް ބަދަރައެވެ. ހަތަރުވަނަ ލަނޑު މަހުދީ ޒެއިން ޖެހީ ހާފް ނިމެން ތިން މިނިޓަށް ވެފައިވަނިކޮށެވެ. ބޫޓާނުން ސުން ކަނޑުވާލީ 79 ވަނަ މިނިޓްގައެވެ. އެޓީމްގެ ލަނޑު ޖެހީ ޗެންޗޯ ޔެލްޝެންއެވެ.
މިނަތީޖާއާއެކު ރާއްޖެއަށް އޮތީ ލެބަނަން އަތުން ރަނގަޅު މޮޅެއް ހޯދުމެވެ. އެއީ މިހާރުވެސް ރާއްޖެއަށް ފައިދާ ގޯލެއް ނެތުމުންނެވެ. ރާއްޖެއަށްވުރެ ފުރުޞަތު ބޮޑީ ބަނގްލަދޭޝްއަށެވެ. އެއީ ބަނގްލަދޭޝްއަށް ބޫޓާން މެޗު އޮތުމުންނެވެ. ލެބަނަން ކަޓާނީ ރާއްޖެ އަތުން ބޮޑު ތަފާތަކުން ބަލިވެގެންނެވެ. އޭރުންވެސް ކަޓާނީ ބޫޓާން ކޮޅަށް ބަނގްލަދޭޝްއިންވެސް ލަނޑުތަކެއް ޖަހައިގެންނެވެ.
