ޓެރަރިޒަމް މަނާކުރުމުގެ ގާނޫނުގެ ދަށުން، ކުށްވެރިންގެ ފައިގައި އެންކަލް ބްރެސްލެޓް (ޓެގު) އަޅުވަން އަލުން ފަށައިފިއެވެ.
މިކަން ހާމަކުރައްވައި ހޯމް މިނިސްޓަރު އިމްރާން އަބްދުﷲ ކުރެއްވި ޓްވީޓެއްގައި ވިދާޅުވީ، ޖިނާއީ އަދުލުގެ ބޭނުމަށްޓަކައި މީހުން މޮނިޓަރކޮށް ކޮންޓްރޯލްކުރުމުގެ ގާބިލުކަން ފުލުހުންގެކިބައިގައި ގާއިމުކޮށް، ކޯޓު އަމުރެއްގެ ދަށުން ޓެގު ބޭނުންކުރަންފެށީ ހުކުރު ދުވަހު ކަމަށެވެ. އަދި އަލުން މި ޓެގު އަޅުވަން ފަށާފައިވާއިރު، ކުރިން ދިމާވި އިދާރީ އަދި ތަންފީޒީ ދަތިތައް މިފަހަރު ދިމާނުވާނެ ކަމަށްވެސް އެމަނިކުފާނު ވިދާޅުވިއެވެ.
މީގެ ކުރިން ވެސް މޮނިކޮން އަމުރުގެ ދަށުން ކުށްވެރިންގެ ފައިގައި ޓެގު އެޅުވިއެވެ. މިއީ ކުށްވެރިން މުޖުތަމައަށް ދޫކޮށްލުމަށްފަހު އެ މީހުންގެ އުޅުން މޮނިޓަރކުރުމުގެ ބޭނުމުގައި ފެށި ކަމެކެވެ.
އިމްރާން ވިދާޅުވީ ޒަމާނީ ވަސީލަތްތަކާއެކު ޓެގު އެޅުވުމުގެ ނިޒާމު މިއަދު ބޭނުންކުރެވެނީ މައިގަނޑުގޮތެއްގައި ޓެރަރިޒަމް މަނާކުރުމުގެ ގާނޫނުގެ ދަށުންކަމުގައި ވީނަމަވެސް، ސަރުކާރުގެ އަމާޒަކީ އަދުލުގެ ނިޒާމުގައި "މޮނިކޮން" ބޭނުންކުރެވޭނެ އިތުރު އިޖުރާއާތުތައް ތައާރަފުކުރުން ކަމަށެވެ. އަދި، ޖަލުގައި މީހުން ބަންދުކުރެވޭ މިންވަރު މަދުކުރުމަކީވެސް މި ނިޒާމުގެ ބޭނުމެއްކަން މިނިސްޓަރު ފާހަގަކުރެއްވިއެވެ.
ޓެރަރިޒަމް މަނާކުރުމާބެހޭ ގާނޫނުދަށުން, ކުށްވެރިންގެ ފައިގައި ޓެގު އެޅުވޭނީ ހައި ކޯޓުން ނެރޭ އަމުރަކާއެކުގައެވެ. އެ އަމުރު ނެރުމަށް ހައި ކޯޓުގައި އެދޭނީ، ފުލުހުން ހޯމް މިނިސްޓަރަށް ދެންނެވުމުން މިނިސްޓަރު ނިންމަވާ ގޮތެއްގެ މަތީންނެވެ.
ކުށްވެރިންގެ ފައިގައި އަލުން ޓެގު އަޅުވަން ފަށާފައިވާއިރު، އެންމެ ފުރަތަމަ ޓެގު އަޅުވާފައިވަނީ ނޫސްވެރިޔާ އަހުމަދު ރިލްވާނާއި ބްލޮގަރ ޔާމީން ރަޝީދުގެ މަރާ ގުޅިގެން ދައުލަތުން ދައުވާ އުފުލާފައިވާ ތިން މީހުންގެ ތެރެއިން ބަންދުން ދޫކޮށްލި، އަހްމަދު އިސްމާއީލުގެ ފައިގައެވެ. އޭނާގެ މައްޗަށް ދައުލަތުން އުފުލަނީ ޓެރަރިޒަމްގެ އަމަލެއް ކުރަން ރޭވުމުގެ ދައުވާއާއި، ޓެރަރިޒަމްގެ އަމަލެއް ކުރުމަށް އެހީތެރިވުމުގެ ދައުވާއެވެ.
