މޮޑެލް ކްރިތިކާ މަރާލީ އޭނާ ގަތް ޑްރަގްތަކަށް ފައިސާ ނުދައްކައިގެން: ޕޮލިސް

ބޮލީވުޑްގެ އެކްޓްރެސް އަދި މޮޑެލް ކްރިތިކާ ޗައުދަރީ މަރާލާފައިވަނީ އޭނާ ގަނެފައިވާ ޑްރަގްތަކަށް ފައިސާ ނުދައްކައިގެން ކަމަށް އިންޑިއާގެ ފުލުހުން ބުނެފިއެވެ.

ކްރިތިކާ މަރާލާފައި އޮއްވާ ފެނިފައިވަނީ މިދިޔަ މަހުގެ 12 ވަނަ ދުވަހުގައެވެ. އޭނާގެ ހަށިގަނޑު ފެނިފައިވަނީ ކުނިވެފައި އޮއްވައެވެ. ފުލުހުންނަށް ކްރިތިކާގެ ކުނިވެފައިވާ ހަށިގަނޑު ފެނިފައިވަނީ އޭނާގެ އެޕާޓްމަންޓުން ކުނިވަސް ދުވާތީ ފުލުހުންނަށް ގުޅުމުން ފުލުހުންގޮސް އެޕާޓްމަންޓުގެ ދޮރު ހަލާކުކޮށް ވަނުމުންނެވެ.

އިންޑިއާގެ ފުލުހުން ބުނީ ކްރިތިކާގެ މަރުގެ ތަހުގީގު ކުރުމުން އެނގުނީ އޭނާ މަރާލާފައިވަނީ ގަނެފައިވާ ޑްރަގްތަކަށް ފައިސާ ނުދެއްކުމުން ކަމަށެވެ. އެގޮތުން 6000 ރުޕީސްއަށް ކްރިތިކާ ޑްރަގް ގަނެފައިވާކަމަށާއި އޭނާ މަރާލީ އެ ފައިސާ ނުދެއްކުމުންކަމަށް މަރުގެ މައްސަލައިގައި ހައްޔަރު ކުރި މީހުންގެ ތެރެއިން އެކަކު ބުނެފައިވާ ކަމަށެވެ.

އަދި ކްރިތިކާގެ މަރުގެ މައްސަލައިގައި ހައްޔަރު ކުރި ދެމީހުންވެސް އޭނާ މަރާލިކަމަށް އެއްބަސްވި އިރު، އޭނާ މަރާލުމަށްފަހު ގަހަނާތައް ގެންދިޔަކަމަށް އިއުތިރާފްވެފައިވާކަމަށް އިންޑިއާގެ ފުލުހުން ބުނެފައި ވެއެވެ.

ކްރިތިކާގެ މަރުގެ މައްސަލާގައި މިދިޔަ ހޯމަ ދުވަހު ހައްޔަރުކޮށްފައި ވަނީ ޝަކީލް ޚާންއާއި ބާސޫ ދާސް ކިޔާ ދެ މީހެކެވެ.