މިހާރު ކުރިއަށްދާ ސާފް ޗެމްޕިއަންޝިޕް ފުޓުބޯޅަ މުބާރާތުގައި ރާއްޖޭގެ ޤައުމީ ފުޓުބޯޅަ ޓީމަށް ދިމާވާ އެންމެ ބޮޑު މައްސަލަ އަކީ، މުބާރާތުގެ ކުރިން މެޗުތަކެއް ކުޅެފައި ނެތް ކަމުގެ މައްސަލަ ކަމަށް ޤައުމީ ޓީމުގެ ކުރީގެ އެސިސްޓެންޓް ކޯޗު ސިމާއޯ ކޮސްޓާ ބުނެފި އެވެ.

މުބާރާތުގައި ރާއްޖެ އިން ކުޅުނު ފުރަތަމަ މެޗުގައި ބޫޓާން އަތުން މޮޅުވި ނަމަވެސް، ދެ ވަނަ މެޗުގައި ބަންގްލަދޭޝް އަތުން ބަލިވެ ވަނީ ޕްރެޝަރު ބޮޑުވެފަ އެވެ. ގްރޫޕް ސްޓޭޖުގެ ފަހު މެޗުގައި ބުދަ ދުވަހު ރާއްޖެ އިން ނުކުންނާނީ ލެބަނަންނާ ދެކޮޅަށެވެ. ސާފް ޗެމްޕިއަންޝިޕްގައި ބަންގްލަދޭޝް އަތުން ރާއްޖެ ބަލިވީ 20 އަހަރު ދުވަހަށް ފަހު އެވެ.

ރާއްޖެ އެމްވީ އިން ކުރި ސުވާލަކަށް ޖަވާބު ދެމުން ސިމާއޯ ބުނީ، ޓީމަށް ދިމާވި އެންމެ ބޮޑު މައްސަލަ އަކީ ވާދަވެރި މެޗުތަކެއް ކުޅެފައި ނެތް މައްސަލަ ކަމަށެވެ. އޭނާ ބުނީ ޤައުމީ ޓީމުގެ ފަރިތަކުރުންތަކުގައި އޭރު ވެސް އެކުވެރި ކަމުގެ މެޗުތައް ކުޅެން އިސްކަން ދިނުމަށް ކޯޗު ފްރެންޗެސްކޯ މޮރިއޭރޯ ގާތު އެދެމުން އައި ކަމަށެވެ. ނަމަވެސް އެކަމަށް އޭރު ވެސް ކޯޗު މާ ބޮޑު ސަމާލުކަމެއް ނުދޭ ކަމުގައި އޭނާ ވަނީ ބުނެފަ އެވެ. ސިމާއޯ ބުނީ އެކުވެރި ކަމުގެ މެޗުތަކެއް ހަމަޖެއްސުމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން މަސައްކަތް ކުރި ނަމަވެސް، އެކަމަށް މޮރިއޭރޯ ކޮންމެ ވެސް "ބަހަނާއެއް" ދައްކާ ކަމަށެވެ. ސަބަބެއްގެ ގޮތުގައި އޭނާ ބުނީ އެކުވެރިކަމުގެ މެޗުތަކުން ނަތީޖާ ނުނެރެވިއްޖެ ނަމަ، މަގާމުން ވަކި ކުރުމުގެ ބިރު މޮރިއޭރޯ އަށް އޮތުން ކަމަށެވެ.

މީގެ އިތުރުން އޭނާ ބުނީ ލެބެނާން އަކީ މުބާރާތުގައި އޮތް ވަރުގަދަ ޓީމެއް ކަމަށެވެ. ރާއްޖެ އިން ބޫޓާންއާ ދެކޮޅަށް ދެއްކި ކުޅުމާއި، ބަންގްލަދޭޝް މެޗުގެ ނަތީޖާއާއެކު ޓީމުގެ ކޮންފިޑެންސް ގެއްލިފައިވާނެ ކަމަށް އޭނާ ދެކެ އެވެ. އޭނާ ބުނީ އެކަން އެގޮތަށް ދިމާވަނީ ކޯޗު ވެސް ކުޅުންތެރިންނަށް އެ ކޮންފިޑެންސް ނުދައްކާތީ ކަމަށެވެ. ނަމަވެސް އޭނާ ދެކޭ ގޮތުގައި ލެބެނާން ބަލިކުރެވޭ ފެންވަރުގެ ކުޅުންތެރިން ޤައުމީ ޓީމުގައި އެބަ ތިއްބެވެ.

މުބާރާތުގައި ރާއްޖެ އިން ލެބެނާންއާ ދެކޮޅަށް ނިކުންނާނީ ބުދަ ދުވަހު ރާއްޖެ ގަޑިން 15:00 ގައެވެ.