ސާފް ޗެމްޕިއަންޝިޕް ފުޓުބޯޅަ މުބާރާތުގައި ޕާކިސްތާން ބަލިކޮށް މުބާރާތުގައި އަލަށް ބައިވެރިވި ކުވެއިތު ސެމީ ފައިނަލާ ގާތަށް ޖެހިލައިފިއެވެ.

މިއަދު ހަވީރު ކުޅުނު މެޗު ކުވެއިތުން ކާމިޔާބުކޮށްފައިވަނީ 4-0 ގެ ނަތީޖާއަކުންނެވެ. ނޭޕާލް ކައިރިން 3-1 ން މޮޅުވެ ވަރުގަދަކޮށް މުބާރާތް ފެށި ކުވެއިތުން ޕާކިސްތާން މެޗުވެސް ފެށީ ވަރުގަދަކޮށެވެ. އެގޮތުން މެޗުގެ 10 ވަނަ މިނެޓުގައި ކުވެއިތުގެ ހަސަން އަލަނޭޒީ ވަނީ ލަނޑެއް ޖަހާ، ޓީމަށް ކުރިހޯދައި ދީފައެވެ. އޭގެ ހަތް މިނެޓު ފަހުން މުބާރަކް އަލްފަހީނީ ވަނީ ލަނޑެއް ޖަހާ، ކުވެއިތަށް ލީޑު ފުޅާކޮށްދީފައެވެ. މުބާރަކް ވަނީ ފުރަތަމަ ހާފު ނިމުމުގެ ކުރިން އިތުރު ލަނޑެއް ޖަހާ، ކުވެއިތަށް ތިން ލަނޑުގެ ފަރަގެއް ހޯދަދީފައެވެ.

ތިން ލަނޑުން ކުރި ލިބިފައިވުމާއެކު ކުވެއިތުން ދެވަނަ ހާފު ފެށީ ހަމަޖެހިލައިގެންނެވެ. އެއާ ޚިލާފަށް އެއް މެޗުން ބަލިވެފައިވާ ޕާކިސްތާނަށް ޕްރެޝަރު ބޮޑުވިއެވެ. ދެވަނަ ހާފުގައިވެސް ގިނަ ވަގުތު ބޯޅަ ހިފަހައްޓައިގެން ކުޅެފައިވަނީ ކުވެއިތުންނެވެ. ކުވެއިތުގެ ހަތަރު ވަނަ ލަނޑު ކާމިޔާބުކޮށްދިނީ އީދު އަލްރާޝިދީއެވެ.

ކުވެއިތު ކުޅުނު ދެ މެޗުން މޮޅުވެ، މިހާރު ވަނީ ސެމީ އާ ގާތަށް ޖެހިލާފައެވެ. އަދި ޕާކިސްތާން ކުޅުނު ދެ މެޗުންވެސް 4-0 ން ބަލިވުމާ އެކު މިހާރު އޮތީ އަމިއްލަ ބާރު ގެއްލިފައެވެ.

ސާފު ޗެމްޕިއަންޝިޕުގެ ގުރޫޕު އޭ ގައި ހިމެނެނީ ކުވެއިތާއި ޕާކިސްތާނުގެ އިތުރުން ނޭޕާލް އާއި، މުބާރަތް ކުރިޔަށްދާ ޤައުމު، އިންޑިއާއެވެ. ގުރޫޕު ސްޓޭޖްގެ ފަހު މެޗުގައި ކުވެއިތު ނިކުންނާނީ އިންޑިއާ އާ ދެކޮޅަށެވެ. އަދި ޕާކިސްތާން ނިކުންނާނީ ނޭޕާލް އާ ދެކޮޅަށެވެ.