ފްރާންސްގެ ޕެރިސް ސެއިންޓް ޖާމަން (ޕީއެސްޖީ)ން އެ ކުލަބުގެ ސްޕޯޓިން ޑިރެކްޓަރު ލުއިސް ކަމްޕޯސް ވަކިނުކުރާނެ ކަމަށް މީޑިއާތަކުން ބުނެފިއެވެ.
ޕީއެސްޖީގެ ސްޕޯޓިން ޑިރެކްޓަރުގެ މަގާމަށް ކަމްޕޯސް ހަމަޖެއްސީ މިދިޔަ އަހަރުގެ ޖޫން މަހުއެވެ. އެ މަގާމަށް އޭނާ ހަމަޖެއްސީ އެ މަގާމުގައި ކުރިން ހުރި ބްރެޒިލްގެ ލިއޮނާޑޯ އަރައުހޯ މަގާމުން ވަކިކުރުމަށްފަހުއެވެ. ކަމްޕޯސް ސްޕޯޓިން ޑިރެކްޓަރަށް ހަމަޖެއްސިފަހުން އޭނާ ވަނީ އެ ޓީމުގެ ކޯޗަކަށް ކްރިސްޓޮފާ ގަލްޓިއޭ ގެނެސްފައެވެ. ނަމަވެސް ގަލްޓިއޭއާއެކު ޕީއެސްޖީން މިދިޔަ ސީޒަނުގައި ނެރުނު ނަތީޖާއާމެދު ހިތްހަމަ ނުޖެހޭތީ އެ ކުލަބުގެ ކޯޗުކަމުން އޭނާ ވަކިކުރުމަށް ވަނީ ނިންމާފައެވެ. އެކަމާ ގުޅިގެން ކަމްޕޯސްގެ މުސްތަގުބަލާމެދު ވެސް ވަނީ ސުވާލުތަކެއް އުފެދިފައެވެ. ނަމަވެސް ކަމްޕޯސް ވަނީ އެކަން އެ މަގުން ނުދާނެކަމަށް އެތައް ފަހަރަކު ބުނެފައެވެ.
ފްރާންސްގެ މީޑިއާތަކުގައި ބުނެފައިވާ ގޮތުން ޕީއެސްޖީގެ އިސްވެރިން ވެސް ތިބީ ކަމްޕޯސް ވަކިކުރާ ގޮތަކަށް ނޫނެވެ. އެ ކުލަބުގެ އިސްވެރިން ގަބޫލުކުރާގޮތުގައި ކަމްޕޯސްއަށް އެ މަގާމުގައި ކާމިޔާބު މަސައްކަތެއް ކުރެވޭނެއެވެ. އެހެންކަމުން ކުރިއަށް އޮތް ސީޒަނަށް ޓީމު ވަރުގަދަ ކުރުމަށް ކުޅުންތެރިން ހޯދުމުގައި ޕީއެސްޖީން ކުރިއަށް ދާނީ ކަމްޕޯސްއާއެކުއެވެ. ދާދި ފަހުން ޕީއެސްޖީގެ ރައީސް ވަނީ ކަމްޕޯސްއާ ބައްދަލުކޮށްފައި ކަމަށާއި، ކުލަބުގެ ޕްލޭތަކާއެކު ކުރިއަށް ދިޔުމަށް އެދިފައިވާކަމަށް ވަނީ ބުނެފައެވެ.
ޕީއެސްޖީން މިހާރު އަންނަނީ ގަލްޓިއޭގެ ބަދަލުގައި އެ މަގާމަށް ސްޕެއިންގެ ލުއިސް އެންރީކާ ހަމަޖެއްސުމުގެ މަސައްކަތް ކުރަމުންނެވެ. އެކަމުގައި އެންރީކޭއާއެކު އެއްބަސްވުމަކަށް އާދެވިފައިވާކަމަށާއި، ޕީއެސްޖީއާ އޭނާ ހަވާލުވާނެ ކަަމަށްވެސް ރިޕޯޓުތައް ބުނެއެވެ.
