19 އަހަރުން ދަށާއި 17 އަހަރުން ދަށުގެ ޗެމްޕިއަންކަން ޒީކު އަށް!

އިންޓަރ ސްކޫލް ޓޭބަލް ޓެނިސް މުބާރާތުގެ 19 އަހަރުން ދަށާއި, 17 އަހަރުން ދަށުގެ ފިރިހެން ސިންގަލްސް ޗެމްޕިއަންކަން ޒީކު ހަސަން ލަތީފް ހޯދައިފިއެވެ.

މުބާރާތުގެ 19 އަހަރުން ދަށާއި 17 އަހަރުން ދަށުގެ ސިންގަލްސް ޗެމްޕިއަންކަންވެސް ޒީކް ހޯދީ ފައިނަލްގައި އަހުމަދު ރައްޔާން މުޙައްމަދު އަނީސް ބަލިކޮށްގެންނެވެ.

މިދެއުމުރު ފުރާގެ ސިންގަލްސް ޗެމްޕިއަންކަމުގެ އިތުރުން ޒީކު ވަނީ 17 އަހަރުން ދަށުގެ ޑަބަލްސް ޗެމްޕިއަންކަމާއި ޓީމް އިވެންޓްގެ ޗެމްޕިއަންކަންވެސް ހޯދާފައެވެ. ޓީމް އިވެންޓްގެ ޗެމްޕިއަންކަން ހޯދީ ބިލަބޮންގ ހައި އިންޓަރނޭޝަނަލް ސްކޫލާއެކުއެވެ.

މުބާރާތަށްފަހު ޒީކް ބުނީ މިހާރު ހުރިހާ ކުޅުންތެރިންވެސް ވަރަށް ރަނގަޅު ކަމަށާއި, މެޗުތައް ވަރަށް ޓަފް ކަމަށެވެ.

މުބާރާތުގައި 14 ސްކޫލަކުން 165 ކުޅުންތެރިން ވާދަކުރިއެވެ. އޭގެތެރޭގައި ފުވައްމުލަކުގެ ތިން ސްކޫލް ހިމެނެއެވެ. މުބާރާތުގައި ފުވައްމުލަކު ސްކޫލްތަކުން ވާދަކުރި ކުޅުންތެރިން ދެއްކި ކުޅުން ޒީކް ވަރަށް ބޮޑަށް ފާހަގަކުރިއެވެ.