އޭއެފްސީ 23 އަހަރުން ދަށުގެ މުބާރާތުގައި ރާއްޖެއަށް ބައިވެރިނުވެވުނީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޓެކްނިކަނަލް ކޮމެޓީގެ އިހުމާލުންކަން ރާއްޖެއެމްވީ އަށް އެނގިއްޖެއެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި އޭއެފްސީ 23 އަހަރުން ދަށުގެ މުބާރާތުގައި ބައިވެރިވުމަށް އޭއެފްސީން ވަނީ މިދިޔަ އަހަރުގެ މެއި 31 ވަނަ ދުވަހުގެ ނިޔަލަށް މުއްދަތު ދީފައެވެ. އެހެންނަމަވެސް މުބާރާތުގައި ރާއްޖެއިން ބައިވެރިވާނެކަމުގެ އެއްވެސް ލިޔެކިޔުމެއް ޓެކްނިކަލް ކޮމެޓީން އޭއެފްސީއަށް ފޮނުވާފައެއް ނުވެއެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި އެފްއޭއެމް އިން އަންނަނީ މި މައްސަލަ ތަހުގީގުކޮށް އެފްއޭއެމް ޓެކްނިކަލް ކޮމެޓީގައި އޭރު ތިބި މީހުންގެ އިތުރުން އެ އިދާރާގެ ސްޓާފުންނާ ސުވާލުކުރަމުންނެވެ.

މިކަމާ ގުޅިގެން ރާއްޖެއެމްވީ އަށް މައުލޫމާތު ދެމުން އެފްއޭއެމްގެ އޭރު ހުރި ޓެކްނިކަލް ޑައިރެކްޓަރު މުހައްމަދު ޝިޔާޒް (މޯހަން) ވިދާޅުވީ، އޭއެފްސީން އެއްވެސް ލިޔެކިޔުމެއް ފޮނުވާފައިވާކަން އޭނާ އަށް ނޭނގޭ ކަމަށާއި، މުބާރާތް އޮންނަކަން ވެސް އެނގިފައިނުވާ ކަމަށެވެ.

މި މުބާރާތުގައި ރާއްޖެއިން ބައިވެރިނުވުމުން ފުޓުބޯޅާގައި ޒުވާނުން ކުޅުންތެރިންނަށް އިސްކަންދޭ މިންވަރާމެދު އެތައްބަޔަކު ދަނީ ސުވާލުއުފައްދާ ފާޑުކިޔަމުންނެވެ. މީގެއިތުރުން އެފަރާތްތަކުން ބުނަމުން ދަނީ މި މުބާރާތުގައި ސާކް އަށް ގައުމުގެ ތެރެއިން އަފްއާނިސްތާން، ސްރީލަންކާ، ނޭޕާލް، ބަންގްލަދޭޝް އަދި އިންޑިއާ ބައިވެރިވެފައިވާއިރު، ސާކް ސަރަހައްދުން މުބާރާތުގައި ބައިވެރިވެފައިނުވަނީ ރާއްޖެ، ޕާކިސްތާން އަދި ބޫޓާނެވެ.

މި މުބާރާތުގެ ކޮލިފައިންގައި އޭޝިއާގެ 40 ޓީމު ބައިވެރިވެފައިވާއިރު، 10 ގްރޫޕަކަށް އެޓީމްތައް ވަނީ ބަހާލާފައެވެ. އެގޮތުން މުބާރާތަށް ކޮލިފައިވާނީ ކޮންމެ ގްރޫޕަކުން އެއްވަނަ ހޯދާ ޓީމު އަދި ކޮންމެ ގްރޫޕަކުން އެންމެ ރަނގަޅު ނަތީޖާ ހޯދާ ފަސް ޓީމެކެވެ.

މުބާރާތުގެ ކޮލިފައިން ސްޓޭޖް އަންނަ ޖުލައި މަހު އޮންނަ އިރު، މުބާރާތް ކުޅުމަށް ހަމަޖެހިފައިވަނީ އަންނަ އަހަރު ޗައިނާގައެވެ.