ގޯތި ލިބޭ މީހުންގެ ލިސްޓު އާއްމުކުރުމާއި އެކު ގެޒެޓަށް ބާރު ބޮޑުވެއްޖެ

"ބިންވެރިޔާ" މަޝްރޫޢުގެ ދަށުން ގޯތި ލިބޭ މީހުންގެ ލިސްޓު އާއްމުކުރުމާއި އެކު ގެޒެޓަށް ބާރު ބޮޑުވެއްޖެއެވެ.

ގިނަ އަދަދެއްގެ ބަޔަކު ގޯއްޗަށް އެދި ކުރިމަތިލާފައިވުމާއި އެކު ގޯތި ލިބުނު މީހުން ދެނެގަތުމަށް ގެޒެޓަށް ގިނަ އަދަދެއްގެ މީހުން ވަންނަމުން ދާތީ ގެޒެޓަށް ވަނީ ބާރުބޮޑުވެފައެވެ.

ސަރުކާރުގެ "ބިންވެރިޔާ" މަޝްރޫޢުގެ ދަށުން ދޫކުރާ ގޯއްޗަށް އެދި ހުށަހެޅި ފަރާތްތަކުގެ ތެރެއިން 10314 މީހަކަށް ގޯތި ލިބޭނެކަން ސަރުކާރުން ހާމަކުރީ ހޯމަ ދުވަހުއެވެ.

މި ސްކީމްގެ ދަށުން ގޯއްޗަށް އެދި 15164 ފޯމް ހުށަހަޅާފައިވެއެވެ. އެއީ 23088 މީހުންނެވެ. ޕްލޭނިން މިނިސްޓްރީން ބުނީ ފޯމުލީ މީހުންގެ ތެރެއިން 19858 މީހުން ގޯއްޗަށް ޝަރުތު ހަމަވާކަމަށެވެ. އޭގެތެރެއިން މިފަހަރު ދޫކުރާ 5000 ގޯތި ލިބެނީ ޖުމްލަ 10314 މީހުންނަށެވެ.

މިފަހަރު ދޫކުރާ 5000 ގޯތި ދޫކުރަން ހަމަޖެހިފައި ވަނީ ހުޅުމާލެ އާއި ގުޅީފަޅުންނެވެ. އޭގެތެރެއިން 1500 އަށްވުރެ ގިނަ ގޯތި ދިނުމަށް ހަމަޖެހިފައި ވަނީ ހުޅުމާލެއިންނެވެ. އަދި ބާކީ ގޯތިތައް ދޫކުރުމަށް ހަމަޖެހިފައިވަނީ ގުޅީފަޅާއި ގިރާވަރު ފަޅު ހިއްކައިގެނެވެ.