ޒިޔެޗާއެކު އަލް ނަސްރަށް އެއްބަސްވުމަކަށް އާދެވިއްޖެ

ޗެލްސީ އަށް ކުޅެމުން އަންނަ މޮރޮކޯގެ ހަކީމް ޒިޔެޗް ހޯދުމަށް ކުރަމުން އަންނަ މަސައްކަތުގައި އަލް ނަސްރަށް އޭނާއާއެކު އެއްބަސްވުމަކަށް އާދެވިއްޖެ އެވެ.

ބޭރުގެ މީޑިއާތަކުގައި ބުނެފައިވާ ގޮތުން އުމުރުން 30 އަހަރުގެ ކުޅުންތެރިޔާ ހޯދުމުގައި އަލް ނަސްރުން ދެން ޖެހޭނީ އެންމެ ފަހުގެ މަރުހަލާ ފުރިހަމަ ކުރުމަށެވެ. ޒިޔެޗުގެ އިތުރުން ޗެލްސީއާއެކު ވެސް އަލް ނަސްރަށް އެއްބަސްވުމަކަށް އާދެވިފައިވާ ކަމަށް ވަނީ ރިޕޯޓުކޮށްފަ އެވެ. ޗެލްސީ ދޫކޮށް ޒިޔެޗް އަލް ނަސްރަށް ބަދަލުވާނީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން 2026 ވަނަ އަހަރުގެ ޖޫން މަހުގެ ނިޔަލަށް އޭނާ އަލް ނަސްރަށް ކުޅޭނެ އެވެ. އަލް ނަސްރުން މިހާރު ކުރަމުން އަންނަ މަސައްކަތަކީ ލިޔެ ކިޔުންތައް ތައްޔާރު ކުރުން ކަމަށާއި، އެއަށްފަހު ކުރިއަށް އޮތް ދުވަސްތަކުގައި ރަސްމީކޮށް ޒިޔެޗް އެ ކުލަބަށް ސޮއި ކުރުން އޮންނާނެ ކަމަށް ވެސް މީޑިއާތަކުން ބުނެ އެވެ.

އަޔެކްސް ދޫކޮށްލުމަށް ފަހު ޒިޔެޗް ޗެލްސީ އަށް ބަދަލުވީ 2020 ވަނަ އަހަރު އެވެ. އެފަހަރު އެ ކުލަބުން ވަނީ ޒިޔެޗަށް ފަސް އަހަރު ދުވަހުގެ އެއްބަސްވުމެއް ދީފަ އެވެ. އެހެންކަމުން ޗެލްސީއާއެކު ޒިޔެޗް ހަދާފައިވާ އެެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ބާކީ ދެ އަހަރު އޮތް ނަމަވެސް ޒިޔެޗް ދޫކޮށްލުމަށް ޗެލްސީން ހުށަހަޅާ އަގަށް އަލް ނަސްރުން ރުހޭ ކަމަށް މީޑިއާތަކުން ބުނެ އެވެ. މިއީ އައު ސީޒަނަށް އަލް ނަސްރުން ރަސްމީކޮށް ހޯދާނެ ފުރަތަމަ ކުޅުންތެރިޔާ އެވެ. ޒިޔެޗްގެ އިތުރުން ޗެލްސީ އަށް ކުޅެމުން އަންނަ ޕިއޭ އެމެރިކް އޮބާމަޔަން ހޯދުމަށް ވެސް ސަައުދީގެ ކުލަބަކުން ވަނީ ޝައުޤުވެރިކަން ފާޅުކޮށްފަ އެވެ. ޗެލްސީ އަށް ބަދަލުވެ ޒިޔެޗް ވަނީ ޗެލްސީ އަށް ކުޅެދިން 107 މެޗުގައި 14 ލަނޑު ޖަހައިފަ އެވެ. ނަމަވެސް ނިމުނު ސީޒަނުގައި ޗެލްސީގައި ޒިޔެޗަށް އެކަށީގެންވާ މިންވަރަށް ފުރުސަތު ލިބިފައެއް ނުވެ އެވެ.

ސައުދީގެ ކުލަބުތަކުން އަންނަނީ ޔޫރަޕުގެ ގިނަ ކުޅުންތެރިންނަށް ފާރަލައި، ކުޅުންތެރިން ހޯދަމުންނެވެ. އެގޮތުން އަލް ނަސްރުން ވަނީ މިއަހަރުގެ ކުރީކޮޅު ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އެ ކުލަބަށް ގެނެސްފަ އެވެ. އެއަށްފަހު އިތުރު އެހެން ކުޅުންތެރިން ހޯދުމުގެ މަސައްކަތް އަލް ނަސްރާއި، ސައުދީ ލީގުގެ އެހެން ކުލަބުތަކުން އަންނަނީ ކުރަމުންނެވެ.