މެއި މަހުގެ ތެރޭގައި ގުޅީފަޅުން ގޯތިތައް ދޫކުރާނެ: މިނިސްޓަރު މުއްތަލިބު

ބިންވެރިޔާ ސްކީމްގެ ދަށުން ދޫކުރާ ގޯތިތައް ދޫކުރުމުގައި ލަސްތަކެއް ކުރިމަތިވެފައިވާ ކަމަށާއި، މެއި މަހުގެ ތެރޭގައި ގުޅީފަޅުން ގޯތިތައް ދޫކުރާނެ ކަމަށް ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.

ހޯމަ ދުވަހު ރައްޔިތުން މަޖިލީހުގައި އެމްޑީޕީގެ ޕާލަމަންޓްރީ ގްރޫޕް (ޕީޖީ) ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ކުރެއްވި ސުވާލުތަކާއި ގުޅިގެން މިނިސްޓަރު މުއްތަލިބު ވިދާޅުވީ ބިންވެރިޔާ ސްކީމްގެ ދަށުން ދޫކުރުމަށް ކަނޑައަޅާފައިވަނީ ހުޅުމާލެއިން 1407 ގޯތި، ގުޅީފަޅުން 2438 ގޯތި، ގިރާވަރުފަޅުން 5186 ގޯތި ކަމަށާއި، އެއީ ޖުމްލަ 9031 ގޯތި ކަމަށެވެ.

މިހާތަނަށް ހަވާލުކުރެވިފައިވާ ގޯތިތަކާ ގުޅޭގޮތުން މިނިސްޓަރު މުއްތަލިބު ވިދާޅުވީ ކުރީ ސަރުކާރުގައި 465 ގޯތި ހަވާލުކޮށްފައިވާ ކަމަށާއި، މިސަރުކާރުގައި 159 ގޯތި ހަވާލުކޮށްފައިވާ ކަމަށެވެ.

ގޯތި ދޫކުރުމުގައި ލަސްތަކެއް ކުރިމަތިވެފައިވާކަން ފާހަގަކުރައްވައި މިނިސްޓަރު މުއްތަލިބު ވިދާޅުވީ ގުޅީފަޅުން ހިއްކާފައިވާ ސަރަހައްދުގައި ވަރަށް ގިނަ މަސައްކަތްތައް ކުރިއަށްދާ ކަމަށާއި، ވިލިމާލެ ބްރިޖުގެ މަސައްކަތާއެކު، ހަދަންޖެހޭ ސައިޓްތަކާއި، ސްޓޯރޭޖްތައް ހެދުމުގެ މަސައްކަތްތައް ކުރިއަށްދާ ކަމަށެވެ. އަދި ވިދާޅުވީ މިހާރު ޕްލޭނަށް ބަދަލުތަކެއް ގެނެސްގެން މަސައްކަތް ކުރާ ކަމަށާއި، މެއި މަހުގެ ތެރޭގައި ގުޅީފަޅުން ގޯތި ލިބުނު ފަރާތްތަކަށް ގޯތިތައް ހަވާލުކުރެވޭނެ ކަމަށެވެ.

އަޅުގަނޑު ފާހަގަކޮށްލަން ގުޅީފަޅުގައި ހިއްކާފައި ހުރި ސަރަހައްދުތަކުގެ ތެރޭގައި ވަރަށް ގިނަ މަސައްކަތްތަކެއް މިވަގުތު ކުރެވެމުންދާތީ ބްރިޖު މަސައްކަތްތަކާ އަދި ބްރިޖާ ގުޅިގެން ހަދަންޖެހޭ ސައިޓާއި ސްޓޯރޭޖާއި މިހުރިހާ ތަންތަނަށް ބިން ކަނޑައަޅައިފައިވާތީ ގޯތި ހަވާލުކުރުމަށް ސީދާ ފިޒިކަލްކޮށް ގޯތިތައް ހަވާލު ކުރުމަށް ލަސްތަކެއް އައިސްފައި އޮތީ. އެހެންނަމަވެސް ޕްލޭނަށް ބަދަލުތަކެއް ގެނެސްގެން ވީހާ ވެސް ގިނަ ފަރާތްތަކަށް ވީހާ ވެސް އަވަހަށް ހަވާލުކުރުމަށްޓަކައި ކުރަންޖެހޭ މަސައްކަތްތައް މިނިސްޓްރީން ދަނީ ކުރަމުން. އިރާދަކުރެއްވިއްޔާ މެއި މަހުގެ ތެރޭގައި ގުޅީފަޅުން ގޯތި ލިބުނު ފަރާތްތަކަށް ރަޖިސްޓްރީ އެގޯތިތައް ކަނޑައެޅިގެން އެނގޭތޯ ގޮތަށް ގޯތިތައް ހަވާލުކުރާނަން.

ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު

ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ބިންވެރިޔާ ސްކީމްގެ ދަށުން ދޫކޮށްފައިވާ ގޯތިތަކާއި، ގެދޮރުވެރިޔާ ސްކީމްގެ ދަށުން ދޫކޮށްފައިވާ ފްލެޓުތައް ނުދީ ހިފަހައްޓާފައިވާ ކަމަށް ބުނެ، ގިނަ އަދަދެއްގެ އާއްމު ރައްޔިތުން ދަނީ ސަރުކާރާ ދެކޮޅަށް އަޑު އުފުލަމުންނެވެ. އަދި ދޭތެރެ ދޭތެރެއިން ސިލްސިލާ މުޒާހަރާތަކެއް ވެސް ހައުސިން މިނިސްޓްރީ ކައިރީގައި ކުރިއަށް ގެންގޮސްފައިވެއެވެ.